मानवीय मूल्यप्रतिको खबरदारी गर्दै साहित्यिक गोष्ठी सम्पन्न
पाल्पा विशेष अनलाइन साहित्यि कार्यक्रम
विनोद नेपाल
जेठ २४ गते, शनिबार । नेपाल स्रष्टा समाजले आज पाल्पा विशेष अनलाइन साहित्यिक गोष्ठी आयोजना ग¥यो ।
बन्दाबन्दीको समयमा स्रष्टाबीचको आपसी सम्बन्धलाई ताजा गराउँदै साहित्यको रसस्वादन गर्ने उद्धेश्यले कार्यक्रमको आयोजना गरिएको हो ।
गोष्ठीमा ११ पाल्पाली स्रष्टा र आयोजक संस्थाका अध्यक्ष र महासचिव गरी १३ स्रष्टाले आआफ्ना रचना वाचन गर्नुभएको थियो । गोष्ठीमा कविता, गीत, गजल, मुक्तक, हाइकु तथा लघुकथा वाचन गरिएका थिए ।
गोष्ठीका सहभागी टङ्कप्रसाद पन्थले ‘नेतृत्व जागा बन’ शीर्षकको कविता सुनाउनुभएको थियो । कवि पुरुषोत्तम अर्यालले ‘खै बुद्धको लुम्बिनी’ र लक्षीमा ज्ञवालीले ‘ईश्वरको चिठी मान्छेलाई’ तथा भावना खनालले ‘सीमा सुरक्षा गर’ शीर्षकका छन्दोबद्ध कविता सुनाउनु भएको थियो । संयोग, सबै कविता शार्दूलविक्रीडित छन्दमा लेखिएका थिए ।
पाल्पाली स्रष्टाहरू रामप्रसाद अर्याल र कृष्णा भण्डारी कँडेलले मुक्तक वाचन गर्नुभएको सो गोष्ठीमा आर.बी. निश्चलले ‘अस्तित्व’ तथा अर्का स्रष्टा महेन्द्र पन्थीले ‘पूजा त केवल मूर्तिको हुन्छ’ शीर्षकका गद्य कविता वाचन गर्नुभएको थियो ।
शकुन्तला घिमिरेले सुन्दर गजल सुनाउनु भएको थियो । अर्का साहित्यकार पुष्करराज रेग्मीले समयलाई लिएर लेखिएका हाइकुहरू सुनाउनुभएको थियो । स्रष्टा विनोद नेपालले ‘’ ‘बजेट’ शीर्षकको लघुकथा वाचन गर्नुभएको थियो ।
आयोजक संस्था, नेपाल स्रष्टा समाजका महासचिव पुष्पा खनालले ‘विधाताले लेखेको टर्छ कसरी’ गीत सुनाउनु भयो । अध्यक्ष विधान आचार्यले सीमासम्बन्धी विषयलाई लिएर लेखिएको आफ्नो ताजा छन्दोबद्ध कविता ‘कालीवारि सरक्क छोड’ का दुइटा श्लोक र ‘तानसेन’ शीर्षकको साढे तीन दशकअघि लेखिएको गद्य कविता वाचन गर्नुभएको थियो ।
वाचन गरिएका रचनाहरूमा राष्ट्रप्रेम, सीमासम्बन्धी चिन्ता, कोरोना कहर, मानवीय मूल्यप्रतिको खबरदारी र समसामयिक परिवेश अभिव्यक्त गरिएका थिए । रचनाको दृष्टिले गोष्ठी विविधतायुक्त थियो ।