डालसमा गुरु चिन्तामणि योगीद्वारा “हाम्रा र राम्रा” कुरा सिकाउन समर क्याम्प हुने

हरेक बर्ष झैं नेपाली समाज टेक्सास र नेपाली सांस्कृतिक तथा आध्यात्मिक केन्द्रको आयोजनामा हुने समर क्याम्प यो बर्ष पनि जुलाई १४ देखि २४ सम्म सम्पन्न हुने भएको छ । बिहान ९ देखि अपरान्ह ४ बजे सम्म कक्षा १ देखि १२ सम्मका बालबालिकाहरुको लागि यो समर क्याम्प संचालन गरिने आयोजकहरुले जानकारी दिएका छन् । यहि बिशिस्ट प्रयोजनको लागि गुरु डाक्टर चिन्तामणि योगी नेपालबाट आइसक्नु भएको छ । आयोजकहरुका अनुसार कोटा सिमित भएकोले सकेसम्म आफ्ना बालबालिकाहरुलाई भर्ना गरिहाल्न अनुरोध गरिएको छ । करिव डेड हप्ता सम्म चल्ने यो बिशेष कार्यक्रममा सहभागी हुने नानीबाबुहरुको लागि दिनभर खानपिनको व्यवस्था सहित जम्मा एकसय पच्चीस डलर सहयोग दस्तुर तोकिएको छ । कक्षा ९ देखि १२ सम्मका बिद्यार्थीहरुले स्वयम्सेवक र शिक्षकको रुपमा भाग लिनु पर्ने हुँदा जम्मा पचास डलर सहयोग दस्तुर बुझाउनु पर्ने व्यवस्था गरिएको छ ।
मानवीय सभ्यता र संस्कार एकअर्काको सभ्यता र संस्कारसंग मिलन, घुलन र बिलय हुने क्रम अहिले तिब्र छ । संगसंगै आफ्ना संस्कार र सभ्यताहरुको संरक्षणको लागि मानिस सक्रिय पनि हुँदैछ । बिस्वब्यापिकरण, बढ्दो बसाइसराइ आदिको कारणले मान्छेको भाषा, संस्कृति र धर्म समेत खतरामा पर्न लागेको सन्दर्भमा आफ्नो त्यो परिचय र पहिचान बचाउन विभिन्न खालका क्रियाकलापहरु संचालन पनि हुँदै आएका छन् । बिशेष गरी पश्चिमाहरुले आफ्नो धर्म फैलाउने अभियानमा धार्मिक स्वतन्त्रता र अन्य स्वतन्त्रताका धेरै कुरा गरेका छन् । तर आफुलाई असजिलो हुँदै गएका ठाउँहरुमा भने रास्ट्रबादको नाममा धार्मिक कट्टरताको वकालत गर्ने गरका छन् ।
हामी पनि बिदेशमा आफ्नो केहि पहिचान र परिचय होस् भन्ने चाहन्छौं । हाम्रो धर्म नमेटियोस, हाम्रो संस्कार नमेटियोस, हाम्रो भाषा नमेटियोस भनेर धेरै अभियन्ताहरु यसमा लाग्नु पनि भएको छ । धर्मलाई आफ्नो स्वार्थ पूर्तिको लागि प्रयोग गर्ने, धर्मलाई आफ्नो फाइदाको लागि परिभाषित गर्ने कतिपय व्यक्तिहरु हुँदा हुँदै पनि आफ्नो परिचय आफ्नै धर्म र संस्कृतिमा देख्नेहरुको कारण प्रबाशमा पनि हाम्रो धर्म टिक्न सकेको छ । यसको लागि नयाँ पुस्ताहरुलाई नयाँ किसिमले हाम्रो धर्म र संस्कृति प्रति शिक्षित र दिक्षित गर्न जरुरी छ ।
अहिलेको पुस्ता धर्ममा समय सापेक्ष परिबर्तन र परिभाषित होस् भन्ने चाहन्छ । हाम्रा संस्कारहरु समय सापेक्ष होउन भन्ने अहिले धेरैको चाहना छ । संगसंगै हाम्रो संस्कारका बैज्ञानिक कारणहरु बारे मानिसहरुलाई जानकारी गराउन जरुरी देखिन्छ । आफु भन्दा अघिल्लो पुस्ताले गरेको देखेर गरेको भन्ने भन्दा पनि कुनै संस्कारको बैज्ञानिक कारणसहित त्यो कर्मको बारेमा बुझाउन सकियो भने मात्र हामीले हाम्रो संस्कार जोगाउन सकिन्छ ।

यहि सन्दर्भमा गुरु चिन्तामणि योगीको यो समर क्याम्पमा हुने उपस्थिति अत्यन्त उपयोगी छ । बिगत लामो समय देखि नै योगीजी डालसको समाजमा आएर आफ्नो ज्ञान बाँड्दै आउनु भएको छ । बिशेष गरी उहाँको ज्ञानको भण्डार र उत्कृस्ट प्रस्तुति बिद्यार्थीहरुले अत्यन्त रुचाउने गरेका छन् । सजिलो भाषामा र दुवै भाषामा उहाँको पोख्तताले कतिपय नेपाली राम्रोसंग नबुझ्ने बिद्यार्थीहरुलाई पनि यो क्याम्प अत्यन्त लाभदायी हुने गरेको छ । हाम्रो बिभिन्न कमजोरीहरुका कारण नमस्ते भन्न पनि नजान्ने र नचाहने बालबालिकाहरुलाई यो समर क्याम्पमा गुरु चिन्तामणि योगीको बाणी अमृत हुनसक्छ ।
हाम्रो पुर्बिय संस्कृति अत्यन्त बैज्ञानिक, धनी र अग्रगामी हुँदा हुँदै पनि त्यसको प्रस्तुतिको शैली र प्रचार प्रसारको कमीले गर्दा पुरानो र जड्बत संस्कारको ट्याग भिर्न बाध्य छ । यहि कुरा बुझ्न नसक्दा कतिपय हाम्रै समुदायका व्यक्तिहरु पनि धर्म परिबर्तन गर्ने मात्र होइन पश्चिमा संस्कृतिको अनुसरण गर्नुलाई आधुनिक बन्नु भन्ने अर्थमा समेत लिने गर्छन । यसैको जरोमा पुगेर हाम्रो धर्म र संकृतिको ब्याख्या र दैनिक जीवनमा त्यसको उपयोगिता बारे गुरु चिन्तामणि योगीले बताउनु हुन्छ ।
त्यसैले समर क्याम्पमा आफ्ना बालबालिकाहरुलाई भर्ना गरेर थोरै भए पनि अमृतपान गराउन नेपाली मन्दिर र नेपाली समाज टेक्सासले अपिल गरेका छन् । आफ्नो जरो बारे अलिकति जानकारी गराउने यो अत्यन्त पुनित कार्यमा सबै अभिभावकहरु लाग्नु हुनेछ भन्नेमा आयोजकहरु ढुक्क हुनुहुन्छ ।