अस्टिनमा आतंक फैलाउने मार्क एन्थोनी कण्डिटको मृत्यु

लेखनाथ गौतम, अस्टिन, टेक्सास । बिगत ३ हप्ता देखि अस्टिनबासीहरुलाई आतंकित पारेको बम घटनाको पटाक्षेप भएको छ । बुधबार बिहान अस्टिन पुलिस संगको जम्काभेटमा उक्त व्यक्तिको मृत्यु भए पछि अस्टिनबासीले शान्तिको सास फेर्न पाएका हुन ।
अधिकारीहरुका अनुसार उक्त व्यक्तिको परिचय खुलेको छ र उसको नाम मार्क एन्थोनी कण्डिट भएको प्रहरीले जनाएको छ । २४ बर्षिय उक्त व्यक्ति गोरा जातिको रहेको समेत प्रहरीले स्पस्ट पारेको छ ।
तीन हप्ता देखि लगातार रुपमा विस्फोटक पदार्थको प्याकेट घरघरमा पठाएर २ जनाको ज्यान समेत लिएको यो घटनाको एफबिआइले गहिरो अनुसन्धान शुरु गरेको थियो । मंगलबार मात्रै ३५० जना बिषेसज्ञहरुको टोली अस्टिन प्रहरीलाई सघाउन अस्टिन आइपुगेको थियो । अस्टिनका मेयरले यो घटनामा आशंका गरिएको व्यक्तिको मृत्यु भए पछि अस्टिनबासी १९ दिनदेखिको आतंकबाट मुक्ति पाएको भन्दै अझै पनि सतर्क रहन जनतालाई अनुरोध गरेका छन् ।
मार्च २, २०१८ को दिन आफ्नो ढोका अगाडी आएको पार्सल खोल्दा भएको बिस्फोटनमा परी ३९ बर्षीय अफ्रिकन अमेरिकन एन्थोनी स्टेफेन मारिएका थिए भने मार्च १२ मा १९ बर्षीय अफ्रिकन अमेरिकन बिद्यार्थी त्यस्तै घटनमा मारिएका थिए भने उनकी आमा घाइते भएकी थिइन । अर्को प्याकेट बिस्फोटमा हिस्प्यानिक महिला घाइते भएकी थिइन ।
यी प्याकेट सिधै घरमा पुगेका थिए अर्थात् अमेरिकामा घरघरमा समान पुर्याउने कम्पनिहरु मार्फत यी प्याकेटहरु पुर्याइएका थिएनन । तीनवटै घटना अल्पसंख्यक जातिहरुको बसोबास रहेको क्षेत्रमा गराइएको र मृत्यु समेत २ जना अस्वेत व्यक्तिहरुको भए पछि यो घटना जातिवादी र घृणाको कारण भएको हुनसक्ने प्रहरीको प्रारम्भिक अनुमान थियो ।

तर केहि दिन अघि देखि घरघरमा पुर्याउने तरिकाको सट्टा फेडेक्स मार्फत पठाउने तरिका उक्त हमलाकारीले अबलम्बन गर्न थाले  र गोराहरुको बस्तीमा ती प्याकेट पठाए र मार्च १८ गते प्याकेट बिस्फोटनमा एकजना गोरा व्यक्ति घाइते भएका थिए भने अर्को बम फ़ेडेक्सको समान प्रसोधन गर्ने स्थानमा बिस्फोट हुँदा एकजना फेडेक्सका कामदार घाइते भएका थिए ।

मार्क एन्थोनी कण्डिट

यसरी आतंक फैलिंदै गएपछि एफबिआइले गंभीर अनुसन्धान थालेको थियो । खरिद गरेका समान, उक्त व्यक्तिले प्याकेट पठाउँदा पैसा तिरेको रसिद आदिको माध्यम र सिसि क्यामेरा लगायतका प्रमाणहरु एकत्रित गरेपछी प्रहरीले शंकास्पद व्यक्तिको पहिचान गरेको थियो ।
बुधबार बिहानै प्रहरीको स्पेसल टोलीले उक्त व्यक्तिलाई अस्टिन देखि करिब २० माइल उत्तरमा रहेको राउण्ड रक सिटिमा एउटा गाडीमा फेला पारेको थियो । टोलीका एक जना प्रहरीले फेला पारे पछि उनले उसलाई पक्राउ गर्नु अघि आफ्नो टोलीको प्रतिक्षा गरिरहेका थिए तर उक्त व्यक्ति गाडी चढेर भाग्यो । तर स्पेसल टिमले पिछा गरे पछि हाइवे ३५ नजिकै पुग्दा उसले गाडी भित्रै विस्फोटक पदार्थ पड्काएको थियो । उक्त बिस्फोटनमा परी एकजना प्रहरी सामान्य घाइते भएका थिए भने उक्त व्यक्तिको घटनास्थलमै मृत्यु भएको थियो ।
यसरी अमेरिका बढ्दै गएको घृणा अपराधको एउटा घटनाको पटाक्षेप भएको छ । २ जना अस्वेतहरुको ज्यान लिए पछि घटनाको अनुसन्धानलाई अलमल बनाउन गोराहरुको बस्तीमा प्याकेट पठाउने रणनिति अख्तियार गरेको देखिन्छ । बिगत करिव १८ महिना देखि अमेरिकाको रास्ट्रपतिमा डोनाल्ड ट्रंप निर्बाचित भए पछि अतिबादी गोराहरुद्वारा गरिने घृणा अपराधमा उल्लेख्य वृद्धि भएको देखिन्छ । बिशेष गरी ट्रंपका कथित रास्ट्रबादि र गोराहरुको आधिपत्य स्थापित गर्ने खालका अभिव्यक्तिले यस्ता अपराधीहरुको मनोबल उच्च हुँदै गएको छ । पक्कै पनि एउटा अपराधिको यस घटनामा अबसान भएको छ तर यसले अमेरिकी समाजमा बढ्दै गएको घृणा भने कम हुने सम्भावना निकै कम छ ।