नेपाली समाज टेक्सासको पछिल्लो निर्णय बिबादमा

डालस, डिसेम्बर २६ ।
नेपाली समाज टेक्सासको यहि हप्ता निर्बाचन समाप्त भयो । नयाँ कार्यसमितिले केहि हप्ता भित्रै पदभार ग्रहण गर्दैछ । यसै बीच जाँदै गरेको कार्यसमितिले नेपाली आध्यात्मिक तथा सांस्कृतिक केन्द्रलाइ पच्चीस हजार डलर अनुदान दिने निर्णय गरेको छ । यहि डिसेम्बर २३ शनिबार बसेको कार्यसमितिको बैठकले सर्बसम्मत रुपमा उक्त निर्णय गरेको थियो ।

कार्यसमितिले गरेको निर्णयको मसी सुक्न नपाउंदै सोहि बैठकमा उपस्थित र निर्णय पुस्तिकामा हस्ताक्षर समेत गरेका नेपाली समाज टेक्सासका नवनियुक्त अध्यक्ष तथा वर्तमान कार्यसमितिका सह-कोशाध्यक्ष सुमन थापाले असन्तुस्टी जनाएका छन् ।
“नयाँ कार्यसमिति चुनिए पछि ठुलो धनराशी हतार हतार दिने काम मलाई ठिक लागेन”, सुमन भन्छन । तपाईं आफै कार्यसमितिको बैठकमा हुनुहुन्थ्यो, त्यहाँ किन आफ्नो कुरा राख्नु भएन ? यो निर्णय त सर्बसम्मत भएको छ नि भन्ने प्रश्नमा उनले आफुलाई असजिलो अबस्थामा पारेर निर्णय गरिएको बताए । मन्दिरलाइ पैसा दिनेमा आफ्नो आपत्ति नभए पनि प्रक्रिया गलत भएको आफुलाई लागेको जनाएका छन् । पुरानो कार्यसमितिले सबै पैसा सिद्धाएर जाने परम्परा बस्नु राम्रो नभएको भन्दै उनले सोहि प्रवृतिको मात्र आफुले बिरोध गरेको उनले स्पस्ट पारेका छन् । “मन्दिर हाम्रै हो, यसलाई यो भन्दा पनि बढी पैसा उपलब्ध गराउन हामी कटिबद्ध छौं” उनले दोहोर्याए ।

यसबारेमा नेपाली समाज टेक्सासका अध्यक्ष कृष्ण लामिछानेसंग सम्पर्क गर्दा कार्यसमितिमा आफै बसेर गरेको निर्णय बाहिर गएर बिरोध गर्नु उचित नभएको तर्क गरे । संस्थामा रहेको पैसा अहिलेको कार्यसमितिले संकलन गरेको र जायज एबम समुदायको हितको लागि उक्त रकम खर्च वा प्रयोग गर्न स्वतन्त्र भएको उल्लेख गर्दै पहिले पनि यस्तो भएको र अहिले गर्दा पनि अनुचित मान्नु सहि नभएको विचार अध्यक्ष लामिछानेले व्यक्त गरेका छन् ।

त्यस्तै मन्दिर निर्माण देखि डालसको नेपाली समाज निर्माणमा महत्वपूर्ण भूमिका खेलेका समाजसेवी डाक्टर मुरली अधिकारी पनि लामिछानेको कुरामा सहमत देखिए । मन्दिर पनि नेपाली समाज टेक्सास कै एक अभिन्न अंग बनिसकेकोले प्रक्रियाका कुरामा अल्झिनु भन्दा ठिक भयो वा भएन त्यता तर्फ ध्यान दिनु पर्ने अधिकारीले स्पस्ट पारे । “यहि समाजमा उठेको पैसा यहि समाजको बृहत्तर हितको लागि स्थानान्तरण भएको छ” उनले आफ्नो विचार व्यक्त गरे ।