नेपाल जर्नी हामी सबैको हो : मौसमी श्रेष्ठ
नेपाल जर्नीको बारेमा केहि भन्दिनुस न !
नेपाल जर्नी अमेरिकाको डालसमा २०१५ मा स्थापित गैर नाफामुखी संस्था हो। नेपालमा रहेका शिक्षा र स्वास्थ्यमा पहुँच पाउन नसकेका बालबालिकाहरुको लागि सहयोग गर्ने यसको उद्देस्य हो। सिमित साधन र श्रोतको अधिकतम उपयोग गर्दै जति सकिन्छ त्यहि बालबालिकाहरुको भबिस्य उज्ज्वल बनाउने हाम्रो लक्ष हो।
संस्था भर्खरै स्थापना भएको रहेछ। यसको स्थापनाको पृष्ठभूमि भन्दिनुस न !
गत साल नेपालमा ठुलो विनासकारी भुकम्प गयो। भुकम्प जाँदा म नेपालमा नै थिएँ। काठमाडौँको एउटा घरको पाँचौं तल्लामा। तर संयोगबस हामी बाचियो। त्यसै दिन हामी धरहरा चढ्न जाने भनेका थियौं। अर्को बिशेष कामले जान पाइएन। जसले गर्दा पनि बाँच्न सफल भैयो। त्यसपछि अमेरिका आउने बेलामा मेरो मनमा एउटा विचार पलायो। हाम्रो त यो नाफाको जिन्दगि हो, अरुको लागि किन केहि नगर्ने ? शायद भगवानले हामीलाई अरुको लागि केहि गर भनेर जिन्दगि पो दिनु भएको हो कि जस्तो लाग्यो। अमेरिका फर्के पछि आफ्नै पहलमा केहि सहयोग पठाउने काम गरियो। त्यस पछि गर्नु पर्ने धेरै देखियो। एक्लैले सबै गर्न सकिन्न। अरु सहयोगी हातहरु भए पनि अरु धेरै गर्न सकिन्छ भन्ने लागेर पोहोर साल यहीं नेपाल जर्नी भनेर संस्था स्थापना गर्यौं।
नेपाल जर्नीको टीममा को को हुनुहुन्छ ?
म लगायत बद्रि श्रेष्ठ, अन्जली मल्ल, इन्दिरा वाग्ले, सावन श्रेष्ठ, प्रेम आचार्य (जापान), माया शर्मा (सान फ्रान्सिस्को), हरिशंकर सुबेदी, प्रकाश सिग्देल(मेडिया संयोजक) र बिक्की पुलामी खडग (न्यु योर्क संयोजक), अर्जुन कटुवाल (बेलायत), दिनेश श्रेष्ठ (कतार), स्वयम्भु पुडासैनी (कोरिया), ऋषिराम कंडेल (जापान), सबिन श्रेष्ठ(अस्ट्रेलिया), दिनेश लम्साल (आइटी कोअर्डिनेटर), किरण पन्थ (म्यारील्याण्ड) लगायतका हाम्रो टीममा छौं। नेपालबाट सरस्वति रिजाल, मुरली प्रसाद गजुरेल, नरेन्द्र श्रेष्ठ, विजयराज सिग्देलले नेतृत्व गर्दै हुनुन्छ यो संस्थाको उद्देश्य पुरा गर्न हामी अरु धेरै समाजसेवीहरु सामबेश हुनुहुन्छ बिस्तारै भन्नेमा हामी बिस्वस्त छौं।
यो त मौसमीको निजि एनजीओ हो भनेको मैले सुने कतिपय समुदायका जिम्मेवार ब्यतिहरुबाट। यो तपाईंको निजि हो ?
(हाँस्दै) निजि पनि संस्था हुन्छ र ? एक्लै धेरै काम गर्न सकिएन भनेर संस्था खोलेको हो नि । यसमा अरु पनि सदस्यहरु हुनुहुन्छ। यसलाई बिस्वब्यापी बनाउने लक्ष छ। अहिले सानो टीम र डालस क्षेत्रमा म अलि सक्रिय भएकोले कसैलाई त्यस्तो लागेको हुनसक्छ। मेरो श्रीमान पनि यसमा हुनुहुन्छ, त्यसैले पनि त्यस्तो लागेको होला। तर संस्थाको स्थापनाको समयमा जो सक्रिय भएर लागे, सहयोग गरे उनीहरुको नाम त आइहाल्दो रहेछ। मैले सकेसम्म नेपाल जर्नी नै अगाडी आओस भन्ने चाहन्छु। यो संस्था हो, यसमा मान्छे आउने जाने हुन्छ। अहिले मेरो ठाउँमा अर्को बर्ष अर्कै हुन सक्छ। त्यसैले म तपाईं मार्फत यो स्पस्ट पार्न चाहन्छु कि यो निजि होइन।
नेपाल जर्नी के गर्दैछ त अहिले ?
केहि दिन अघि चितवनमा बिध्युतिय पुस्तकालय निर्माण सम्पन्न भएर गैर आवाशीय नेपाली संघका अध्यक्ष डाक्टर शेष घलेले उद्घाटन गर्नु भयो। चितवन कै कान्दामा अर्को पुस्तकालय तयार हुँदैछ। अस्ति भर्खर अनिल लामा जो पारिबारिक अबस्थाको कारण पैसा तिर्न नसकेर पढाई छोड्नु पर्ने अबस्थामा पुगेका थिए, उनलाई पैसा पठाएर उनको अध्ययनलाइ निरन्तरता दिन सहयोग गरियो। त्यसै गरी केहि समय अघि चितवनमा बाबुआमाले छोडेर गएपछि अलपत्र परेका दुइ बालबालिकालाई आवाशीय शिक्षाको समेत व्यवस्था गरेका छौं । अब २०१७ को लागि हेटौडामा पुस्तकालय निर्माण गर्दै छौं। त्यसको लागि चाहिने आर्थिक श्रोत जुटाउने तयारी गर्दै छौं।
लागत के छ र के गर्दै हुनुहुन्छ श्रोत जुटाउन ?
लागत ३० लाख नेपाली रुपैयाँ लाग्ने अनुमान छ। बिभिन्न व्यक्तिहरुसंग सहयोगको लागि आग्रह गरिंदै छ । त्यस्तै मुख्य कुरा आगामी डिसेम्बर १० गते एउटा फन्ड रेज डिनर तथा बिसेष संस्कृतक कार्यक्रम गर्दैछौं । त्यस दिन हाम्रो संस्थाको बर्षगांठ पनि हो । उक्त कार्यक्रममा जापानबाट भवन भट्ट आउंदै हुनुहुन्छ। त्यस्तै एनआरएन कोरियाका अध्यक्ष राजु छेत्री, न्यु योर्कबाट सोनाम लामा , एनआरएन अमेरिकाका अध्यक्ष डाक्टर केशब पौडेल, क्यालिफोर्निया बाट पूर्ण बानियाँआउंदै हुनुहुन्छ । स्थानिय संस्थाका सम्पूर्ण प्रतिनिधिहरु पनि आउंदै हुनुहुन्छ। यसमा नेपाली समाज टेक्सासले पनि सहकार्य गरेको छ। त्यस्तै सांगीतिक कार्यक्रम स्थानीय गायकहरु भिम चापागाईं र भिम थापाको साथमा हुँदैछ। त्यसबाहेक अरु कलाकारहरु पनि प्रस्तुत गर्ने हाम्रो चाहना छ। लाग्छ, उक्त कार्यक्रमले हाम्रो पुस्तकालय बनाउने चाहना पूर्ण गर्ने छ।
अन्त्यमा केहि भन्नु छ कि ?
भन्नु यत्ति छ, यो मेरो वा कसैको निजि होइन। यो समाजसेवा गर्ने, पढ्न नपाएका बच्चाहरुलाई पढाउने भनेर खोलेको संस्था हो। हामीलाई डालस क्षेत्रमा राम्रो टीमको खाँचो छ। आउनुहोस, सबै मिलेर गरौँ। जति सकिन्छ त्यति गरौँ। नेपाल जर्नीलाइ अरु धेरै परियोजनामा काम गर्न सक्ने संस्था बनाउँ। यो काम न मैले एक्लै गर्न सक्छु न अरु कुनैले। जति धेरै मिलेर गर्यो त्यति धेरै गर्न सकिन्छ। सुझाव र प्रतिक्रिया दिंदै गर्नुहोला। बाँकी हाम्रो कुरा डिसेम्बर १० को कार्यक्रममा स्पस्ट पार्ने प्रयत्न गर्ने छौं।
