स्थानीय तह पुनसंरचनाःमङ्सिरसम्म प्रतिवेदन बुझाइने
काठमाडौँ, २३ मङ्सिर । स्थानीय तह पुनःसंरचना आयोगले यही मङ्सिर मसान्तसम्म आफ्नो प्रतिवेदन सरकारलाई बुझाउने भएको छ ।
प्रदेश नं २ का चार जिल्लाका सांसदसँग गाउँपालिका एवम् नगरपालिकाको पुनःसंरचनाका विषयमा छलफल गरेपछि आयोगले आज सो जानकारी दिएको हो । बारा, रौतहट, महोत्तरी र सप्तरीका सांसदसँग आज आयोग कार्यालयमा छलफल गरिएको प्रवक्ता डा हरि पौडेलले जानकारी दिनुभयो ।
ती जिल्लामा मधेसकेन्द्रित दलको विरोधका कारण स्थानीय तहको पुनःसंरचनाका बारेमा गृहकार्य हुन नसकेपछि जिल्ला प्राविधिक सहयोग समितिले पठाएको प्रतिवेदनका आधारमा सांसदसँग अन्तक्र्रिया गरिएको हो । “स्थानीय विकास अधिकारीको संयोजकत्वमा रहेको प्राविधिक समितिले जिल्लामा गरेका काम र केन्द्रमा आयोगले गरेको अध्ययनलाई अन्तिम रुप दिन जनप्रतिनिधिसँग छलफल गरिएको हो, काम सकेर यो महिनाको अन्तिमसम्म सरकारलाई प्रतिवेदन बुझाउने तयारीमा छौँ”, उहाँले भन्नुभयो । 
छलफलमा नेपाली काँग्रेस, नेकपा (एमाले) र नेकपा (माओवादी केन्द्र) का सांसद उपस्थित भए पनि मधेसकेन्द्रित दलका सांसद अनुपस्थित रहेको महोत्तरीका सांसद लालेन्द्र मण्डलले राससलाई जानकारी दिनुभयो । आयोगमा ६८ जिल्लाको प्रतिवेदन आए पनि २ नं प्रदेशका आठ जिल्लाको प्रतिवेदन आएको छैन । आयोगले बुधबार २ नं प्रदेशका अन्य चार जिल्लाका सांसदसँग छलफल गरेको थियो । रासस
