युएनए सम्मेलन सफल पार्न हामी सबै लाग्नु पर्छ: अध्यक्ष पासाङ्ग लामा

एक बर्ष अघि स्थापित युएनएले आगामी महिना अर्थात् मे २७,२८,२९ मा दोश्रो सम्मेलन गर्दै छ । सोहि क्रममा भैरहेका काम र संस्थाको समुदायसंगको अपेक्षा बारे अध्यक्ष पासांग लामाले एक बिज्ञप्ति प्रकाशित गर्नु भएको छ । बिज्ञप्ति जस्ताको तस्तै:

करिब एक बर्ष अघि युनाइटेड नेपालिज एसोसियसनको स्थापना भयो । स्थापनाको बेलामा जोश र जाँगर असाध्यै थियो । क्यालिफोर्नियामा युवाहरुले उत्साहपूर्ण तरिकाले पहिलो सम्मेलन सम्पन्न गर्न नेतृत्वदायी भूमिका खेले । अर्को बर्षको सम्मेलन डालसमा गर्ने भनेर हामीले त्यति बेलै घोषणा गरेका थियौं । थुप्रै परिस्थितिका कारण बिचमा हामी समुदाय संग अध्यावधिक हुन सकेनौं । तर अब त्यो स्थिति समाप्त भएको छ । आगामी मे महिनाको अन्तिम साता अर्थात मे २६,२७,२८ हाम्रो दोश्रो अधिबेशन हुँदैछ । त्यसको मिति केहि अगाडी नै प्रकाशित गरी सकिएको छ । मिति घोषणा संगै अहिले हामी तिब्र गतिमा त्यसको सम्पूर्ण स्वरुप र कार्यक्रमहरु तय गर्ने क्रममा छौं ।

नेपालीहरुका कतिपय संस्थाहरुमा अलि लफडा देखिन्छ । निहित स्वार्थमा काम गर्ने मान्छेहरु संस्थामा छिर्दा त्यस्तो अवस्था आउँछ । हामीले युएनए लाइ त्यो अवस्थाबाट अलि बाहिर राख्न चाहन्छौं । के हुन्छ भन्ने कुरा हेरेरै देखिने भए पनि त्यस्तो नहोस भन्नेमा हामी सचेत रहनेछौं । यो संस्थालाइ सबैको साझा र सम्मानित बनाउन हामीले हरसम्भव प्रयास पनि गर्ने छौं ।

यो संस्था खोल्नुको उद्देस्य कसैलाई भर्याङ्ग बनेर माथि पुर्याउन र कसैलाई धुलो चटाउन होइन । यसमा लाग्नेहरुको आफ्नै राम्रो वा नराम्रो कामको कारण उसले प्राप्त गर्ने नतिजा बाहेक ब्यकिगत रुपमा कसैलाई लाभ र हानिको बिषय यहाँ छैन ।

हाम्रो प्रथम अधिबेशनमा हामीले भनेका थियौं कि हामी परम्परागत तरिकाले जांदैनौ । अमेरिकामा रहेका नेपाली युबाहरुलाई भोलिको अमेरिकी समाजमा प्रतिष्पर्धा गर्न सक्ने क्षमता बिकासमा लाग्ने हाम्रो उद्देश्य हो । अनुशाशित,र सुसंस्कृत व्यक्ति मात्र भविस्यमा सफल र सम्मानिय हुन्छ । खेलकुदले मानिस अनुसाशित हुन्छ । त्यसैले हामी खेलकुदमा बिशेष जोड दिएका छौं । समय सापेक्ष फेसन शो, संस्कृतिको रक्षार्थ सांस्कृतिक कार्यक्रम पनि हाम्रा प्राथमिकतामा पर्छन । हाम्रो उद्देस्य अस्वस्थ प्रतिष्पर्धा गरेर दिन कटाउने होइन, राम्रो काम गरेर सक्षम, सफल र अनुसाशित युवा पुस्ता निर्माण गर्दै भविस्यको अमेरिकामा नेपालीहरुको सबल र सक्षम भविस्य निर्माणमा सहयोगी बन्नु हो ।

हामीले यो दिशामा धेरै काम गर्नु छ । तर हामी संग त्यसको लागि योजना त छैन नै, इच्छा शक्तिको पनि कमि छ । युएनएले त्यहि इच्छा शक्ति विकास गर्न पनि काम गर्छ । संघर्ष गरेर सफल भएका व्यक्तिहरुलाइ हाम्रा फोरमहरुमा बक्ताको रुपमा बोलाउने हामीले गत बर्ष देखि नै शुरु गरिसकेका छौं । यी र यस्ता थुप्रै काम गर्न कसैले पनि एक्लै सक्दैन । यसको लागि धेरै व्यक्तिको सहयोग, सद्भाव र सहभागिता जरुरि छ । बिना निहित स्वार्थ जो कसैले पनि यसमा सहभागिता जनाउन सक्छ । यसको एउटा अंश बन्न सक्छ । नयाँ विचार र नयाँ योजना लिएर आउनेहरुको लागि युएनएको ढोका संधै खुल्ला छ । जाति, लिङ्ग, उमेर, आर्थिक अवस्था वा अध्यागमनको अबस्थाले कुनै फरक पार्दैन । यो सबैको संस्था हो । सबै नेपालीहरुले त्यो अनुभूत गर्न के गर्न आबस्यक छ, हामी त्यसको लागि हरदम तयार छौं ।

आफुलाई समुदायको सेवामा समर्पित गर्न चाहने जो कोहि पनि आजै देखि हाम्रो सम्पर्कमा आउन सक्नु हुन्छ । हाम्रा गतिबिधिबारे जानकारी लिन हाम्रो फेसबुक पेज युएनए कन्भेन्सन २०१७ लाइक गर्न सक्नुहुन्छ । त्यस्तै युएनए कन्भेन्सन डट ओआरजी मा यात्रा गरेर पनि सूचना प्राप्त गर्न सक्नुहुन्छ । फेरी पनि गत बर्षको सहयोगको लागि हृदय देखि धन्यवाद दिंदै आउँदो अधिबेशन सफल पार्न सबै नेपाली दाजुभाई दिदीबहिनीहरुको सहयोगको लागि अपिल गर्न चाहन्छु ।
पासाङ्ग लामा अध्यक्ष, युनाइटेड नेपालिज एसोसियसन