एनआरएन अमेरिकाको बरिस्ठ उपाध्यक्षमा भरत अर्यालको उम्मेद्वारी किन ?

डालस, टेक्सास । एनआरएन अमेरिकाको आगामी २०१९-२१ को लागि बरिस्ठ उपाध्यक्ष पदमा समाजसेवी भरत अर्यालले उम्मेदवार बन्ने घोषणा गर्नु भएको छ । सामाज सेवा र राजनीतिमा समेत शुद्धता, इमान्दारिता र स्पष्टताको अनुसरण गर्न रुचाउने भरत अर्यालको उम्मेदवार हुने घोषणाले एनआरएन अमेरिकाको निर्बाचन थप चाखपूर्ण बन्ने भएको छ ।
नेपालमा रहंदा शिक्षक पेशामा आबद्ध अर्याल राजनीतिक रुपमा नेपाली कांग्रेससंग आबद्ध भएको सगर्व बताउने गर्नु हुन्छ । अमेरिका आए पछि पनि नेपाली कांग्रेसको प्रबासी संगठन नेपाली जनसम्पर्क समिति अमेरिकासंग आबद्ध हुनुहुन्छ । नेपाली जनसम्पर्क समिति भित्र विद्यमान किचलो र बिबाद मिलाउन समेत लामो समय देखि प्रयासरत हुनुहुन्छ । “सके यो विवाद मिलाउँछु, नसके पनि कुनै गुटमा लाग्दिन”, उहाँको भनाइ संधै यहि रह्यो । उहाँ जस्ता स्वतन्त्र व्यक्तिहरुको प्रयासको बाबजुद नेपाली जनसम्पर्क समिति एकढिक्का हुन सकेको छैन ।

नेपाली जनसम्पर्क समितिसंग समद्ध भए पनि भरत अर्याल परेको बेला राजनीतिक पूर्वाग्रह नराखी सहि कुरा बोल्ने व्यक्तिमा पर्नु हुन्छ । सामाजिक र प्रबासी नेपालीहरुका मुद्धाहरुमा उहाँ संधै अग्रपंक्तिमा रहेर समाधानको पहल गर्नु हुन्छ । अमेरिकामा मात्र होइन नेपालमा समेत आइपरेको बेला अग्रपंक्तिमा रहेर सहयोग गर्नेहरुको सुचिमा अर्यालको नाम आउँछ । डालस टेक्सासमा निर्माणाधीन मन्दिर देखि अन्य सामाजिक संस्थाहरुमा उहाँको योगदान अतुलनिय रहेको स्थानीयहरू बताउँछन् । अमेरिका बसाइको छोटो समयमै नेपालीहरुको लागि इमान्दार रुपमा केहि गर्न संधै तम्तयार भरत अर्याल एनआरएन अमेरिकाको लागि समेत एक आबस्यक पात्रको रुपमा स्थापित भैसक्नु भएको छ ।
एनआरएनमा जान चाहना राख्नुको कारण बारे सोधेको प्रश्नमा उहाँले “समग्र नेपालीहरुको हितको लागि केहि परिणाममुलक काम गर्न” भनेर छोटो मिठो भाषामा उत्तर दिनु भयो । आफ्नो सम्पूर्ण पृष्ठभूमि धेरैलाई थाहा भएको उल्लेख गर्दै आफ्नो बारे बढाईचढाइ नगरी यथार्थ प्रस्तुत गरिदिन समेत उहाँले अनुरोध गर्नु भयो । लाखौँ नेपालीहरुको संस्था भनिरहँदा पनि यसले सानो अंश मात्र ओगट्न सकेको प्रति असन्तुस्टी व्यक्त गर्दै उहाँले एनआरएनलाइ साँच्चिकै ३ लाख नेपालीहरुको साझा संस्था बनाउन पहल गर्ने बाचा समेत गर्नु भएको छ ।
हुन पनि एनआरएन अमेरिका बिभिन्न खाले चलखेलले बिरामी छ । अदालतमा मुद्धाहरु अझै छन् । सामान्य वेबसाइटको समस्या समेत समाधान गर्न सक्ने नेतृत्व एनआरएनले पाउन सकेको छैन । राष्ट्रिय र अन्तररास्ट्रीय मुद्धाहरुमा समेत सक्रिय हुनुपर्ने यो संस्था अमेरिका भित्रै पनि केहि व्यक्तिहरुको इशारामा चलेको देखिन्छ । यो सबैको साझा हुन सकेको छैन । अत्यन्त व्यक्तिबादी र गुटबादी सोंच, साधन र श्रोतको परिचालन क्षमताको अभाव, भिजन र भिजन पुरा गर्न इमान्दार प्रयासको कमीले गर्दा यसले यथोचित काम गर्न सकेको छैन । बेलाबेलामा घुसाइने राजनीतिले समेत यसलाई बिरामी बनाइरहेको छ । कार्यसमीती भित्रै हुने विवाद र त्यसमा सबल र योग्य मध्यस्तकर्ताको समेत आबस्यकता खड्केको देखिन्छ ।
यस्तो परिस्थितिमा भरत अर्याल जस्ता मध्यमार्गी र सहि अर्थमा समाजसेवीको एनआरएनमा प्रवेश सकारात्मक पक्ष हो । हामीले एकै चोटी एनआरएन अमेरिकाको कायापलट गर्न नसके पनि राजनीतिक र क्षुद्र व्यक्तिगत कुण्ठाको घेरा तोडेर निर्बाचनमा सहि उम्मेदवार चुन्ने हो भने पक्कै पनि एनआरएन कुनै दिन हाम्रो गर्ब गर्न लायक संस्था बनाउन सकिन्छ भन्नेमा कुनै दुबिधा छैन ।