डालसबासीहरुको नेपाल जर्नीलाई ठुलो सहयोग छ

समाजसेवा राजनीतिक खेल होइन । पैसा कमाएर समाजमा ठुलो मान्छे बन्न र राजनीति गर्न समाजसेवाको कुरा गर्नेहरु सच्चा समाजसेवी होइनन । तर आफ्नो छाक काटेर, आफ्नो परिवारको समय चोरेर थोरै भए पनि समाजको लागि केहि गर्नु ठुलो कुरा हो । त्यस्ता व्यक्तिहरु सहि अर्थमा समाजसेवी हुन् । त्यसमाथि बिदेसको व्यस्त र कस्टपूर्ण जिन्दगीका महत्वपूर्ण क्षणहरु आफ्नो मातृभूमिको लागि लगाउनु धेरै ठुलो कुरा हो ।
२०१५ को डिसेम्बरमा “नेपाल जर्नी” नामक संस्था खोलेर समाजसेवामा होमिएकी एक पात्र हुन् मौसमी श्रेष्ठ । आफ्नो काममा भन्दा नेपाल जर्नीको काममा बढी सक्रिय देखिने मौसमी सहयोग गर्न “दवाबमुलक आग्रह” गर्ने गरेको भनेर समेत आलोचित हुने गरेकी छिन । आलोचना गर्नेहरु उनलाई सहयोग नगर्नेहरुलाई “घुर्की” देखाउने गरेको समेत गुनासो गर्छन ।

तर उनलाई नजिकबाट बुझ्नेहरू यी सबै स्वाभाविक मान्छन । यति नगरेको भए छोटो समयमा नेपाल जर्नीले यति धेरै काम गर्न सक्ने थिएन । त्यहि उनको सक्रियताकै कारण ५ बर्ष नबित्दै नेपाल जर्नीले नेपालमा ५ वटा पुस्तकालय निर्माणमा पूर्ण र आंसिक सहयोग गर्न सफल भएको हो । त्यसबाहेक दर्जनौ अन्य सहयोगी कामहरुमा नेपाल जर्नीले सहयोग गरिसकेको छ । यहि सेरोफेरो र आगामी डिसेम्बर ८ मा हुन लागेको फन्ड रेजिंग डिनरको वरिपरि रहेर मैले नेपाल जर्नीकी अध्यक्ष मौसमी श्रेष्ठसंग कुरा गरेको थिएँ । त्यसकै सम्पूर्ण पाठ :

के गर्दै हुनुहुन्छ आजकल ?
दैनिक आफ्नो काम गर्दैछु । काम नगरी बिदेसमा सुख छैन । त्यो समयलाई ब्यबस्थित गरेर नेपाल जर्नीको काममा पनि लागेकी छु । समाजसेवाका ससाना काम गर्न उमेर, आम्दानी र समयले छेक्दैन भन्ने मेरो विश्वास छ । सोहि विश्वासका साथ आफ्नो सिमित साधन, समय र श्रोतहरुको बाबजुद मन मिल्ने साथीहरुसंग मिलेर यो संस्था खोलेका छौं । यसैलाई फ़लाएर फुलाएर नेपालका केहि भए पनि गरिव बालबालिकाहरुको मुहारमा उज्यालो ल्याउन काम गरिरहेका छौं । त्यस्तै उद्देस्यको लागि डिसेम्बर ८ मा एउटा फन्ड रेजिंग डिनर गर्दैछौं । त्यसैको तयारी गर्दैछौं ।
केको लागि गर्दै हुनुहुन्छ यो फन्ड रेजिंग डिनर ?
चितवन जिल्लामा एउटा सुबिधासम्पन्न र अपाङ्ग मैत्री पुस्तकालय र सामुदायिक भवन बनाउने हाम्रो योजना छ । त्यसको लागि भरतपुर महानगरपालिकाले जग्गा दिने सहमति पनि भैसकेको छ । उक्त परियोजनाको लागि ५ करोड नेपाली रुपैयासम्म लाग्ने प्रारम्भिक अनुमान छ । हामीले मात्र यति ठुलो रकम उठाउन गाह्रो हुने भएकोले अन्य सहयोगी संस्थाहरुको खोजि समेत जारी छ । तर हाम्रो तर्फबाट जति सकिन्छ गर्ने र यसको नेतृत्व हामीले नै गर्ने योजना छ । सोहि प्रयोजनको लागि अर्थ संकलन गर्ने उद्देश्यले यो कार्यक्रम गर्न लागिएको हो ।
तयारीको लागि के गर्दै हुनुहुन्छ ?
कार्यक्रमको घोषणा, मिति र स्थलको घोषणा संगै एक किसिमको माहोल सिर्जना भैसकेको छ । टिकेट प्रिन्ट भएर बिक्रीको लागि गैसकेको छ । प्रयोजन गर्ने व्यक्ति र कम्पनीहरुको लागि प्याकेज वितरण शुरु गरिएको छ । डालसमा रहेको टीमले आफ्नो तर्फबाट सक्रियतापुर्बक काम गरिराखेको छ । प्रायोजक खोज्ने, टिकेट बिक्रि गर्ने र अन्य सहयोगको लागि हामी सक्रिय छौं । नतिजा सकारात्मक दिशामा अघि बढेको छ ।

बिदेसमा बिभिन्न नाममा पैसा उठाउने तर त्यसको हिसाब किताब कतै नदेखिन रोग देखिन्छ । त्यसले गर्दा चन्दा दिन पनि गाह्रो मान्न थालेका छन् । तिनीहरुलाई के भन्नुहुन्छ ?

हाम्रो उद्देस्य यो संस्था खोलेर ठुलो हुने, पैसा कमाउने होइन । पैसा कमाउने नै हो भने यसमा लगाएको समय काम गर्ने हो भने धेरै कमाउन सकिन्छ । हामीले यहाँ उठाएको रकम भन्दा धेरै नेपालमा लगानी गरेका छौं । यसको हिसाबकिताब हाम्रो वेबसाइटमा पनि उपलब्ध छ भने कसैले व्यक्तिगत रुपमा अनुरोध गरेमा पनि उपलब्ध गराउन सकिन्छ । यहीं दर्ता गरिएको संस्था भएकोले यसको आम्दानी र खर्चको हिसाब किताब सरकारलाई पनि बुझाउनु पर्छ । त्यो भन्दा महत्वपुर्ण कुरा नियत हो । हामी खराब नियत लिएर समाजसेवामा लागेका होइनौ । नजिकबाट मृत्यु नियालिसकेपछी नमर्दै केहि गर्नु पर्दो रहेछ भन्ने सोंचेर यो काम गरेका हौँ । जहिले सम्म सक्छौं, गर्छौं । सकिन्छ दिन्छौं, लिने काम गर्दैनौ । त्यसमा चन्दादाता र सम्बन्धित सबैलाई ढुक्क हुन आग्रह गर्छौं ।
धेरै काम पनि गरिसक्नु भएको छ । संस्था पनि डालसमा बढी सक्रिय छ । डालसको नेपाली समुदायको कत्तिको सहयोग पाउनु भएको छ ?
डालसमा धेरै संस्थाहरु छन् । अधिकांश संस्थाहरु नेपालमै केहि गर्ने भनेर खोलिएका छन् । कतिपयले फाउन्डेसन खोलेर नेपालमा सेवा गरिरहनु भएको छ । हामी पनि नेपालमा केहि गर्न भनेर नै सक्रिय छौं । धेरै संस्था भए पनि हामीले सहयोग पाइरहेका छौं । उहाँहरुकै सहयोगले हामीले यति धेरै काम गर्न सकेका हौँ । डालसमा बस्ने एउटी चेलीले गर्ने समाजसेवी काममा डालसले नगरेर कसले गर्छ त ? सबै संस्थाहरुका चन्दादाताहरु प्राय एउटै हुने हुँदा उहाँहरुलाई पनि समस्या छ । त्यो हामीले बुझ्छौं । बिभिन्न चुनौतीका बाबजुद समुदायको हामीलाई पूर्ण सहयोग छ र आगामी कार्यक्रमहरुमा पनि सहयोग हुनेमा आशाबादी छौं ।
अन्त्यमा केहि भन्नु छ कि ?
सबै कुरा भनि नै सकें । हाम्रो निजी उद्देस्य केहि छैन । नेपालमा सेवा गर्ने नै हाम्रो स्वार्थ हो । यसको लागि नेपालमा हाम्रो नेटवर्क बनिसकेको छ । नेपाल लगायत कतिपय देशहरुमा शाखा पनि खोलिसकेका छौं । तपाईंले दिएको चन्दा यहाँ हुने खर्च कटाएर शतप्रतिशत जुन उद्देश्यका लागि उठाइएको हो, त्यसैमा खर्च हुन्छ । यो महान कार्यमा व्यक्तिगत र संस्थागत रुपमा समेत संलग्न हुन चाहनु हुन्छ भने हामीसंग सम्पर्क गर्न सक्नुहुन्छ । यो परियोजना नेपालकै नमुनाको रुपमा लैजाने हाम्रो उद्देश्य छ । त्यसैले आउनुहोस, झिना मसिना कुरा छोडेर यो महान कार्यमा सहकार्य गरौँ । तपाईंहरुको साथ र सहयोगको लागि हाम्रो ढोका संधै खुल्ला छ । प्रस्तुति: लेखनाथ गौतम