रास्ट्रपति ट्रंपले सत्ताको दुरुपयोग गरेको डेमोक्र्याटहरुको निस्कर्ष
वाशिंगटन डिसी, अमेरिका । बिगत २ महिना भन्दा बढी देखि शुरु भएको रास्ट्रपति ट्रंप बिरुद्धको महाअभियोग छानबिन तेश्रो चरणमा प्रवेश गरेको छ । हाउस इन्टेलिजेन्स कमिटिले आफ्नो रिपोर्ट सार्बजनिक गर्दै रास्ट्रपति ट्रंपले आफ्नो पदको दुरुपयोग गरेको औपचारिक आरोप लगाउंदै जुडिसिएरी कमिटिमा पठाएको छ । ३०० पेज लामो उक्त प्रतिबेदनमा बिगत दुइ महिना देखिका गोप्य सुनुवाई, सार्बजनिक सुनुवाई लगायत प्राप्त प्रमाणहरुको सुक्ष्म मुल्यांकन गर्दै उक्त निष्कर्ष सहित जुडिसिएरी कमिटीमा पठाइने भएको छ ।
अब जुडिसिएरी कमिटीले औपचारिक रुपमा महाअभियोगको प्रस्ताव तल्लो सदनको पूर्ण सभामा प्रस्तुत गर्नेछ । ३०० पेज लामो उक्त प्रतिबेदनले जुलाई २५ २०१९ मा ट्रंप र युक्रेनी रास्ट्रपति जेलेंस्की बिचको बार्तालाइ पदिय दुरुपयोगको प्रमुख आधार मानेको छ भने बिभिन्न व्यक्तिहरुको सार्बजनिक सुनुवाई एबम अन्य श्रोतहरुबाट प्राप्त सुचानाहरुले त्यसको पुस्टि गरेको निष्कर्ष निकालिएको छ । ट्रंपको उक्त फोन कलमा युक्रेनी रास्ट्रपतिलाइ “तर मलाई सहयोग गर्नुस” भन्दै त्यसपछि २०२० को निर्बाचनमा आफ्नो प्रतिद्वन्दी हुने सम्भावना भएका डेमोक्र्याटिक रास्ट्रपतिय उम्मेदवार जो बाइडेन र उनका पुत्रले काम गरेका बुरिस्मा नामक इनर्जी कम्पनीमाथि छानबिन गर्न अनुरोध गरेका थिए । उनले उक्त कल गर्नु अघि कांग्रेसले युक्रेनलाइ दिन छुट्टाएको करिव ४०० मिलियन डलर रकम स्थगित गरेका थिए । उनका व्यक्तिगत कानुनी परामर्शदाता रुडी जुलियानीलाइ यो कामको लागि ट्रंपले खटाएका थिए । यो सबै कुरा सार्बजनिक व्हिस्टलब्लोवरले फाइल गरेको गुनासको छानबिन गर्ने क्रममा पत्ता लागेको हो ।
अब जुडिसिएरी कमिटिले आफ्नै तरिकाले सुनवाई गर्दै डिसेम्बर २५ भित्रै काम सक्नेछ भने क्रिश्मस अघि नै रास्ट्रपति ट्रंपमाथि महाअभियोग लगाउन आबस्यक प्रक्रिया सम्पन्न गर्ने तालिका सार्बजनिक गरिसकेको छ । परिस्थिति हेर्दा ट्रंपमाथि महाअभियोग लाग्ने निश्चित प्राय देखिन्छ भने इतिहासमा महाअभियोग लाग्ने चौथो रास्ट्रपतिमा समेत उनको नाम दर्ज हुनेछ ।