तालमा डुबेर मृत्यु भएका नेपाली युवाको अन्तिम संस्कार भोलि जुलाई १४ मा हुने

डालस, टेक्सास। तालमा डुबेर मृत्यु भएका डालस नजिकै रहेको शहर केलर निवासी एक  नेपाली युवाको दाहसंस्कार भोलि अर्थात् जुलाई १४ गते हुने भएको छ। परिबारका अनुसार डालसमा रहेको वेस्ट च्यापेल संस्कार गृहमा मंगलबार बिहान ९ बजे अन्तिम श्रद्धान्जली अर्पण गरिनेछ। त्यसपछि साढे दस बजे अन्तिम संस्कार सम्पन्न गरिनेछ।
कोरोनाको संक्रमणका कारण दाहसंस्कार गृहमा उपस्थित हुन पाउनेहरुको संख्या निकै न्युन छ। त्यसैले परिवारसंग सम्पर्क गरेर मात्र उपस्थित हुन, उपस्थित हुँदा सामाजिक दुरी कायम राख्न, मास्क र अन्य सुरक्षाका उपायहरु अपनाउन पनि अनुरोध गरिएको छ। सो स्थलमा उपस्थित हुन नसक्ने वा चाहेर पनि जान नसक्नेहरुले श्रद्धान्जली वा समबेदना ब्यक्त गर्न निवासमै  प्रबन्ध मिलाइएको छ।

यो विपदको घडीमा समबेदना व्यक्त गर्ने, सहयोगको बाचा गर्ने सम्पूर्ण इस्टमित्रहरुलाइ धन्यवाद व्यक्त गरिएको छ भने यसलाई अतिरन्जित नगर्न र पिडित परिवारको समबेदनाको ख्याल गरी परिचय सहित कुनै सामग्री सम्प्रेषण नगर्न समेत अनुरोध गरिएको छ। यो शोकको घडीमा युएसएण्ड नेपाल डट कम परिवार शोकसन्तप्त परिवार प्रति हार्दिक समबेदना तथा मृतकको आत्माको चीर शान्तिको कामना गर्दछ।