डाक्टर केसीसंगको सहमतिमा सबैको जित भएको छ, हार घमण्डको

अन्तत: सरकार झुक्यो । आज नेपालबाट प्रकाशित हुने संचार माध्यमहरुको शिर्षक हो । डाक्टर गोविन्द केसीसंगको बार्ता सफल भए पछि र उनको अनसन तोडिने भए पछि धेरैले सरकार झुकेको विश्लेषण गरे । सामाजिक संजालमा पक्ष वा बिपक्षमा कुर्लनेहरु कोहि फेरी बुरुक्क उफ्रेर सरकार झुकेको अर्थ लगाउदैछन । अर्काथरी फेरी यो समाचारलाई आफ्नो अहँ तुस्टि हुने गरी अर्थ लगाउने नै छन् । घटनाको बास्तविकता नबुझेर बोल्ने धेरै मान्छे यस्तो अबस्थामा अप्ठेरोमा पर्ने गर्छन । भविस्यमा आउने अरु यस्ता मुद्धाहरुमा विचार पुर्याएर कुर्लनु पर्ने आबस्यकता यहि घटनाबाट बुझे भने त्यो उनीहरुको लागि अबस्य फाइदाजनक हुने नै छ ।

डाक्टर केसीसंग सरकारले सम्झ्यौता गर्नु नै थियो, गर्यो । डाक्टर केसीका माग सरकारले पुरा गर्ने पर्थ्यो, गर्यो । अलि ढिला गरेकोमा गुनासो गर्ने ठाउँ रहे पनि यसको लागि सरकारलाई हामी सबैले धन्यवाद दिनै पर्छ । केसीका मागहरु कुनै राजनीतिक दलले बोकेको आरोप लगाउंदै बसेर मात्र स्वास्थ्य क्षेत्रको बिकृतिको उपचार सम्भव थिएन । आफ्नो अनुकुल हुने गरी जो कसैले बोके पनि यो मुद्धा सबै नेपालीहरुको चासोको बिषय हो । समयमै केहि गरेको भए न त केसी सत्याग्रहमा जानु पर्थ्यो, न सरकार झुकेको अर्थ कसैले लगाउन पाउँथे न त सामाजिक संजालमा उफ्रिनेहरु नराम्रोसंग थेचारिने नै थिए ।
यो दुनियाँमा सबैको विचार मिल्न सक्दैन, यो ध्रुव सत्य कुरा हो । हामी आफै भित्र समेत ठुलो अन्तरविरोध रहेको हुन्छ । विचार नमिल्नु अत्यन्त स्वाभाविक कुरा हो । विचार पढाइ, बढाई र संगतले निर्माण हुन्छ । पढाई, बढाई र संगतको अन्तरले विचार पनि अन्तर हुन्छ । विचार मिल्नु राम्रो कुरा हो तर नमिल्दा पनि कुरा बुझ्यो भने आचार्य मान्नु पर्दैन । एक अर्काको बिचारमा सहिष्णु बन्नु र अर्काको बिचारको समेत कदर गर्नु अहिलेको आबस्यकता हो ।
पक्कै पनि केसीको मागमा दुवै तर्फबाट गर्न सकिने तर्कहरु थिए । तर तर्कको भाषा र प्रस्तुतिले गर्दा सामाजिक संजालहरु दुषित हुन पुगे । आफ्नै साथीभाई माथि अभद्र शब्दहरु प्रयोग गरिए । केसीका मागहरु पुरा हुँदा लगभग सबै नेपालीहरुको स्वास्थ्य चासोको सम्बोधन गर्ने दिशामा पहिलो पाइला हुने कुरामा अधिकांश नेपालीहरुले विश्वास राख्थे । त्यो समुहमा पक्कै पनि राजनीतिक रंग पोतेर लाभ लिन सकिन्छ भन्नेहरु पनि थिए ।

लेखक: लेखनाथ गौतम

वादविवादको त्यो खालमा अर्काथरी दुइ तिहाइको दम्भ बोकेर आएका थिए । यस्तै खाले समस्याका कारण नेपाली जनताले अहिलेको सरकारलाई दुइतिहाइ दिएका हुन् भन्ने उनीहरुले बिर्से । प्रजातन्त्रमा दुइ तिहाई होइन शत प्रतिशत ल्याउनेको कदम बिरुद्ध पनि बोल्न पाइन्छ भन्ने उनीहरुले हेक्का राखेनन् । सरकारले दुइ तिहाइ जनताको भलाइको लागि होइन सबै नेपाली जनताको भलाइमा काम गर्नु पर्छ भन्ने उनीहरुले ख्याल राखेनन् । सामाजिक संजालमा केसीका समर्थकहरुलाइ मात्र होइन डाक्टर केसीलाई समेत जथाभावी बोले । कतिपयले त मरे हुन्छ समेत भन्न भ्याए, मानौ केसी नेपाली समाजका खलपात्र हुन् । उनलाई गालि गर्दै गर्दा आफु नै खलपात्र बनेको उनीहरुले थाहा पाएनन ।
जे होस् सरकार र डाक्टर केसीबीच कुरो मिलेको छ । जे हुनु पर्ने थियो, त्यहि भएको छ । बिगतमा पनि यस्तो भएकै हो तर अस्थिर र अस्थायी सरकारको कारण कार्यान्वयन नहुँदा पटक पटक डाक्टर केसीले अनसन बस्नु परेको छ । अब ५ बर्षसम्म एउटै सरकार रहने भए पछि पक्कै फेरी अनसन बस्नु पर्ने अवस्था नआउला । त्यसको अर्थ नेपालमा स्वास्थ्य शिक्षा क्षेत्रमा अहिले रहेको विसंगति र बिकृति हल हुनेछ । यसको फाइदा नेपाली जनताले लिनेछन भने कार्यान्वयनको हिसाबले यहि सरकारले नै यसको जस पाउने छ जनताबाट ।
यो सहमतिमा सरकार हारेको होइन, सहि निर्णय गरेको मात्र हो । यसमा हार डाक्टर केसीका जायज मागहरुलाई राजनीतिक लेपन लगाउंदै फेसबुकमा उफ्रिनेहरुको हो । हार उनीहरुको इगोको भएको छ, निष्ठाको होइन । कुनै पनि मुद्धालाई राजनीतिकरण खोज्नेहरुको यसमा हार भएको छ । जसले भने पनि वा गरे पनि राम्रो कुरा राम्रै हो भन्ने उनीहरुले बुझे भने भविस्यमा दस हात उफ़्रिएर बजरिनु पर्ने अवस्था आउने छैन । यसकारण यो घटना एक शिक्षामुलक घटनाको रुपमा लिंदै आगामी दिनमा बोल्दा वा लेख्दा भाषामा अलि ध्यान पुर्याउन प्रण गरेमा लज्जित हुनु पर्ने अवस्था पक्कै आउने छैन । अहिलेको सरकार सबै नेपालीहरुको हो, फेसबुकमा भजन गाउने दास मनोबृतिका मान्छेहरुको मात्र होइन भन्ने कुरा सबैले बुझ्न जरुरी छ ।

डाक्टर केसी र सरकार बीच भएको २२ बुंदे सहमति