एचडीएनपीले डिसेम्वर १ मा फन्ड रेजिंग डिनर गर्ने
डालस, टेक्सास । डालस क्षेत्रलाइ आफ्नो कर्मभूमि बनाउंदै आएको एचडीएनपले डिसेम्वर १ सनिबार एक फन्ड रेजिंग डिनर सम्पन्न गर्ने भएको छ । बेड्फ़ोर्ड स्थित स्थानीय फिस्टेल नेपाली रेस्टुरेन्टमा आयोजना हुने उक्त डिनर कार्यक्रममा डालसको नेपाली समाजका अधिकांश अगुवाहरुको उपस्थिति रहने एचडीएनपीले जनाएको छ ।
गत बर्षको कार्यक्रम अलि खर्चिलो भएकोले अहिले सामान्य तरिकाले गर्न लागिएको संस्थाका अध्यक्ष देवी आचार्यले जनाउनु भएको छ । “ठुलो होटेलमा स्तरिय कार्यक्रम गर्न त सकिन्छ, तर निकै मिहिनेत गरेर संकलित धेरै रकम होटेल र अन्य कुरामा तिर्न खर्च हुने हुनाले दाताहरुले दिएको रकम लक्षित समूहसम्म निकै कम मात्र पुग्ने भएकोले कार्यक्रम सामान्य तरिकाले रेस्टुरेन्टमा गर्न लागिएको हो” देवी भन्नुहुन्छ ।
संकलित रकमबाट फोर्ट वर्थ क्षेत्रमा रहेका घरबार बिहिनहरुलाई अस्पताल जान, काममा जान वा अन्य आबस्यक प्रयोजनको लागि गाडी खरिद गर्न प्रयोग गरिनेछ । त्यस्तै एचडीएनपीले लामो समय देखि संचालन गर्दै आएका योजनाहरुमा लागु गरिने संस्थाले जनाएको छ ।