सरकारी संचार माध्यमको पक्षमा डोनाल्ड ट्रंप

जसरी प्रजातन्त्र र लोकतन्त्रका धेरै कमजोरीहरु भए पनि यो संसारमा विकल्परहित छ, कतिपय संचार माध्यमहरु भरपर्दो सूचनाका बाहक नहुँदा नहुँदै पनि अहिलेको बिस्वमा स्वतन्त्र मिडियाको भूमिका अपरिहार्य छ । प्रजातन्त्र बलियो भएका सम्बृद्ध मुलुकहरुमा त स्वतन्त्र प्रेस निकै शक्तिशाली छ । अमेरिका त्यसको उदाहरण हो । संबैधानिक रुपमा मात्र नभएर अमेरिकाको प्रेस संस्थागत रुपमा पनि निकै शक्तिशाली मानिन्छ । संविधानको पहिलो संविधानले स्पस्ट रुपमा प्रेस र अभिव्यक्ति स्वतन्त्रताको ब्याख्या गरेर अमेरिकाको प्रेसलाई काम गर्न सजिलो बनाएको छ ।
प्रेसको काम शक्तिमा रहेकाहरुलाई जिम्मेवार बनाउन प्रश्न गर्नु हो । उनीहरुले गरेका राम्रा कामहरुको मात्र कुरा गरेर भजन गाउने प्रेसको काम पक्कै होइन । गर्छु भनेका कामहरु के के गरे के के गरेनन भनेर प्रश्न गर्नु प्रेसको आफ्नो धर्म हो । शक्ति र सत्ताको दम्भमा राजनीतिक नेतृत्व निरङ्कुश हुन जहिले पनि प्रयास गर्छ । त्यस्ता गतिबिधिहरुलाई जनता सामु लैजानु प्रेसको कर्तब्य हो । प्रजातन्त्रमा विश्वास गर्नेहरु प्रेसको स्वतन्त्रतामा पनि विश्वास गर्छन ।

प्राय जसो सत्तामा बस्ने निरङ्कुश सोंच भएका मान्छेहरु प्रेसलाई बैरी ठान्ने गर्छन । निरङ्कुश शासन भएका देशहरुमा प्रेसलाई नियन्त्रण गरिन्छ । सरकारकै हातमा संचार माध्यमहरु हुन्छन । ती संचार माध्यमहरुलाइ आफ्नो भजन गाउन प्रयोग गर्छन ।
२ बर्ष अघि अमेरिकामा भएको रास्ट्रपतिको निर्बाचनमा डोनाल्ड ट्रंप निर्बाचित भए पछि उनले प्रेस माथि लगातार आक्रमण गरिरहेका छन् । प्रेसलाई जनताको शत्रुको रुपमा चित्रित गर्नु, उनीहरुले प्रशारण गरेका सामाग्रीहरु आफ्नो पक्षमा नभएकै आधारमा झुठो समाचार भनेर दैनिक आलोचना गर्नु उनको दिनचर्या जस्तै भएको छ । सिएनएन, न्यु योर्क टाइम्स, वाशिंटन पोस्ट, एमएसएनबिसी जस्ता मुलधारका संचारमाध्यम र यिनका रिपोर्टरहरुको नामै किटेर ट्रंपले आक्रमण गर्ने गरेका छन् । अघिल्लो हप्ता मात्र सीएनएनका व्हाइट हाउस स्थित सम्बाददाता जिम अकोस्टालाइ व्हाइट हाउसमा छिर्न प्रतिबन्ध समेत लगाइएको थियो ।
नोभेम्बर २६ मा उनले अर्को बिबादास्पद ट्विट गरे । जसमा अमेरिका बारेको संचार अन्य देशमा सिएनएन मार्फत सुनिने तर सीएनएन अमेरिका प्रति बफादार नभएको भन्दै अमेरिकाले पनि राज्यकै निजी संचार माध्यम शुरु गर्नु पर्ने धारणा व्यक्त गरेका छन् । अमेरिकाले सरकारी संचार माध्यम संचालन गरेको खण्डमा अमेरिकाको राम्रो कुरा मात्र बिस्वसामु लैजान सकिने उनको तर्क छ । अनाबस्यक, तुकरहित र बिबादास्पद ट्विट गरेर चर्चामा रहन प्रयास गर्दै आएका ट्रंपको यो संदेशले अमेरिकी मिडियालाई फेरी झस्काउने काम गरेको छ । संविधानत: यो काम सम्भव त छैन तर यसले संचार माध्यमहरुलाइ प्रतिरक्षात्मक अबस्थामा पुर्याउन सक्ने देखिन्छ । विश्लेषण: लेखनाथ गौतम