के के हुँदैछ डालसमा हुने नेपाली अमेरिकन कन्भेन्सनको ३ दिने सम्मेलनमा

डालस, जुन २८ । नेपाली समाज टेक्सासको सहयोगमा एफ वान ग्रुपद्वारा आयोजना हुन लागेको नेपाली अमेरिकन कन्भेन्सन आउन दुइ दिन बाँकी छ । यो आगामी जुन ३० देखि जुलाई २ सम्म डालस नजिकैको शहर कोपेलमा अबस्थित फोर पोइन्ट्स बाइ शेराटनमा सम्पन्न हुँदैछ । यो तीन दिने कार्यक्रमको पहिलो दिन जुन ३० सुक्रबार उद्घाटन समारोहबाट शुरु हुनेछ । उक्त समारोहमा अमेरिकाको बिभिन्न राज्यबाट खेलकुदमा भाग लिन आएका सयौं खेलाडी सहित करिब एक हजार जनाको उपस्थिति रहने अनुमान गरिएको छ ।
एफ वान ग्रुपले २०१६ सालमा लस एञ्जलसमा पहिलो सम्मेलन सम्पन्न गरेको थियो । यो बर्ष खेलकुदमा महिला भलिबल र बास्केटबलको समेत खेल समाबेस गरिएकोले महिला सहभागिता बढ्न अनुमान छ । साना साना बालबालिकाहरु पनि फुटबल र बास्केटबल खेलहरु खेल्नेछन ।

केके हुँदैछन त कार्यक्रमहरु :
जुन ३० सुक्रबार
३ बजे दिउसो हुने उद्घाटन समारोहको समाप्ति पछि बिशेष सांस्कृतिक कार्यक्रम सम्पन्न हुँदैछ । उक्त सांस्कृतिक कार्यक्रममा स्थानिय र नेपालका रास्ट्रिय कलाकारहरुको प्रस्तुति रहनेछ । सांस्कृतिक कार्यक्रमको पहिलो चरण स्थानीय ब्याण्डहरु र कलाकारहरुको प्रस्तुतिले गुन्जायमान हुनेछ भने दोश्रो चरणमा नलिन चित्रकार, प्रियंका कार्की, सन्दिप छेत्री, बिबेक श्रेष्ठ, माम्फी घोष, समिर आचार्य, क्यालिफोर्नियाका प्रार्थना र भबिशाको नृत्य, लोक गीत गायक दिनेश थापा, शान्ति सुनार, र नबिन पौडेलको धमाकेदार प्रस्तुतिहरु रहनेछन । यो कार्यक्रमको संचालन सन्दिप छेत्री, माम्फी घोष र श्रद्दा श्रेष्ठले गर्नेछन । यस्ता सांस्कृतिक कार्यक्रममा भाग लिन १० बर्ष मुनिका बालबालिकाहरुको लागि निशुल्क छ भने बिद्यार्थी र कन्भेन्सनका खेलहरुमा सहभागी खेलाडीहरुलाई ५०% छुट दिइएको छ ।
यो सम्मेलनको अर्को सबल पक्ष के हो भने दिनभरको थकान मेट्न र रमाइलो गर्न सबै कार्यक्रमहरुको समाप्ति पश्चात डिजे नाइट संचालन गरिनेछ । डालस वरपर सक्रिय ८ जना डिजेहरुको धमाकेदार सांगीतिक माहोलमा रमाइलो गर्न प्रवेश शुल्क भने जम्मा $१० छ भने बिद्यार्थी र खेलाडीहरुले जम्मा $५ तिर्नु पर्नेछ ।

दोश्रो दिन शनिबार अर्थात् जुलाई १ गते पनि अर्को मेगा कन्सर्ट संचालन हुनेछ । जसमा युट्युबमा धमाका मच्चाइरहेका गायक स्वामी डी, बर्तिका राइको प्रस्तुति रहनेछ । त्यसअघि फिरोज श्यांगदेन र उनका ४ जना ब्याण्ड सदस्यहरुबाट एक घटना ३० मिनट लामो अविच्छिन्न प्रस्तुति दर्शक सामु पस्किनेछन ।

सम्मेलनको तेश्रो दिन २ जुलाई आइतबार साँझ ६:१५ देखि फेसन शो हुनेछ जसमा अमेरिकाभरबाट चुनिएका ८ जना मोडेलहरु प्रस्तुत हुनेछन । यो फेसन शो को कोरियोग्राफी प्रशिद्ध नेपाली नायिका प्रियंका कार्कीले गर्नेछिन भने उद्नी बुटिकले सबै फेसन डिजाइन गर्नेछ भने डिजाइनर खुस्बु डंगोल नेपालबाट यहि कामको लागि अमेरिकाको यात्रा गर्दैछिन ।
फेसन शो पछि समापन समारोह हुनेछ र लगत्तै सम्मेलनको अबधिभर खेलकुद वा अन्य प्रतियोगिताहरुका बिजयीहरुलाई पुरस्कार वितरण गरिनेछ । त्यसपछि सदा झैं बिहान २ बजे सम्म डालसका सुपरहिट डिजेहरुको धमाका प्रस्तुत हुँदैछ ।
त्यस्तै सम्मेलन अबधिको तीन दिन नै दिउसो ३ देखि ६ बजे सम्म नेपाली राजदुताबासका कर्मर्चारीहरुद्वारा नेपाली पासपोर्टको आबेदन लिने समेत व्यवस्था गरिएको छ । मेसिनले पढ्ने पासपोर्ट नलिएका वा पासपोर्टको अबधि सकिएका नेपाली नागरिकहरुका लागि आफ्नै दैलामा पासपोर्ट बनाउने अवसर समेत प्राप्त भएको छ । यस सेवाबाट थुप्रै नेपालीहरु लाभान्वित हुने अपेक्षा गरिएको छ ।
यी र यस्ता थुप्रै कार्यक्रमको साथमा हुन लागेको यो सम्मेलनले नेपाली युवा र नेपाली समुदायलाई अमेरिकामा चिनाउन र सक्रिय भूमिका निर्बाह गर्नेछ भन्ने कुरामा आशा राख्न सकिन्छ । हामी सबैको तर्फबाट यो सम्मेलनको सफलताको लागि सबैलाई शुभकामना ।