डालसको नेपाली स्कुल केहि दिनका लागि बन्द: अमेरिकामा रास्ट्रिय संकटकाल घोषणा हुँदै

डालस, टेक्सास । कोरोन भाइरसको प्रभाव फैलिएर बिस्तारै स्थानीय समुदायका क्रियाकलापहरुमा असर पर्न थालेको छ । नेपाली सांस्कृतिक तथा आध्यात्मिक केन्द्रको सहयोगमा नेपाली समाज टेक्सासद्वारा संचालन भैरहेको नेपाली भाषा कक्षा सोहि भाइरसका कारण मार्च २२ सम्मका लागि स्थगित गरिएको छ । स्कुलका प्रिन्सिपल बिजयराज भट्टराई तथा स्कूल ब्यबस्थापनका अनुसार यो अबधि बढ्न सक्ने तर्फ इंगित गर्दै त्यस्तो भएमा बिकल्प सोंचिने जानकारी गराइएको छ ।
चीनबाट शुरु भएको यो भाइरस चीनमा नियन्त्रणमा आइसकेको दावी सुनिए पनि संसारका अरु देशहरु आक्रान्त बनेका छन् । बिस्वकै धनि र शक्तिसम्पन्न मानिने अमेरिका कोरोना भाइरस नियन्त्रणको मामिलामा निकै पछि देखिएको छ । परिक्षण गर्ने सामग्री र श्रोतहरुको अभावमा यो कति फैलिएको छ भन्ने जानकारी समेत हुने अवस्था छैन ।
अघिल्लो हप्ता सम्म केहि दर्जन मात्र कोरोना संक्रमित भेटिए अहिले यो २००० को हाराहारीमा पुगेको छ । प्रयाप्त परिक्षण हुने हो भने यो संख्या धेरै बढ्ने प्रस्ट देखिन्छ । अहिले सम्म ३१ जनाको मृत्यु भैसकेको छ जसमा अधिकांश वाशिंटन स्टेटका रहेका छन् । यहि गाम्भीर्यतालाइ ध्यानमा राखेर रास्ट्रपति डोनाल्ड ट्रंपले राष्ट्रिय संकटकाल घोषणा गर्ने जनाइएको छ । यो संगै अमेरिकाको कोरोना बिरुद्धको प्रतिरोधले मुर्त रुप लिएको छ ।
यस्तो अबस्थामा स्कुल बन्द गर्नु उचित छ । स्थानीय स्कुल डिस्ट्रिक्टहरुले मार्च महिनाको लागि स्कुल बन्द गरिएको घोषणा गरिसकेका छन् । डालस काउन्टीले ५०० जना भन्दा बढी उपस्थित हुने कार्यक्रमहरु हुन नदिने जनाएको छ भने खेलका कार्यक्रमहरु समेत बन्द गरिएको घोषणा गर्ने कम तिब्र भएको छ ।

सरकारी तबरबाट हुने यी कुराहरु बाहेक समुदायको एक जिम्मेवार सदस्यको रुपमा हामीले पनि निम्न कुराहरु पालन गर्नु उचित देखिन्छ । यो भाइरसको संक्रमणबाट बच्न आफु मात्र निरोगी भएर पुग्दैन, हाम्रो परिवार, छिमेक र समुदाय निरोगी हुनुपर्दछ ।
१) सकेसम्म सार्बजनिक सभाहरुमा नजाने, जानै पर्ने भए साबधानी अपनाउने ।
२) आफुलाई कोरोना भाइरसका लक्षण देखिएमा सतर्क हुने र अरुलाई नसरोस भनेर जांच गर्नु अघि देखि नै साबधान हुने ।
३) पटक पटक हात धुने र साबुन पानीले कमसेकम २० सेकेन्ड सम्म सफा गर्ने ।
४) घरबाहिर सकेसम्म नजाने, जानै परे किटाणुनासक झोल पदार्थ बोकेर हिड्ने ।
५) कसैसंग हात नमिलाउने बरु नमस्कारबाट अभिबादन गर्ने ।
६) रुघा खोकी, ज्वरो तथा टाउको दुखेको औषधिहरु घरमा संग्रह गर्ने ।
७) खानेकुरा तथा अन्य अत्याबस्यक सामाग्रीहरु संग्रह गर्ने तर किटाणु नासक पदार्थहरु सिमित मात्रामा खरिद गर्ने जसले गर्दा अरुलाई पनि उपलब्ध होस् ।
८) सरसफाईमा ध्यान दिने, नियमित सहि सूचना लिने तर अफबाहको आधारमा सामाजिक संजालमा नउफ्रिने ।
९) आफु बाँच्ने प्रयत्न गर्ने र अरुलाई बचाउन सहयोग गर्ने ।