एचडीएनपीले घरबारबिहिनहरुलाई ब्ल्यांकेट दियो
डालस, टेक्सास । एचडीएनपी इन्टरनेसनलले घरबारबिहिनहरुलाई ब्ल्यांकेट वितरण कार्यक्रम सम्पन्न गरेको छ । क्रिश्मसको समय पारेर जाडोमा कठ्याङ्ग्रिन बाध्य उनीहरुलाई न्यानो ब्ल्यांकेट वितरण गरिएको हो । बिभिन्न व्यक्ति, संस्थाहरुबाट संकलित ५२३ वटा ब्ल्यांकेट वितरण गरिएको संस्थाका अध्यक्ष देवी आचार्यले जानकारी दिनु भएको छ ।
एचडीएनपी डालस फोर्ट वर्थ क्षेत्रमा सक्रिय सामाजिक संस्था हो । यसले लामो समय देखि घरबारबिहिनहरुलाई खाना खुवाउने कार्यक्रम, रक्तदान कार्यक्रम र ब्ल्यांकेट बितरण कार्य गर्दै आएको छ । यसपटक पनि क्रिश्मसमा उपहार स्वरुप उनीहरुलाई ब्ल्यांकेट वितरण गरियो । ब्ल्यांकेट संकलन गर्न यसपटक नयाँ तरिका अपनाइएको थियो । नयाँ पुस्तामा समाजको लागि केहि दिनु पर्छ भन्ने भावना जगाउंदै सामाजिक कार्यमा सक्रिय बनाउन ६ जना युवाहरुलाई संयोजक बनाएर ब्ल्यांकेट संकलन शुरु गरिएको थियो ।
भर्खरका कलिला ती संयोजकहरुले सक्रियातापुर्बक काम गरे । स्कुल, घर र छिमेकमा आफुले गर्न लागेको कामको प्रचार गरे । साथीभाईहरुलाई सहयोग गर्न प्रेरित गरे । सबैजना मिलेर करिव तेइस सय डलर रकम पनि संकलन गरे । त्यसबाट ब्ल्यांकेट किने र घरबारबिहिनहरुलाई वितरण गर्न सहायोग गरे । मुख्य संयोजक श्रियम जोशीले आफु यो कार्यबाट उत्साहित बनेको बताइन अन्य संयोजकहरुले पनि केहि नभएकाहरुलाई केहि दिन पाउँदा खुसि लागेको कुरा व्यक्त गरे ।
ब्ल्यांकेट वितरण साढे दस बजे शुरु भएको थियो । ब्ल्यांकेट लिन फोर्ट वर्थ वरपरका सडक पेटीमा सुत्ने घरबारबिहिनहरु लाइन लागेका थिए भने यो कामलाई सफल तुल्याउन थुप्रै स्वयंसेवकहरुको उपस्थिति थियो ।
