नेपाल जर्नी डालसमा समाजसेवाको उदाहरण बन्दै

बिदेशमा बसेर नेपालमा समाजसेवा गर्न चाहने धेरै भए पनि गर्न भने निकै कठिन छ । दैनिक गुजारा चलाउन काम गर्नै पर्छ । सामान्य काम गरेर खानेहरुलाई त्यति प्रसस्त समय पनि हुँदैन र घरको खर्च धानेर समाजसेवामा लगाउन पैसाको पनि अभाव नै हुन्छ । त्यस माथि संस्था स्थापना गरेर त्यहि संस्थाको पछि कुद्न र देखिने गरी नेपालमा काम गर्न त झन् फलामको च्युरा चपाए सरह हुन्छ । तर पनि गरिछाड्छु भन्नेलाई भने कुनै कुराले छेक्न सक्दैन । त्यसको उदाहरण हो नेपाल जर्नी र त्यसको सक्रिय टीम ।

नेपाल जर्नी स्थापना भएको ४ बर्ष नबित्दै यो नेपाल, अमेरिका लगायत थुप्रै देशहरुमा फैलिएको छ । यसले शुरुवात देखि नै शिक्षाको क्षेत्रमा योगदान दिंदै आएको छ । नेपालका बिभिन्न ठाउंहरुमा पुस्तकालय निर्माण समेत गरिसकेको यो संस्थाले फेरी चितवनको भरतपुरमा एक सुबिधासम्पन्न पुस्तकालय निर्माण गर्ने तयारीमा छ । त्यसको लागि प्रारम्भिक अनुसन्धान, पुस्तकालयको डिजाइन, जग्गाको ब्यबस्थापन समेत सम्पन्न गर्दै निर्माण कार्यको शिलान्यास गर्ने तर्फ अगाडी बढिसकेको छ । यो परियोजनाको लागि ठुलै धनराशी चाहिने भएकोले अन्तररास्ट्रिय रुपमा चन्दा संकलन गर्न भानु खरेलको संयोजकत्वमा समिति समेत गठन भैसकेको छ ।
सोहि कामलाई सफल बनाउन नेपाल जर्नीले हालै डालसमा एक “गाला डिनर” आयोजना गर्यो । त्यसबाट करिव १० हजार डलर संकलन भएर हालसम्म खातामा ६० हजार डलर जम्मा भएको संस्थाकी अध्यक्ष मौसमी श्रेष्ठले जानकारी दिएकि छन् । डालसको नेपाली समाजका अधिकांश अगुवाहरु उपस्थित भएर सहयोग गरेको यो कार्यक्रम डालस क्षेत्रमा हुने कार्यक्रमहरु मध्ये ब्यबस्थापनको हिसाबले उत्कृस्ट थियो ।

सहभागीहरु ढिला आउने, कार्यक्रम ढिला शुरु हुने, बक्ताहरुको लामो सुची हुने, बक्ताहरुले आफ्नो समयको ख्याल नगर्ने जस्ता कारणले यहाँ हुने कार्यक्रमहरु लामा र पट्ट्यार लाग्दा हुन्छन । एउटै कुराहरु दोहोराएर तेहेराएर सुन्दा दर्शकहरु दिक्क हुन्छन । त्यसले गर्दा कार्यक्रमको आकर्षण घट्ने मात्र होइन मान्छेहरु उपस्थित हुन समेत गाह्रो मान्ने गर्छन । तर नेपाल जर्नीको यो कार्यक्रम यी सबै कमजोरीहरुबाट मुक्त रह्यो । थोरै बक्ता, समयमा शुरुवात र समयमै अन्त्यले सबैलाई प्रभावित पार्न यो कार्यक्रम सफल भएको थियो ।
डालसमा नेपालमा सहयोग गर्ने उद्देस्यले धेरै संस्थाहरु खुले पनि नेपाल जर्नीले छोटो समयमा गरेको कामको उच्च मुल्यांकन गर्नै पर्छ । त्यसको लागि अपबाद बाहेक डालसको नेपाली समाजबाट सहयोग मिलिरहेको उपाध्यक्ष बद्रि श्रेष्ठले जानकारी गराएका छन् । हामी पनि आफ्नो अमुल्य समय नेपालमा रहेका र शिक्षाको उज्यालोबाट बन्चित थोरै भए पनि नेपाली बिद्यार्थीहरुलाई नेपाल जर्नीले गरेको सहयोग प्रति आभार व्यक्त गर्न चाहन्छौं । यसको लागि यसमा लागेका सबै पदाधिकारी, स्वयंसेवक र चन्दादाताहरु धन्यवादको पात्र हुनुहुन्छ ।