पाल्पाका साठी प्रतिशत विद्यालयमा व्यवस्थापन समिति
रामपुर (पाल्पा), २७ माघ । शिक्षा ऐनको पछिल्लो संशोधनको प्रावधानसँगै पाल्पाका ६० प्रतिशत जति विद्यालयमा विद्यालय व्यवस्थापन समिति गठन गरिएको छ ।
जिल्लामा सञ्चालित चारसय ४६ सामुदायिक विद्यालयमध्ये हालसम्म कार्यालयको तथ्याङ्कअनुसार दुईसय ५६ वटा विद्यालयमा मात्र समिति गठन भएको जिल्ला शिक्षा कार्यालय पाल्पाका प्राविधिक सहायक चुरामणि मरासिनीले बताउनुभयो ।
जिल्लाका १८ वटा स्रोतकेन्द्रमध्ये गाडाँकोट, रिङ्गनेरह र झडेवा स्रोतकेन्द्रका सबै विद्यालयमा मात्र नयाँ विद्यालय व्यवस्थापन समिति गठन भइसकेको उहाँले बताउनुभयो । तोकिएको समय नजिकै आउँदा विद्यालय व्यवस्थापन समिति गठन गर्न बाँकी रहेका विद्यालयमा अझै पनि राजनैतिक दलको चलखेलले समिति गठन प्रक्रिया अन्यौलमा परेको छ ।
जिल्ला शिक्षा कार्यालयले माघ मसान्तभित्र जिल्लाका सामुदायिक विद्यालयमा नयाँ संशोधित ऐनअनुसार विद्यालय व्यवस्थापन समिति गठन गर्न दिएपनि राजनैतिक दलका कारण विद्यालयमा समिति गठन हुन नसकेको हो । जिल्लामा चारसय ४६ सामुदायिक र ५० संस्थागत गरी चार ९६ विद्यालय संचालनमा छन् ।
तीनसय एक ज्येष्ठ नागरिकलाई परिचयपत्र
यसैबीच, पाल्पाका तीनसय एकजना ज्येष्ठ नागरिकलाई परिचयपत्र वितरण गरिएको छ । महिला तथा बालबालिका कार्यालय पाल्पाले हालसम्म एकसय ४५ जना महिला र एकसय ५६ जना पुरुषलाई ज्येष्ठ नागरिकको परिचयपत्र वितरण गरेको कार्यालय प्रमुख तुलसा अर्यालले बताउनुभयो ।
कार्यालयले जिल्लाका ६० वर्ष उमेर पुगेका ज्येष्ठ नागरिकलाई गत असोजदेखि परिचयपत्र वितरण कार्य सुरु गरेको हो । नेपाल सरकारले ६० वर्ष उमेर पुगेका महिला, एकल महिला, दलित व्यक्तिलाई मासिक रु एक हजार, ७० वर्ष उमेर पुगेका पुरुषलाई मासिक रु एक हजार प्रोत्साहनस्वरुप वृद्धभत्ता वितरण गर्दै आएको रामपुर नगरपालिकाका सामाजिक परिचालक गीता पौडेलले बताउनुभयो । रासस
