एनआरएनको सदस्य मात्रै बन्नु पनि गौरवको कुरा हो : भानु खरेल
January 29, 2019 | 10:30 am
करिव डेढ बर्ष भयो च्याप्टरमा काम गर्न थालेको । कमसेकम हप्ताका दुइ दिन एनआरएन र नेपाली समुदायको लागि समय दिएको छु । परिवारमा पर्ने जन्मदिन बाहेक अरु कुनै घरको काममा यी दुइ दिन गर्न पाइन्न । कहिले ह्युस्टन, कहिले अस्टिन, कहिले स्थानीय कार्यक्रम, कहिले कसैका समस्याहरु आदि इत्यादि नै मेरा दिनचर्या हुन् । सनिबार र आइतबार बाहेक अन्य दिन पनि मर्दा पर्दा अप्ठेरो पर्दा म उपलब्ध हुने गरेको छु ।
म लामो समय देखि सामाजिक कार्यहरुमा संलग्न हुँदै आएको छु । जर्जियाको एट्लाण्टा देखि डालससम्म कुनै न कुनै रुपमा सक्रिय रहेको छु । डालस आए पछि पनि बिभिन्न संस्थाहरुमा काम गर्ने अवसर मिल्यो । नेपाली समाज टेक्सासका थुप्रै परियोजनाहरुमा काम गरें यद्यपि म त्यहाँ कुनै पदमा थिइन, छैन । बिगतको एनआरएनको निर्बाचनमा धेरै साथीहरुको आग्रह र अलि बृहत समाजको प्रतिनिधित्व गर्ने आफ्नै चाहनाको कारण टेक्सास च्याप्टरको जिम्मेवारी लिन अगाडी सरेको थिएँ । जिम्मेवारी पनि प्राप्त भयो ।
यो बिचमा केहि उल्लेख्य कामहरु हामीले गर्यौं । बिशेष गरी संस्थालाई संस्थागत गर्ने दिशामा हामीले केहि ठोस कामहरु गरेका छौं । ह्युस्टन देखि अस्टिनसम्मको नेपाली समाज समेटेर कार्यसमिति निर्माण हाम्रो पहिलो काम थियो । त्यसपछि यो समयमा हामीले केहि उल्लेख्य काम गरेका छौं । जब फेयर महिला संयोजकको नेतृत्वमा सम्पन्न गर्यौं । एनआरएन को हेल्प डेस्कको शुरुवात, नेपाली नागरिकता र नेपालमा लगानी सम्बन्धि अन्तरक्रिया, नेपालका पुर्ब प्रधानमन्त्रीसंग आर्थिक नीति र एनआरएन ले नेपालमा गर्ने लगानी सम्बन्धि अन्तरक्रिया, नेपालका पररास्ट्र मन्त्रीसंग अन्तरक्रिया, महावीर पुनको आविस्कार केन्द्र निर्माणमा ४ हजार डलर संकलन गरेर सहयोग गरेका छौं ।
त्यस्तै गरी २०१७ मा गएको हुरिकेन हार्भीमा प्रभावित नेपाली परिवारलाई ८ हजार डलर सहयोग, नेपाली भाषामा चालक प्रमाण पत्र लिन सक्ने व्यवस्था मिलाउन टेक्सास राज्यका सेक्रेटरी अफ स्टेटसंग भेटघाट गरेर नेपाली भाषालाई टेक्सास राज्यमा आधिकारिक भाषाको मान्यता दिलाउन प्रयत्न गर्यौं । सायद छिट्टै त्यो प्रक्रिया समेत टुंगोमा पुग्नेछ । यस बाहेक स्थानीय रुपमा आइपर्ने बिरामी हुँदा, मृत्यु हुँदा लगायतका समस्याहरुमा दिलोज्यानले सहयोग गरेका छौं । सायद हाम्रो अधिकार क्षेत्र भित्र रहेर र मौजुदा संगठनको ढांचा र हैसियत हेर्दा हामीले छोटो समयमा धेरै काम गरेको अनुभूति गरेका छौं । संगसंगै हामीसंग गतिलो संगठन र नेटवर्क भएको खण्डमा अरु बढी गर्न सकिन्थ्यो भन्ने हामीलाई लाग्छ ।
एनआरएनको सदस्यता सम्बन्धमा
एनआरएन अमेरिका धेरै पुरानो संस्था होइन । शुरुशुरुमा कोठाबाट यो चल्यो । अहिले बिस्तारै बाहिर निस्किन खोजेको छ । तर यसको विकास र विस्तार जुन रुपमा हुनु पर्ने हो त्यो भने हुन सकेको छैन । यसको मुख्य कारण भिजन सहितको इमान्दार नेतृत्वको अभाव नै हो । संस्थालाई आफ्नो पकडबाट बाहिर जाला कि भनेर बास्तविक प्रबासी नेपालीहरुमा यसको विस्तार गर्ने तरिकाले कार्यक्रमहरु ल्याइएन । सदस्यता निर्माणलाई खालि निर्बाचनको प्रयोजनको लागि मात्र उपयोग गरियो । यहाँसम्म कि फर्जी मत समेत निर्माण गर्ने र त्यसैको आधारमा पदको बार्गेनिङ्ग गर्ने कामहरु समेत भए ।
पक्कै पनि निर्बाचन नै नेतृत्व चुन्ने उपयुक्त प्रक्रिया हो तर त्यसमा शुद्ध तरिकाले काम गरिएन । धेरै सहि निबेदनहरु अस्विकार गरिए भने धेरै फर्जी बनाइए भन्ने आरोप समेत संस्थाले खेप्नु पर्यो । सानातिना कुराहरुमा चित्त नबुझ्दा अदालत जाने स्वार्थी प्रवृतिले पनि संस्थालाई धेरै बदनाम बनायो र मान्छेहरुले सदस्यता किन लिने भन्ने प्रश्न गर्ने ठाउँ बनाइयो ।
यसका बाबजुद अहिले परिस्थिति बिस्तारै सुध्रेको छ । एनआरएन एउटा अन्तररास्ट्रिय आन्दोलन हो । यसको सदस्य हुनु गरिमाको कुरा पनि हो । हाम्रा सहि आवाजहरु बुलन्द गर्ने राम्रो प्लेटफर्म यो बन्न सक्छ । आफ्ना राम्रा भिजनहरु अमेरिकाका नेपाली र नेपालका नेपाली सामु पुर्याउन यो संस्था सहयोगी बन्न सक्छ । यदि यसमा केहि फोहोर छ भने भित्र आएर मात्र सफा गर्न सकिन्छ । यो कसैको व्यक्तिगत सम्पत्ति होइन, हामी सम्पूर्ण प्रबासी नेपालीहरुको हो । त्यसैले यसको सदस्य बन्नु पहिलो शर्त हो ।
पहिले पहिले पैसा तिरिदिएर सदस्य बनाइन्थ्यो तर अहिले त्यस्तो छैन । अमेरिकामा बस्ने हामी सबै चेतनशील छौं र $२० तिर्न सक्ने हैसियतका छौं भन्ने मेरो बुझाइ छ । पैसा तिरेर सदस्य बन्दा संस्थाको माया लाग्छ, जिम्मेवार बनिन्छ । त्यसैले एनआरएनको सदस्यको रुपमा आफ्नो पूर्ण अधिकारको प्रयोग एबम सुबिधाहरुको उपयोगको लागि फेब्रुअरी १५ भित्र सदस्य बनौं । आफै सदस्य बने पछि ढुक्क संग राम्रो मान्छे चुनौं । त्यसरी बल्ल एनआरएन अघि बढ्छ, हाम्रो समाज अघि बढ्छ र हाम्रो समेत इज्जत बढ्छ ।
यसबाहेक पनि एनआरएन सदस्यहरुलाई होटेल, हवाई टिकेट आदिमा छुटको व्यवस्था हुने प्राबधान छलफलमा छ । प्रभावशाली अन्तररास्ट्रिय संस्थाको एक भाग बन्न पाउनु, अप्ठेरो पर्दा सजिलै सहयोग पाउने बाताबरण बन्नु र प्रत्यक्ष आर्थिक छुट हुने व्यवस्था हुन लागेको अबस्थामा पक्कै पनि धेरै नेपालीहरुले एनआरएन को सदस्यता लिने वा नबिकरण गर्नुहुनेछ भन्नेमा हामी आशाबादी छौं । यो संस्थाबाट के पाइन्छ भन्ने भन्दा पनि यो संस्थामा गएर नेपाल र नेपालीलाई के गर्न सकिन्छ भनेर सदस्य बन्ने यो अवसर पक्कै गुमाउनु हुने छैन भन्नेमा म ढुक्क छु ।
(एनआरएन अमेरिका टेक्सास च्याप्टर अध्यक्ष भानु खरेलसंगको सम्बादमा आधारित रहेर लेखनाथ गौतमद्वारा तयार गरिएको)
