टिका पौडेलको सहयोगमा एनएसटीले कार्यक्रम आयोजना गर्ने

डालस, टेक्सास। युलेस सिटिको सिटि काउन्सिल पदका उम्मेदवार टिका पौडेलको चुनावी अभियानलाइ सघाउन नेपाली समाज टेक्सासले मार्च २१ आइतबार एक कार्यक्रम आयोजना गर्ने भएको छ। सह-आयोजकको रुपमा डालस फोर्ट वर्थ क्षेत्रमा स्थापित अन्य नेपाली संस्थाहरु हुनेछन भने कार्यक्रम नेपाली मन्दिरमा आइतबार दिउसो ३ बजेदेखि संचालन हुनेछ।

अमेरिकामा नेपालीहरुको दिनानुदिन संख्या बढेसंगै अमेरिकाको राजनीतिमा पनि अघि बढ्नु पर्छ भन्ने जनभावना बढिरहेको बेला टिका पौडेलले पनि आफुलाई अमेरिकी राजनीतिमा अघि बढाएका छन्। डालस क्षेत्रको नेपाली समुदायमा अत्यन्त सक्रिय, साँचो अर्थमा समाजसेवी, स्पस्टबक्ताको रुपमा पौडेल चिनिने गर्छन। नेपाली समाजमा सानो काम गरेर त्यसलाई नगदिकरण गर्न नेपाली संस्थाहरुमा पदको मोलतोल गर्ने चलन बीच अमेरिकाकै राजनीतिको खुड्किलो चढ्न आँटेका पौडेल युलेस सिटिका नेपालीहरुको दरिलो साथ पाउने आशा व्यक्त गरेका छन्। बोल्दा चिप्लो नघस्ने तर परेको बेला ज्यु ज्यान दिन समेत तयार हुने बानीकै कारण उनी नेपालीहरुका एक प्रिय पात्र हुन्। उनको त्यहि लोकप्रियताका कारण उनी बस्ने इलाकाको नाम नै टिकापुर भनेर समेत नेपालीहरुमाझमा परिचित छ।
“मैले सोंचेको भन्दा बढी चुनौती रहेछ”, उम्मेदवार पौडेलले युएसएंड नेपाल डट कमसंग भने। “युलेस ठुलो बजेट भएको सिटि भएकोले यसमा प्रतिष्पर्धा पनि चर्को हुँदोरहेछ”। त्यसको लागि नेपाली समुदायको आर्थिक, नैतिक, भौतिक लगायत सम्पूर्ण सहयोगको आबस्यकता रहेको पनि पौडेलले स्पस्ट पारे। नेपालीहरुको लागि काम गर्ने भनेर खोलिएका नेपालीहरुका संस्थाहरुले गर्ने काम आफुले एक्लैले गर्न लागेको र त्यसमा सम्पूर्ण नेपाली समाजको सहयोग पाउने आशा व्यक्त गरे।
डालसको नेपाली समाजमा अमेरिकी राजनीतिमा जाने क्रमको यो अर्को खुड्किलो हो। यस अघि आइषा ओझा पनि उम्मेदवार बनेकी थिइन तर सबै नेपालीहरुले भोट नहाल्दा केहि पछि परेकी थिइन। त्यस्तै प्रभात दिक्षित र सुदिप अधिकारी पनि लामो समय देखि टेक्सासमा डेमोक्र्याट पार्टीको राजनीतिमा सक्रिय हुनुहुन्छ। टिका पौडेलको यो आँटले अरु नेपालीहरुलाई पनि प्रेरित गर्ने विश्वास गरिएको छ।