डाक्टर अर्जुन बन्जाडेद्वारा एजेन्डा सहित एनसिसि अमेरिकाको अध्यक्षमा उम्मेद्वारी घोषणा

डालस, टेक्सास । एनआरएन अमेरिकाको आगामी २०१९-२१ को लागि अध्यक्ष पदमा फोर्ट वर्थ टेक्सास निवासी डाक्टर प्रोफेसर अर्जुन बन्जाडेले उम्मेद्वारी घोषणा गर्नु भएको छ । बेड्फ़ोर्ड स्थित स्थानीय फिस्टेल रेस्टुरेन्टमा आयोजित बिशेष समारोहमा उक्त घोषणा गरिएको हो । स्थानिय संघसंस्थाका प्रतिनिधि, पत्रकार एबम जनसमुदायको उल्लेख्य उपस्थितिमा डाक्टर अर्जुन बन्जाडेले आफ्नो उम्मेद्वारी घोषणा गर्नु भएको हो ।

घोषणाको क्रममा डाक्टर अर्जुन बन्जाडेले आफ्नो पृष्ठभूमि, भावी योजना बारे खुलस्त पार्ने काम गर्नु भयो । एनआरएन मा अहिले देखिएका समस्या समाधान देखि नयाँ योजना र कार्ययोजनाहरु समेत उहाँले प्रस्तुत गर्नु भयो । सेवाकै लागि जाने भए पनि ढंग पुराएर काम गर्न नसक्दा एनआरएनले समस्या भोग्नु परेको उहाँको भनाइ थियो । एनआरएनको अभियानमा केहि गर्ने हो भने साधन र श्रोतको अभाव नभएको र उचित व्यक्ति उचित ठाउँमा हुने हो भने धेरै काम गर्न सकिने उहाँको तर्क थियो ।
घोषणा कार्यक्रम भनिए पनि यो नितान्त अनौपचारिक रुपमा संचालन गरिएको थियो । समाजसेवी दिनेश शर्माले उद्घोषण गरेको उक्त कार्यक्रममा उम्मेदवारको धारणा पश्चात पत्रकार एबम स्थानीय व्यक्तिहरुले आफुलाई लागेका जिज्ञासा राख्नु भएको थियो ।
बिगतमा धेरै उम्मेदवारहरु आउने जाने गरे पनि यसमा भने व्यक्तिका भन्दा एजेन्डाका कुरा धेरै गरिए । कसले कति सदस्य बनायो र कसले कति चन्दा दियो भन्दा पनि एनआरएनले गर्ने खास मुद्धाहरु के हुनसक्छन र त्यसलाई एक अध्यक्षले कसरी पुरा गर्न पहल गर्न सक्छ भन्नेमा केन्द्रित भएको यो पहिलो घोषणा सभा हो । अहिले उठेका सबै उम्मेदवारहरु सामाजिक रुपमा असल व्यक्तिहरु भए पनि एनआरएन अमेरिकालाई नेतृत्व दिन सक्ने नेतृत्वको खोजिमा रहेका अहिलेको एनआरएनका मतदाताहरुहरुको चासोलाई यसले केहि हदसम्म सम्बोधन गरेको छ ।
बिगतमा एनआरएन बुझेको, एनआरएनका एजेन्डाहरुलाई सहि ठाउँमा सहि तरिकाले प्रस्तुत गरेर नेतृत्व दिन सक्ने व्यक्ति नहुँदा एनआरएन अमेरिका कुहिराको काग बन्दै आएको अबस्थामा डाक्टर अर्जुन बन्जाडे जस्ता बौद्धिक, एनआरएन बुझेका र कुनै छलकपटमा नलाग्ने स्वच्छ छविका उम्मेदवार अगाडी आउनु एनआरएनको लागि सुभ संकेत हो । मतदाताहरु पनि मान्छेको अनुहार नहेरेर उसको योग्यता र क्षमता हेरेर मतदान गर्ने हो भने मौकामा गल्ति गर्ने र पछि पछुताउने हाम्रो पुरानो रोगबाट मुक्त हुन सकिन्छ ।
डाक्टर केशव पौडेल अध्यक्ष रहेको वर्तमान कार्यसमितिको समयाबधिको अन्त्यतिर आइपुग्दा नयाँ निर्बाचनको तयारी भैरहेको छ । सो क्रममा वर्तमान कार्यसमितिकै सुनिल शाह, बिनोद तिवारी र सुर्य लम्सालले आफ्नो उम्मेदवारी घोषणा गरिसकेका छन् भने संजय थापाले समेत आफु अध्यक्षको उम्मेदवार हुने जनाएका छन् ।