नगेन्द्रराज शर्मा अभिनन्दन ग्रन्थको लोकार्पण तथा समर्पण सम्पन्न

काठमाडौँ, २४ असोज, आइतबार ।

वरिष्ठ साहित्यकार तथा साहित्यिक पत्रकार नगेन्द्रराज शर्मा अभिनन्दन ग्रन्थको लोकार्पण शनिबार राजधानीमा सम्पन्न भएको छ । लोकार्पणपछि ग्रन्थका प्रधान सम्पादक पवन आलोक र कार्यकारी सम्पादक विधान आचार्यबाट शर्मालाई प्रज्ञाप्रतिष्ठान हलमा ग्रन्थ समर्पण गरिएको छ । नगेन्द्रराज शर्मा अभिनन्दन राष्ट्रिय अभिनन्दन मूल समारोह समिति २०७७ ले ग्रन्थ प्रकाशन गरेको हो ।

कार्यक्रममा स्वागत मन्तव्य दिनुहुँदै वरिष्ठ साहित्यकार तथा लघुकथा समाजका अध्यक्ष एवं अभिनन्दन मूल कार्यसमिति सदस्य श्रीओम श्रेष्ठ ‘रोदन’ले “साहित्यिक पत्रकारको सम्मानमा यसरी आयोजना गरिएको राष्ट्रिय अभिनन्दन र ‘अभिनन्दन ग्रन्थ’ प्रकाशनसमेत नेपालमा सम्भवतः पहिलो हो” भन्नुभयो ।

अभिनन्दन ग्रन्थका कार्यकारी सम्पादक नेपाल स्रष्टा समाजका अध्यक्ष तथा अभिनन्दन मूल कार्यसमिति सदस्य विधान आचार्यले अभिनन्दन ग्रन्थको प्रकाशनबारे विस्तृतरूपमा प्रकाश पार्नुभएको थियो । अभिनन्दन ग्रन्थ करिब साढे चार सय पृष्ठको छ र आठ पृष्ठको स्रष्टा अनुक्रमणिका (इन्डेक्सिङ) समेत समाविष्ट छ । प्राज्ञिक तथा अनुसन्धेय दृष्टिले यस्तो अनुक्रमणिका समाविष्ट ग्रन्थलाई ‘विशेष कृति’ मान्ने गरिन्छ । कुल नौ खण्डमा विभाजित ग्रन्थमा करिब एकसय स्रष्टाका रचना समेटिएका छन् ।

उक्त समारोहमा वरिष्ठ साहित्यिक पत्रकार तथा ‘रचना’ साहित्यिक द्वैमासिकका प्रधान–सम्पादक रोचक घिमिरे र वरिष्ठ साहित्यकार विनोद दीक्षितले नगेन्द्रराज शर्मासँग जोडिएका रमाइला संस्मरणहरू सुनाउनुभएको थियो । त्यसैगरी, वरिष्ठ समालोचक प्रा.डा. ज्ञानू पाण्डेले अभिनन्दन ग्रन्थबारे सङ्क्षिप्त समीक्षा गर्दै नगेन्द्रराज शर्माजस्ता राष्ट्रकै उदाहरणीय व्यक्तिहरूको अभिनन्दन कार्य साहित्यकारहरूका तर्फबाट हुनु निकै सराहनीय कार्य भएको र विशेष ‘अभिनन्दन ग्रन्थ’ नै प्रकाशित गरेर उहाँमा समर्पण गरिएकोमा खुसी व्यक्त गर्दै ग्रन्थ निकै महत्वपूर्ण र संग्रहणीय रहेको धारणासमेत राख्नुभयो ।

उक्त समारोहमा बोल्दै कार्यक्रमका मुख्य आकर्षण नगेन्द्रराज शर्माले भन्नुभयो, ‘म यति ठूलो सम्मान पाउन योग्य नभए पनि साहित्यकार मित्रहरूले मप्रति देखाउनुभएको यो सद्भावप्रति म हृदयतः कृतज्ञ छु र अभिनन्दन समितिलाई असीम धन्यवाद दिन्छु ।’

सभापतिको आसनबाट बोल्दै अभिनन्दन मूल समितिका अध्यक्ष वरिष्ठ साहित्यकार पवन आलोकले नगेन्द्रराज शर्माजस्तो शिखर व्यक्तित्वको सम्मान÷अभिनन्दन गर्न पाउनु हामी सबैका लागि खुसी र गर्वको कुरा भएको बताउनुभयो । साथै उहाँले अभिनन्दन कार्यक्रम सफल पार्नमा भूमिका खेल्ने कार्यसमितिका पदाधिकारीहरू, मूल समितिका सम्पूर्ण सदस्यहरू, ग्रन्थका लागि आफ्ना रचना उपलब्ध गराउने सम्पूर्ण स्रष्टाहरू, अभिनन्दनका लागि आर्थिक र अन्य स्रोत उपलब्ध गराउने संस्था तथा व्यक्तिहरू एवं ग्रन्थ सम्पादन मण्डलमा रही प्रशंसनीय कार्य गर्ने कार्यकारी सम्पादक विधान आचार्य र सम्पादकहरू गोविन्द गिरी प्रेरणा, देविका तिमिल्सिना, श्रीओम श्रेष्ठ ‘रोदन’ र रोशन थापा ‘नीरव’लाई हार्दिक धन्यवाद ज्ञापन गर्नुभयोे ।

स्मरणीय छ, श्री शर्मालाई गत २०७७ चैत २२ गते उहाँको ८४औँ जन्मदिवसका अवसरमा काठमाडौँमा भव्य राष्ट्रिय अभिनन्दन गरिएको थियो । “देशका विभिन्न स्थानबाट करिब चार दर्जन साहित्यिक संस्था र करिब ५०० व्यक्तिको स्वस्फूर्त सहभागिता रहेको राष्ट्रिय अभिनन्दन कार्यक्रम आफैंमा एक ऐतिहासिक कार्यक्रम थियो”, मूल समिति सदस्य चेतनाथ कणेल ‘हरित’को भनाइ छ ।

युवा साहित्यकार तथा समालोचक रञ्जना निरौलाद्वारा सञ्चालित उक्त कार्यक्रममा नेपाली साहित्यका मुर्धन्य व्यक्ति, व्यक्तित्वहरूको सहभागिता रहेको थियो ।