रास्ट्रिय सुरक्षा सल्लाहकारमा बोल्टोनको नियुक्ति र युद्धको खतरा

लेखनाथ गौतम, वाशिंटन डिसी, अमेरिका । ट्रंप प्रशासन भित्रको भद्रगोल जारी छ । रास्ट्रपतिको पदबहाली भए पछि ट्रंपले आफ्नो प्रशासनमा धेरै मान्छे परिबर्तन गरिसकेका छन् भने धेरै ठाउँहरु पूर्ति गर्न बाँकी छन् । विदेश मन्त्रि रेक्स टिलर्सनको बिदाइ भएको हप्ता दिनपछि फेरी अर्को उच्च ओहोदाको व्यक्ति बिदाइ भएका छन् भने नयाँ व्यक्तिले उक्त स्थान लिने भएका छन् । रास्ट्रिय सुरक्षा सल्लाहकार माइकल फ्लिन बर्खास्त भए पछि सोहि पदमा बहाल गरिएका टु स्टार जनरल एच आर म्याक्मास्टर अप्रिल ९ देखि बिदा हुँदै छन् भने जोन बल्टनले उक्त पद प्राप्त गर्ने पक्का भएको हो ।
भुतपुर्ब हुन लागेका एचआर म्याक्मस्टर हक्की स्वभावका मानिन्छन । उनी आबस्यक परेको बखत रास्ट्रपतिलाइ सुझाव मात्र होइन दवाब समेत सक्ने व्यक्ति हुन् । कुनै योजना, भिजन र अनुभव नभएको ट्रंप प्रशासनलाइ अलिकति भए पनि बाटोमा हिडाउन उनी सफल भएका थिए । शासन, प्रशासनको कुनै अनुभब नभएका र मनलागेको गर्ने हठी स्वभावका ट्रंपलाइ कुनै न कुनै रुपमा लाइनमा ल्याउन सक्ने व्यक्तिको रुपमा धेरैले उनलाई हेरेका थिए । म्याक्मास्टर व्हाइट हाउसमा सुझबुझ भएका थोरै व्यक्ति मध्य पर्दछन ।

एच आर म्याक्मस्टर (बायाँ), जोन बोल्टोन (दायाँ)

म्याक्मस्टरको बिदाइसंगै ट्रंपसंग आँखा जुधाएर कुरा गर्न सक्ने धेरै मान्छे व्हाइट हाउसमा बाँकी छैनन् । ट्रंपले राम्रो काम भन्दा पनि बफादारिताको अपेक्षा गर्छन । आफ्नो प्रशंसा गर्नेहरुलाई जति अयोग्य भए पनि पद थमाउने र आफ्नो आलोचना गर्नेलाई जति योग्य भए पनि सिद्धाउने ट्रंपको नानि देखिको बानि हो । उनले अहिले राष्ट्रिय हितमा भन्दा पनि आफ्नो व्यक्तिगत अहम तुस्टिको लागि काम गरेको घाम झैं छर्लंग छ । ट्रंपको बचाउ गर्दा गर्दै र आफ्नो जिन्दगीभरको बिस्वस्नियतालाइ धरापमा राखेर काम गर्दा गर्दै धेरैले आफ्नो पद गुमाएका छन् तर ट्रंप उही तरिका र स्वभावले देशलाई एउटा आफ्नो व्यापारिक कम्पनीको रुपमा संचालन गर्दैछन ।

म्याक्मस्टरको बिदाइ र जोन बल्टनको आगमनले राजधानी डिसीमा एककिसिमको त्रासको अवस्था सिर्जना भएको छ । जोन बल्टन युद्धको भाषा बोल्ने व्यक्ति हुन् । उनले इतिहासकै अलोकप्रिय भियतनाम युद्ध, इराक युद्धको खुलेर समर्थन गरेका छन् । उनले पहिला लड़ांइ र त्यसपछि बल्ल बार्ता गर्नु पर्ने धारणा राख्छन । इरानसंगको न्युक्लियर डिल खारेज गर्नु पर्ने र उत्तर कोरिया संग तत्काल युद्ध गर्नु पर्ने विचार राख्ने बल्टनको व्हाइट हाउसको यात्रा संगै युद्धको धम्कि दिने ट्रंपलाइ युद्धको परिणामबारे सचेत गराउने व्यक्तिको अभावमा अमेरिका नयाँ युद्धहरुमा होमिने त्रास अमेरिका र बिस्वभर फैलिएको छ ।

सन् १९४८ मा जन्मेका बोल्टोन पेशाले वकिल र डिप्लोम्याट हुन् । उनी २००५ देखि २००६ सम्म रास्ट्रपति जर्ज डब्ल्यु बुशको पालामा अमेरिकाको तर्फबाट संयुक्त रास्ट्रसंघका दुत नियुक्त भएका थिए । संयुक्त राष्ट्रसंघ भन्ने संस्था नै छैन भन्ने धारणा राख्ने बोल्टोनको उक्त नियुक्ति ठुलो विवादको घेरामा परेको थियो । २००६ को नोभेम्बरमा भएको निर्बाचनमा डेमोक्र्याटिक पार्टीले सिनेटमा बहुमत ल्याए पछि उनको पद धरापमा परेको थियो र सिनेटबाट उनको नाम स्वीकृत नहुने पक्का भए पछि डिसेम्बर २००६ मा उनले राजिनामा दिएका थिए । अहिले उनी फक्स न्युजमा कमेन्टेटरको साथै अन्य धेरै कन्जरभेटिभ समूहसंग सम्बद्ध छन् । उनको अतिबादी र कथित रास्ट्रबादी छबिकै कारण यो पद हत्याउन सफल भएका छन् ।

बोल्टोनको नियुक्ति संगै युद्धको भाषा बोल्ने ट्रंपलाइ युद्धका दुष्परिणाम बारे सचेत गराउने नभई झन् प्रेरित गर्ने अवस्था सिर्जना भएको छ जसले अमेरिका आगामी दिनमा ठुल्ठुला युद्धमा सामेल हुने र बिस्व अस्थिर र रक्तपातपूर्ण युद्धहरुको चपेटामा पर्न सक्ने मनोबैज्ञानिक त्रास सर्बत्र फैलिएको छ ।