हाम्रा केहि आधारभूत सिद्धान्तहरु छन्।  गाउँ र शहर दुबैको सन्तुलित विकास हुनुपर्छ भन्ने हाम्रो दृढ मान्यता छ। बिबेकशील नागरिक, उद्यमशील समाज र सेवक सरकार भन्ने हाम्रा अबधारणा हुन्।  नागरिक बिबेकशील भएन भने नेतृत्व बिबेकशील हुन सक्दैन।  कुनै पनि देशको स्थिरता र बिकासको आधार उत्पादन हो।  उत्पादन भएन भने के हालत हुन्छ भन्ने हामीले नाकाबन्दीको बेला भोगिसकेका छौं।  उत्पादनको लागि उद्यमशील समाज चाहिन्छ।  अहिले जस्तो विदेशको पैसामा निर्भर समाज कुनै पनि बेला धराशायी हुन सक्छ।  बिदेसी पुंजीमा निर्भर राज्य अत्यन्त कम्जोर हुन्छ।  त्यस्तो राज्य सेवक हुन सक्दैन।  त्यसले आफ्नै नागरिकले बिदेसी भूमिमा दुख गरेर कमाएको पैसामा कर लगाएर आफ्नो अस्तित्व धानेको हुन्छ।  राज्य सेवक हुन बिबेकशील नागरिक र उद्यमी समाज हुनै पर्छ।

नेपालमा अहिलेको संसदीय व्यवस्थाले कुनै हालतमा स्थिरता ल्याउन सक्दैन।  ५ बर्ष सम्म ढुक्क संग काम गर्ने कार्यकारी संयन्त्रको व्यवस्था नभए सम्म यो अस्थिरता जारि रहन्छ। नेपालमा केन्द्रिकृत शासन प्रणालीले समग्र विकास हुन सकेन। त्यसमा परिवर्तन ल्याउन भारत र चीनलाई जोड्ने उत्तर दक्षिण फैलिएका तीनवटा प्रदेशको खाका हामीले प्रस्तुत गरिसकेका छौं।  धेरै प्रदेश नेपालले धान्न सक्दैन।  त्यस्तै बाह्य उत्पादनमा भर परुन्जेल उत्तर र दक्षिणका दुवै देशसंग सबै प्रदेशको पहुँच हुनु पर्छ भन्ने हाम्रो धारणा हो।  त्यसै धर्मको बिषयमा राज्य स्वतन्त्र हुनुपर्छ तर अनुचित धर्म परिबर्तनलाई नियम बनाएर नियमन गर्नु पर्छ। लोभ, लालच, प्रलोभन र धम्किद्वारा धर्म परिबर्तन गर्न नपाइने नियम लागु गरेर धर्म परिबर्तन गरेको मान्छेले सम्बन्धित निकायमा दर्ता गर्नु पर्ने बाध्यकारी   नियम बनाएर धर्म परिबर्तनको अहिलेको जल्दो बल्दो मुद्दालाई हल गर्न सकिन्छ।  लिङ्ग परिबर्तन गरिने दुनियाँमा धर्म परिबर्तन हुँदैन भन्न त सकिन्न तर त्यो परिबर्तन स्वेच्छिक हो भन्ने कागजात गर्नु पर्ने नियम बसालेर यसलाई ब्यबस्थित गर्न सकिन्छ।

हाम्रा यी र यस्ता योजना लागु गर्न हामी ठाउँमा हुनुपर्छ। त्यसको लागि आगामी डेढ बर्ष भित्र गरिने ३ वटा निर्बाचन धेरै महत्वपूर्ण छन्। त्यसमा हामीले समाजका असल चरित्रका केहि गर्न सक्ने उम्मेदवार बनाउने नीति लिएका छौं। खुल्ला छनोट बिधिबाट उम्मेदवार चयन गरिने छन्। हाम्रो समाजमा युवाको ठुलो हिस्सा छ जसले परिबर्तन खोजेको छ र बर्तमान नेतृत्वबाट मुक्ति चाहेको  छ। यो नेतृत्वले मुसो मार्दैन भन्ने कुरा अधिकांश जनतालाई परेको छ। त्यसैले आगामी निर्वाचनमा हामी योग्य, असल र परिवर्तनका सम्बाहक व्यक्तिहरुलाई उम्मेदवार बनाउने छौं। मलाई लाग्छ यसपाली जनताले त्यो मुल्यांकन गर्ने छन् र हाम्रो स्थिति निकै बलियो हुनेछ। होइन फेरी पनि जनताले यिनै यथास्थिति, बिकृति र विसंगतिका सम्बाहक पार्टीहरुलाई भोट हाले भने त्यसको दोष यी नेताहरुलाई होइन तिनै भोट हालेर जिताउने जनतालाई दिनु पर्छ।

बिदेशमा बस्ने साथीहरुलाई पनि नयाँ विचारका र असल विचारका व्यक्तिहरुलाइ नेतृत्वमा स्थापित गर्न सहयोग गरौँ। हामीले कमाएको पैसा र पठाएको पैसा लोक कल्याणमा खर्च होस् भन्ने तर्फ सचेत बनौं। सक्नुहुन्छ हामीलाई सहयोग गर्नुस सक्नु हुन्न तपाईंले नै समर्थन गरेको पार्टी भित्रका बिबेकशील व्यक्तिहरुलाई नेतृत्वमा आउन प्रेरणा र सहयोग प्रदान गरौँ।

कुरा सकियो। उज्वल साथीहरु सित फ्रिस्को तिर लागे। म भने मनमनै उनि र उनको पार्टीलाइ शुभकामना दिंदै घरतिर लागें।