नेपाली समाज टेक्सासका उम्मेदवारहरु बीच डिसेम्बर २१ बिहिबार सार्बजनिक बहस हुने

डालस, डिसेम्बर २० । नेपालीहरुका परदेशमा स्थापित स्थानीय संगठनहरुमा नेपाली समाज टेक्सास अत्यन्त सक्रिय संस्था हो । १९९८ मा स्थापना भए पछि यसले धेरै सिंढीहरु चढेको छ । डालसमा अहिले नेपालीहरुको उल्लेख्य संख्या छ । संगठनको उद्देस्य र दयारा पनि फराकिलो हुँदै गएको छ । संगसंगै यसमा रहेर समाजमा केहि गर्न चाहनेहरुको पनि संख्या बढ्दै छ ।
हरेक दुइ बर्षमा नयाँ कार्यसमिति आउंछ । २०१५ को अन्त्यतिर आएको कार्यसमिति अब बिदा हुँदैछ । त्यसको लागि २३ डिसेम्बरमा नयाँ कार्यसमितिको निर्बाचन घोषणा गरिएको छ । घोषणा संगै अध्यक्ष, महासचिव र सदस्यहरुको लागि निर्बाचन हुँदैछ । अध्यक्षमा निबर्तमान हुनै लागेको कार्यसमितिका उपाध्यक्ष कमल सापकोटा र सह-कोशाध्यक्ष सुमन थापा प्रत्याशी छन् भने महासचिवमा अहिलेका महासचिव कमल सत्याल र बब (भक्त) भण्डारीले प्रतिष्पर्धा गर्दैछन् ।
त्यस्तै उपाध्यक्षमा वर्तमान कार्यसमितिका कोषाध्यक्ष दिवश थापा उपाध्यक्षमा सर्बसम्मत निर्बाचित भैसकेका छन् । अमित शर्मा सह-कोषाध्यक्ष, युवा तथा बिद्यार्थी संयोजकमा बिमला श्रद्धा श्रेष्ठ र महिला संयोजकमा आइषा ओझा पनि निर्बाचित भैसकेका छन् ।
अध्यक्षहरु र महासचिव बीच सार्बजनिक बहस हुने
नेपाली समाज टेक्सासको आयोजनामा भोलि अर्थात् डिसेम्बर २१ बिहिबार अपरान्ह ५ बजेदेखि एक सार्बजनिक बहस हुने भएको छ । गैर आबासीय नेपाली संघ अमेरिकाका मिडिया संयोजक बाल जोशीले संचालन गर्ने उक्त बहसमा उम्मेदवारहरुले आफ्नो भावी योजना प्रस्तुत गर्नुका साथै सहभागीहरुले सिधै उनीहरुलाई प्रश्न समेत गर्न सक्नेछन । यसले पनि उम्मेदवारहरुको योग्यता, क्षमता र समाजमा उनीहरुले गरेको योगदान बारेमा थाहा पाउन र उनीहरुको बारेमा धारणा बनाउन मद्धत मिल्ने बिस्वास गरिएको छ ।

बहस र त्यसको औचित्य
नेपाली समाजमा हुने गरेका बहसले मतदातालाई कत्तिको असर वा प्रभावित गरेको छ भनेर भन्न सकिने अवस्था पक्कै छैन । कसैले पैसा तिरेर बनाइदिएका सदस्यहरुले आफ्नो प्यानलको बार छिचोलेर मतदान कतिले गर्छन त्यो पनि अस्पस्ट छ । ग्रुप र प्यानलमा विभाजित त्यस्ता उम्मेद्वारहरुले बिना योग्यता, क्षमता र अनुभव यस्ता पदहरुमा बाजी मार्ने गरेको उदाहरण हामी संग प्रसस्तै छन् ।
पक्कै पनि यो अवसर सचेत मतदाताहरुको लागि सुबर्ण अवसर हो । उनीहरुले आफुले भोट गर्न लागेका उम्मेदवारहरु कति पानीमा छन् भन्ने थाहा पाउने यो अत्यन्त सहि समय हो । उनीहरुलाई प्रश्न गरेर उनीहरुका आगामी दिनका योजनाहरु मतदाताहरुले जान्न सक्छन ।
तर नेपालीहरुका निर्बाचनहरुमा यो फर्मुला प्रयोग भएको पाइदैन । बनाइएका र पहिल्यै अन्य कुराबाट विभाजित मतदाताहरुले उम्मेदवारहरुको कुरा सुनेर मत बदल्ने सम्भावना निकै न्यून रहन्छ । स्वतन्त्र भन्दा गुटमा विभाजित नेपाली समाजमा यस्ता बहसहरूले खासै अर्थ नराखे पनि उम्मेदवारहरुका आफ्ना धारणाहरु आम मतदाता सामु प्रस्तुत गर्न भने यो अत्यन्त उपयुक्त माध्यम हो ।