एनआरएन अमेरिकाको आगामी निर्बाचनमा टेक्सासमा मात्र चार प्रतिष्पर्धीको चर्चा

एनआरएन अमेरिकाको वर्तमान कार्यसमितिको पदावधि सकिन करिव ६ महिना जति छ । एनआरएन अमेरिकाको नयाँ कार्यसमितिको कुरा शुरु हुने बित्तिकै टेक्सासको चर्चा शुरु भएको छ । ठुलो राज्य र धेरै नेपालीहरु भएको मात्र होइन एकढिक्का र सक्रिय समाज भएको कारणले अन्य राज्यका मान्छेहरु पनि टेक्ससमा को उम्मेदवार हुँदैछ भन्ने चासो राख्ने गर्छन । यतिबेला फेरी टेक्सास चर्चामा आउन थालेको छ ।
गत निर्बाचनमा वर्तमान अध्यक्ष केशब पौडेल र नर्थ अमेरिकाका क्षेत्रिय संयोजक गौरी राज जोशीबिचको “गन्धा खेल” ले टेक्सासलाई निकै चर्चाको शिखरमा पुर्याएको थियो । मुद्धा मामिला देखि सम्झौतासम्मको नाटक मन्चन भए पछि केशव पौडेल अध्यक्ष बने । क्षत्रिय संयोजक बनेर गौरी जोशी थन्किए पछि यतिबेला टेक्सासबाट अध्यक्षमा को उठ्ला भन्ने प्रश्न उठ्न थालिसकेको छ । को मात्र होइन को को उठ्लान भन्ने कुराको चर्चा परिचर्चा संगै केहि नामहरु अगाडी आइसकेका छन् ।
सुनील शाह

वर्तमान कार्यसमितिमा बरिस्ठ उपाध्यक्ष रहेका सुनील शाहले केहि समय अघि मसंगको भेटमा आफु उम्मेदवार हुने जानकारी गराएका थिए । अध्यक्ष पदको लागि चाहिने सम्पूर्ण योग्यता पुगेको र नेतृत्व क्षमता समेत रहेको समेत उनले उल्लेख गरेका छन् । एनआरएन को अभियानमा गहिरो गरी लागेको र अमेरिकामा नेपालीहरुका समस्या राम्रोसंग बुझेको हुनाले आफ्नो नेतृत्व पाएमा एनआरएनको उद्देस्य पुरा गर्न सहायता पुग्ने उनको विश्वास छ ।
सुनील शाह कम बोल्ने तर काम गर्ने व्यक्तिको रुपमा डालस क्षेत्र र अमेरिकाभर चिनिन्छन । डालस क्षेत्र मात्र होइन अमेरिकाभरि आयोजना हुने महत्वपूर्ण कार्यक्रमहरुमा सुनील शाहले भौतिक उपस्थिति नै जनाउने गरेका छन् । “मर्दा र पर्दा” को साथीको रुपमा परिचय बनाएका शाह नेपाली कांग्रेस सम्बद्ध जनसम्पर्क समितिमा पनि लामो समय काम गरिसकेका छन् । एक सफल ब्यबसायी, मृदु भाषी व्यक्तित्व र निस्कलंक समाजसेवीको रुपमा आफ्नो पहिचान बनाएका सुनील शाहको उम्मेदवारीलाई निकै महत्वका साथ हेरिएको छ ।
 कृष्ण लामिछाने

एनआरएन अमेरिकाको वर्तमान कार्यसमितिमा बोर्ड अफ डाइरेक्टर पदमा कार्यरत छन् कृष्ण लामिछाने । नेपाली समाज टेक्सासको २०१५-१७ को कार्यसमितिको अध्यक्ष रहेका लामिछाने डालस क्षेत्रमा निकै लोकप्रिय छन् । नेपाली समाज टेक्सासलाई सक्रियताको हदसम्म पुर्याएर प्रबासमा रहेका नेपाली संस्थाहरुमा अग्रस्थानमा ल्याएको जस कृष्ण लामिछानेलाई नै जान्छ । दुर्घटना देखि व्यक्तिगत समस्याहरुमा समेत नेपाली समाज टेक्सासले त्यतिबेला निकै सक्रिय रुपमा काम गरेको थियो । लामिछाने जनसम्पर्क समिति अमेरिकाको संस्थापक मध्यका एक समेत हुन् ।
हरेक समस्याको बखत सजिलै उपलब्ध हुने लामिछानेको व्यवहार कै कारण उनी एक कुशल समाजसेवीमा दर्ज भएका छन् । त्यसमाथि उनको परिवारका सबै सदस्यहरु कुनै न कुनै रुपमा समाजको सेवामा सक्रिय देखिन्छन । प्रबासीहरुको समस्या स्थानीय संस्थाहरुमा बसेर काम गरेकाले गहिरो रुपमा बुझ्ने भएकोले र एनआरएनको उद्देस्य पनि प्रबासी नेपालीहरुका समस्या समाधान नै रहेको सन्दर्भमा लामिछानेको उम्मेद्वारीले एनआरएन थप सबल हुने देखिन्छ ।
“समाज सेवा मेरो उद्देश्य हो । एनआरएनमा मेरो आबस्यकता छ वा छैन भन्ने कुरा नेपाली समुदायले निर्णय गर्ने कुरा हो । पक्कै पनि म एनआरएन अमेरिकाको नेतृत्व गरेर एनआरएन अभियानलाई अझ उचाइमा पुर्याउन चाहन्छु तर म एक्लै भन्दा सबै साथिभाइहरुको सल्लाह र सुझाव अनुसार नै अघि बढ्नेछु”, आफ्नो उम्मेद्वारी बारेको जिज्ञासामा लामिछानेले भने । एउटा समाज बुझेको र समाजको नेतृत्व समेत गरेको व्यक्तिको रुपमा प्रमाणित भैसकेका लामिछानेको उम्मेद्वारीको चर्चाले नेपाली समुदायमा तरंग पैदा भएको छ ।

अर्जुन बन्जाडे र राम पोख्रेल

सुनील शाह र कृष्ण लामिछाने बाहेक अर्जुन बन्जाडेको समेत चर्चा टेक्सासमा छ । भद्र र बौद्धिक व्यक्तित्व बन्जाडे वर्तमान कार्यसमितिमा बोर्ड अफ डिरेक्टरमा सबभन्दा बढी मतले निर्बाचित हुनु भएको थियो । एनआरएन अमेरिकाले संचालन गरेका महत्वपूर्ण योजनाहरुमा नेतृत्वदायी भूमिकामा रहेर सक्रिय बन्जाडे अमेरिकाको नेपाली समाजमा चिरपरिचित नाम हो । बन्जाडेले एनआरएन अमेरिकाको अध्यक्षमा उम्मेद्वारी दिने चर्चाले यतिबेला टेक्सासको चिसो मौसम राजनीतिक रुपमा भने तातेको महसुस गरिंदैछ ।
त्यस्तै एनआरएन अमेरिकाको गत कार्यसमितिका उपाध्यक्ष राम सी पोख्रेल पनि अध्यक्षमा उम्मेदवार हुने चर्चा टेक्सासमा गाइगुइ सुनिन थालेको छ । गत निर्बाचनमा करिव एक हजार मत ल्याएर पराजित पोख्रेल नेपाली समाज टेक्सासको पूर्व अध्यक्ष समेत हुन् ।
यसरी टेक्सासमा एनआरएन अमेरिकाको अध्यक्ष पदका आकांक्षीहरुको लर्को संगै एनआरएन को आगामी चुनाव निकै चासोको बिषय हुने देखिएको छ । टेक्सास बाहेक अन्यत्रबाट उम्मेदवारी दिनेहरु समेत राम्रै संख्यामा हुन सक्ने अबस्थामा आगामी एनआरएन अमेरिकाको निर्बाचन निकै प्रतिष्पर्धात्मक हुने अनुमान गर्न सकिन्छ । प्रस्तुति: लेखनाथ गौतम