अक्टोबर १४ मा भास्तिका-डालस गुर्खा फुटबल क्लब दशैं कप हुने

डालस टेक्सास । बिजय दशमीको अवसर पारेर डालसमा लामो समय देखि गरिंदै आएको दशैं कप फुटबल प्रतियोगिता यो बर्ष पनि आयोजना गरिने भएको छ । हिजो अर्भिंग स्थित रमाइलो रेस्टुरेन्टमा आयोजित घोषणा कार्यक्रममा डालस गुर्खा फुटबल क्लबले उक्त जानकारी गराएको हो । सो अबसरमा क्लबका अध्यक्ष विनोद बिस्टले समग्र कार्यक्रमको उद्देश्य सहित कार्यक्रमको खाका प्रस्तुत गरेका थिए । उनले भनेका कुरा जस्ताको तस्तै :

हामीले बिगत ७ बर्ष देखि दशैंको अबसरमा फुटबल प्रतिष्पर्धा आयोजना गर्दै आएका छौं । आउँदो अक्टोबर १४ गते डालस नजिकै रहेको ग्रेपभाइन तालको छेउमै यो खेल आयोजना गरिएको छ । यसलाई हामीले दशैंको अवसरमा हुन लागेकोले यसलाई पर्बकै रुपमा मनाउने योजना गरेका छौं । त्यसको लागि साना बालबालिकाहरुको लागि खेल्ने, रमाउने साधनहरुको व्यवस्था गरेका छौं भने नेपाली परम्परागत खानको समेत त्यहाँ व्यवस्था गरिएको छ ।
यो बर्ष बिगत जस्तै एउटा साइडमा ५ जना खेलाडीले नै खेल्नेछन । बिगतमा जस्तै १४ बर्ष मुनिकाको लागि पनि खेलहरु हुनेछन । तर यो बर्ष ३५ बर्ष काटेका प्रौढहरुको लागि पनि खेल आयोजना गरेका छौं । स्थानीय र राज्य बाहिरका जो कसैले पनि यो अबसरमा आफ्नो टीम बनाएर खेल्न सक्नेछन । यो बर्ष टुर्नामेन्ट जित्ने टीमलाई पछिल्ला बर्षहरुमा भन्दा बढी पुरस्कार दिइएको छ । यो पन्ध्र सय डलरबाट दुइ हजार डलर बनाइएको छ । प्रौढहरुको भने एक हजार डलर छ ।

हामीले लामो समय सम्म दशैंको अबसरमा फुटबल टुर्नामेन्ट गरे पनि नेपाली समुदायका डालसमा सक्रिय संघ संस्थाका प्रतिनिधिहरुको उपस्थिति कमै पाउने गर्छौं । आर्थिक रुपमा हामीलाई पक्कै समस्या छ तर त्यो हामी जेनतेन जोहो गर्दै आएका छौं । तर हाम्रो टुर्नामेन्टमा समुदायको उपस्थिति पनि एउटा ठुलो उत्प्रेरक तत्व हो । खेलाडीहरु दर्शक रुचाउँछन् । तर धेरै खेलहरुमा दर्शक नहुने समस्या हाम्रोमा छ । आम दर्शकहरुको उपस्थिति के कस्तो हुन्छ त्यो त अन्य धेरै कुराहरुले असर पर्छ तर कमसेकम समुदायका अगुवाहरुको उपस्थिति आबस्यक हुन्छ । तर सानोतिनो रमाइलोको लागि घन्टौं टाढा गाडी रिजर्ब गरेर जाने हाम्रा अगुवाहरु १५ मिनेटको दुरीको फुटबल खेल हेर्न आउनु हुन्न । आजको घोषणा कार्यक्रमको लागि सबिनय अनुरोध गरेका कतिपय व्यक्तिहरु आउनु भएन । तर हामी यो कार्यक्रमलाई सफल बनाउन कटिबद्ध छौं । त्यसको लागि हामीलाई आम समुदायको सहयोग भने अत्यन्त खाँचो छ ।
साँझ ८ बजे शुरु गर्ने भनिएको उक्त घोषणा कार्यक्रम समयमै शुरु भएर समयमै अन्त्य भएको थियो भने त्यसलाई डालस देखि भर्जिनियाका केहि अनलाइनहरुले प्रत्यक्ष प्रशारण समेत गरेका थिए । डालसमा कार्यरत कतिपय अनलाइनहरुका प्रतिनिधिहरु भने निमन्त्रणाको बाबजुद उपस्थित भएका थिएनन ।