नेपाली अमेरिकन दोश्रो सम्मेलनबारे अन्तरक्रिया : कुलमान घिसिङ्ग प्रमुख अतिथी
डालस, जुन ११, आइतबार । आज नेपाली समाज टेक्सासको सभा कक्षमा एक अन्तरक्रिया कार्यक्रम सम्पन्न भयो । डालसमा यहि महिनाको अन्त्यमा एफवान ग्रुपद्वारा आयोजना हुन लागेको नेपाली अमेरिकन कन्भेन्सन कसरी भब्य र सभ्य रुपमा सम्पन गर्न सकिन्छ र केकस्ता अतिरिक्त कार्यक्रमहरु गर्दा युवा र नेपाली समुदाय लाभान्वित हुनसक्छ भन्ने बिषयमा उक्त अन्तरक्रिया आयोजना गरिएको थियो । सम्मेलन तयारी समितिका संयोजक तथा नेपाली समाज टेक्सासका महासचिव कमल सत्यालले अन्तरक्रियाको शुरुवात गर्दै सम्मेलनको उद्देश्य र समुदायको अपेक्षा बारे आफ्नो धारणा र अहिले सम्म भैरहेका गतिबिधि बारे जानकारी गराउनु भएको थियो ।
कुलमान घिसिङ्ग प्रमुख अतिथि
संयोजक कमल सत्यालका अनुसार उक्त कार्यक्रममा नेपाल बिधुत प्राधिकरणका प्रमुख कुलमान घिसिङ्ग आउने हुनु भएको छ । लामो समय देखि नेपाल अधिराज्यभरि जारी बिधुतभार कटौती बन्द गरेर वाहिवाही पाउन सफल घिसिङ्गको उपस्थितिले सम्मेलन फलदायी हुने समेत आयोजकहरुको अपेक्षा छ । त्यस्तै यो सम्मेलन युवाहरुद्वारा, युवाहरुको लागि र युवाहरुमा नै समर्पित रहेकोले खेलकुद, हिज्जे प्रतियोगिता, बक्तृत्वकला, निबन्ध लेखन प्रतियोगिता लगायत कार्यक्रमहरु राखिएका छन् । खेलकुदहरुमा फुटबल, भलिबल. गल्फ, बास्केटबल लगायत छन् ।
उद्घाटन तथा अन्य सामाजिक फोरमहरुमा निशुल्क प्रवेश पाइने
सत्यालका अनुसार उद्घाटन जुन ३०मा हुनेछ । उद्घाटन समारोह, सामाजिक फोरमहरु, बालबालिकाका कार्यक्रमहरु निसुल्क प्रवेशको व्यवस्था गरिएको छ । मनोरंजन र फेसन शोमा मात्र शुल्क तिर्नु पर्नेछ भने एफ वान ग्रुपको आयोजनामा सम्मेलन हुन लागेकोले एफ वान स्टाटस भएकाहरुलाई आधा सुल्क छुट दिइएको छ । डिजे नाइटको टिकेट शुल्क जम्मा १० रहेको छ । अन्य कार्यक्रमहरुको बिस्तृत आउने क्रम जारी छ ।
उक्त अबसरमा डालस वरपरका पत्रकारहरु, सामाजिक संस्थाका प्रमुखहरु, सम्मेलन संचालन गर्न निर्मित बिभिन्न फाँटका संयोजकहरु र सर्बसाधारणहरुको समेत उपस्थिति थियो ।
