कोरोना भाइरस प्याण्डेमिक घोषणा र अमेरिकी सरकारको कमजोर रणनीति
बिस्व स्वास्थ्य संगठनले कोरोना भाइरसको आतंकलाई प्याण्डेमिक अर्थात् बिस्वभर खतरनाक रुपमा फैलिरहेको रोगको रुपमा घोषणा गरेको छ । गत जनवरी ३० मा मात्र उक्त संगठनले यो रोगको महामारीका कारण जनस्वास्थ्य आपतकालीन अबस्थाको घोषणा गरेको थियो । यतिबेला सवालाख मान्छेमा कोरोना भाइरसको संक्रमण भएको छ भने ४५ सय भन्दा बढीको ज्यान गैसकेको छ । चीन लगायत जापान, कोरिया, इटाली, इरान र अमेरिका मुख्य रुपमा यो भाइरसको केन्द्रबिन्दुमा छन् भने छिटफुट रुपमा करिव ५ दर्जन देशहरुमा फैलिएको छ ।
चीनले शुरुमा यो रोगलाई लुकाउन प्रयत्न गर्नाले अन्य देशहरुमा सरेको ती देशहरुको आरोप छ । समयमै यसबारे जानकारी भएको भए चीनसंगको सिमा र आवतजावत शुरुमै बन्द गर्न सकिन्थ्यो र अन्त्यत्र फैलिन बाट रोक्न सकिन्थ्यो भन्ने भनाइलाइ अन्यथा भन्न मिल्दैन । रोगको महामारी सार्बजनिक भए पछि चीनले १० दिनमै अस्पताल निर्माण, उपचार र रोकथाममा निकै सफलता समेत प्राप्त गरेको छ । जापानले पनि प्रयत्न गर्दै सफलता हासिल गरेको छ भने कोरियाले पनि आफ्नो सम्पूर्ण शक्ति त्यसैमा लगाएर नागरिकहरुको स्वास्थ्य प्रतिको सम्बेदनशिलता प्रदर्शन गरेको छ ।
यस्तै इटालीले आफ्नो एक तिहाइ जनसंख्यालाई क्वरेण्टाइनमा राखेको छ । सबै देशहरुले आफ्नै तरिकाले यो भाइरसको बिरुद्ध लडे पनि अमेरिका जस्तो धनि र शक्तिशाली देशको हालत भने चित्तबुझ्दो छैन । जनस्वास्थ्यमा खासै असजिलो नभएको तर्क गर्दै बक्तब्यबाजी गरे पनि ट्रंप प्रशासनले कोरोना भाइरससंग जुध्न कुनै ठोस कदम चालेको छैन । न त यसको उपचारको लागि साधन र श्रोत नै जुटाउन सकेको छ । ठुला ठुला अस्पतालहरु समेत धेरै बिरामीहरुको जांच गर्न र संक्रमितहरुलाई छुट्टै राख्ने व्यवस्था गर्न असमर्थ छन् । यसले अमेरिकी जनतामा चिन्ता थपेको छ ।
सबैलाई थाहा छ, यो रोगको नियन्त्रण गर्न सबभन्दा पहिले यसको पहिचान गर्नु पर्छ । पहिचान गर्न व्यक्तिको परिक्षण गर्नुपर्छ । तर २१ मिलियन स्वास्थ्य कर्मचारी मात्र भएको देशमा करिव एक मिलियन परिक्षण सामग्री उपलब्ध भएको सरकारले जनाएको छ । रोगीहरुको पहिचान र उपचारमा संलग्न स्वास्थ्य कर्मचारीलाइ समेत परिक्षणको लागि प्रयाप्त सामग्री नभएको अबस्थामा ३०० मिलियन अमेरिकी जनताको लागि आबस्यक स्वास्थ्य सेवा पुग्न सक्छ भन्ने सोंच्नु आफैलाई घातक हुनसक्छ ।
सबभन्दा राम्रो साबधानी
ठुलो संख्यामा मान्छे बिरामी भए भने अमेरिकाका कुनै पनि ठाउँमा उपचार गर्ने थलोको अभाव हुनेछ औषधि र परिक्षण सामग्रीको कुरा त परे जाओस । ट्रंप प्रशासन जनस्वास्थ्यमा भन्दा बजारको अंक र नोभेम्बरमा हुने चुनावमा बढी केन्द्रित देखिन्छ । सूचना लुकाएर अमेरिकामा केहि भएको छैन भन्ने प्रयास ट्रंप प्रशासनले गर्दैछ । यस्तोमा आफ्नो मात्र होइन समुदायका सबै व्यक्तिहरुको स्वास्थ्य र आबस्यकतालाइ ख्याल गर्दै डर र त्रासमा होइन ढुक्कसाथ यो भाइरसबाट बच्न र आइपरेमा सामना गर्न तयारी गर्नु नै अहिलेको आबस्यकता हो ।