टेक्सास नेपाली मेडिकल एसोसिएसनले नोभेम्बर १६ मा गाला डिनर गर्ने

डालस, टेक्सास । टेक्सास राज्य र बिशेष गरी डालस वरपर बस्ने नेपाली मेडिकल पेशामा लागेका व्यक्तिहरुको संगठन टेक्सास नेपाली मेडिकल एसोसिएसनले आफुलाई समाज सामु प्रस्तुत गर्ने तयारी शुरु गरेको छ । बेड्फ़ोर्ड स्थित स्थानीय फिस्टेल नेपाली रेस्टुरेन्टमा आयोजना गरिएको बिशेष भेटघाट तथा अन्तरक्रिया कार्यक्रममा त्यसको केहि झल्को दिने प्रयास गरिएको थियो । सो अबसरमा बिशेष गरी संस्था स्थापना गर्न पहल गर्ने मेडिकल डाक्टरहरु, स्थानीय समाजसेवी एबम पत्रकारहरुको उपस्थिति थियो ।
डालस वरपर धेरै मेडिकल पेशामा लागेकाहरुको ठुलो समूह भए पनि संगठित भएका थिएनन । कार्यव्यस्तता एबम समाजबाट अलि बाहिर बस्न रुचाउने डाक्टरहरुको स्वभावका कारण पनि उनीहरु संगठन निर्माणको प्रशासनिक झन्झटमा पर्न चाहदैनन् । यसपटक भने उनीहरु संगठित हुँदै आफ्नो गतिबिधिहरुलाई सामाजसंग जोड्ने अभियानमा पहिलो पाइला अगाडी बढाएका छन् । आउँदो नोभेम्बर १६ मा एक गाला डिनर कार्यक्रम आयोजना गरेर उक्त अभियान अगाडी बढाउने घोषणा उक्त अबसरमा जानकारी समेत गराइयो ।

भेटघाट तथा अन्तरक्रिया कार्यक्रमको संयोजन टेक्सास नेपाली मेडिकल एसोसिएसनको संयोजन समेत गरिरहनु भएका समाजसेवी लिला श्रेष्ठले गर्नु भएको थियो । एसोसियसनका अध्यक्ष डाक्टर संजिव श्रेष्ठको उपस्थितिमा भएको उक्त कार्यक्रममा संस्थाको स्थापनाको उद्देस्य, भैरहेका कामहरु र दिर्घकालिन योजनाबारे जानकारी गराइएको थियो । बिशेष गरी नोभेम्बर १६ मा हुने गाला डिनरमा नेपाली समुदायको सहभागिताको लागि अनुरोध गरिएको थियो ।कार्यक्रममा बोल्दै स्वयंसेवी दिनेश शर्माले नेपाली समाज टेक्साससंग मिलेर चलिरहेको “स्वास्थ्य शिविर”लाइ संस्थागत र ब्यबस्थित गर्ने योजना अन्तर्गत यो गाला डिनरको आयोजना गरिएको जनाउनु भएको थियो । बिगत ९ बर्ष देखि नियमित रुपमा स्वास्थ्य शिविरको संयोजन गरिरहनु भएका शर्माले स्वास्थ्य शिविर संचालनमा भोगेका समस्याहरुलाई सदाको लागि समाधान गर्न एउटा ठोस अभियानको आबस्यकता रहेको र त्यो TNDA ले पुरा गर्ने आशा व्यक्त गर्नु भएको थियो ।
त्यस्तै संस्थाका महासचिव अनुज कंडेलले संस्थाको स्थापनाको पृष्ठभूमि, यसले गरिरहेका कामहरु एबम यसको लक्षबारे जानकारी गराउनु भएको थियो । गाला डिनर कार्यक्रमका संयोजक मकर बज्राचार्यले डिनर कार्यक्रमको नालीबेली प्रस्तुत गर्नु भएको थियो । करिव ३ सय जना व्यक्तिहरुको उपस्थिति हुने अनुमान सहित बीस हजार डलर संकलन गर्ने लक्ष रहेको बज्राचार्यले जानकारी गराउनु भएको थियो । उक्त डिनर कार्यक्रम ग्रेपभाइन स्थित एम्बेसी स्विट्समा हुने, एकजनाको लागि साठी डलर र जोडीको लागि सय डलरको टिकट तोकिएको छ ।
सो अबसरमा डाक्टरहरु सुमित भट्टराई, झरना श्रेष्ठ, शैलेश थापा, बिश्वास उपाध्याय, युबराज भट्टराई र सन्दिप पौडेलको समेत उपस्थिति थियो । कार्यक्रममा डाक्टर झरना श्रेष्ठले आफुले नेपालमा सेवा गर्न नपाए पनि अमेरिकाको नेपाली समाजलाई सेवा गर्न पाउँदा गौरब लाग्ने गरेको भावना व्यक्त गर्नु भएको थियो ।