भरत अर्यालद्वारा बिज्ञप्ति जारी: सबैमा सहयोगको लागि अपिल
April 17, 2019 | 1:00 am
एनआरएन अमेरिकाको निर्बाचनमा उम्मेद्वारी दिने अन्तिम दिन आइपुग्नै लाग्दा डालसको नेपाली समाज तरंगित बनेको छ । एकसेएक उम्मेदवारहरु एनआरएनमा बसेर नेपालीहरुको लागि केहि गर्न आतुर छन् । अमेरिकाकै ठुलो र सक्रिय नेपाली समाज रहेको हुनाले यहाँ यतिबेला अलिक बढी नै चहलपहल भैरहेको छ ।
यहि सन्दर्भमा बरिष्ठ उपाध्यक्षमा उम्मेद्वारी दिनु भएका समाजसेवी भरत अर्यालले एक बिज्ञप्ति जारी गर्नु भएको छ । बिज्ञप्तिमा साथीभाईहरुको सल्लाहमा आफु उम्मेदवार बनेको स्मरण गराउंदै प्रतिष्पर्धामा जान तयार रहेको जनाउ दिनुभएको छ । बिज्ञप्ति जस्ताको तस्तै :
जन्मेदेखि नै राजनीति र समाजसेवामा लागियो । पारिवारिक पृष्ठभूमि नै त्यस्तै थियो । समाज र देशको लागि केहि गरूँ भन्ने नै मेरो ध्येय थियो । पैसा कमाउन त ब्यापार वा अन्य कुनै पेशा गरे भैहाल्यो भन्ने धारणा थियो । जनता र समाजको लागि केहि गर्छु भनेर राजनीतिमा लागेपछि जनताको विश्वास तोडेर पैसाको पछि लाग्नु हुन्न भन्ने कुरा मेरो विचार थियो र छ ।
खप्पर को खेल कसले पो जानेको हुन्छ र ! नेपालमा सक्रिय जीवन बिताइरहेको अबस्थामा फेरी प्रबाशी नेपाली बन्न अमेरिका आइपुगें । विदेश आए पछि पनि आफ्नो मन आफ्नै देश र आफ्नै समुदायमा रमाउँदो रहेछ । अमेरिकामा नै सक्रिय जनसम्पर्क समितिमा आबद्ध भएँ ।
प्रजातान्त्रिक पार्टी र त्यसको प्रबाशी संगठन भएकोले त्यसमा बिभिन्न खालका विचारहरु हुनु स्वाभाविक भए पनि व्यक्तिगत र गुटगत रुपमा संगठन विभाजित हुनु राम्रो होइन । मैले नेपाली जनसम्पर्क समितिमा बैचारिक बहस गर्ने तर गुटको राजनीति गरिन । त्यसो गर्न मेरो स्वभाव र मर्यादाले दिँदैन । साथिभाई सबै मिलेर जनसम्पर्क समिति सक्रिय र सबल बनाउँ भन्ने मेरो भनाइ रह्यो । त्यसैमा मैले आफ्नो उर्जा खर्च गरें ।
बिस्तारै अन्य संगठनहरुमा पनि आबद्ध हुन थालियो । एनआरएन सबै नेपालीहरुको साझा संस्था भएकोले स्वभावैले मैले यसमा सक्रिय हुने निर्णय गरें । जनसम्पर्क समितिमा भन्दा एनआरएनमा सक्रिय हुँदा धेरै नेपालीहरुको हकहितमा काम गर्न पाइन्छ भन्ने मेरो विचार भयो ।
एनआरएनमा कसरी सक्रिय हुने भन्ने कुरामा म दुबिधामा थिएँ । त्यसको लागि धेरै साथीभाई र समुदायका अगुवाहरुसंग छलफल कुराकानी गरें । जनसम्पर्कका जिम्मेवार साथीहरुसंग पनि यसमा मेरो स्पस्ट छलफल भयो । सबैको सल्लाहमा मैले एनआरएनमा मलाई उपयुक्त हुने पदमा उम्मेवार हुने निर्णय गरें । जिम्मेवार साथीहरुको सहमतिमा नै म उम्मेदवार हुने निर्णय गरेको हुँ ।
मेरो उम्मेद्वारी कसैको बिरुद्ध पक्कै होइन । तर हामीबीचको सहमति र मलाई दिएको बचन पालन नभए पछि मैले आफ्नो कदम अगाडी बढाएको हुँ । निर्बाचनमा जितहार सामान्य कुरा हो । त्यसको लागि म तयार छु र साथीहरु जो उम्मेदवार हुनुहुन्छ उहाँहरुलाई पनि निर्बाचनमा स्वच्छ रुपमा प्रतिष्पर्धा गर्न र त्यसको नतिजा स्वीकार गरेर हामीबीचको सम्बन्ध र भाइचारा कायम राख्न समेत अनुरोध गर्दछु ।
अन्त्यमा मेरो उद्देश्य एनआरएनमा गएर नेपालीहरु र नेपाली समुदायको सेवा नै हो । त्यसको लागि समाज र सामाजिक अगुवाहरुले मेरो बिगतको सक्रियता र क्षमतालाइ ध्यान दिंदै मुल्यांकन गर्नु हुनेछ भन्ने आशा लिएको छु । म आफ्नो तर्फबाट अमेरिकाको नेपाली समुदायको लागि निरन्तर लागिरहने प्रतिबद्धता समेत व्यक्त गर्दछु ।