अगस्त २६ आइतबार अर्भिंगस्थित नेपाली मन्दिरमा रक्तदान कार्यक्रम हुँदै
डालस, टेक्सास । रक्तदान जीवनदान हो भन्ने गहिरो अनुभूति गर्दै त्यसलाई वास्तविकतामा परिणत गर्न अमेरिकाको टेक्सासमा स्थापित केहि संस्थाहरु मिलेर रक्तदान कार्यक्रम यहि आउँदो अगस्त २६ आइतबार संचालन गर्ने भएका छन् । ब्लड डोनर्स अफ अमेरिका, नेपाली जनसम्पर्क समिति, नेपाली आध्यात्मिक तथा सांस्कृतिक केन्द्र र नेपाली समाज टेक्सासको अगुवाइमा यो मानवसेवा गर्ने कार्यक्रम तय भएको हो । रक्तदान कार्यक्रम नेपाली मन्दिर अर्भिंगमा बिहान १० देखि अपरान्ह ४ बजे सम्म हुनेछ ।
एक जनाको रगतले औसत ३ जनाको जीवनको रक्षा हुनसक्ने तथ्यांक छ । रगतमा रहेका सेलहरु मर्ने र बन्ने प्रक्रिया हरेक सेकेन्ड चलिरहेको हुन्छ । रगत दिंदा कमजोर भइने भन्ने सोंचाई कतिपयमा पाइन्छ । रगत दिंदा मोटो सुइ लगाउँदा दुख्छ भन्ने डरले समेत कतिपय रगत दिन हिच्किचाइरहेको पाइन्छ । तर मेरो अनुभवमा त्यस्तो केहि हुन्न । करिव १५ मिनेटको प्रक्रियामा कत्ति पनि नदुखाई तपाईंको रगत निकालिन्छ । रगत निकाल्नु अघि रक्त परिक्षण समेत गरिन्छ जसले रक्तदातामा केहि समस्या छ भने पनि थाहा पाइन्छ । जीवनदान बाहेक रक्तादताको लागि यो अर्को बोनस फाइदा हो ।
कार्टर ब्लड केयर मार्फत रगत आबस्यक व्यक्तिहरु सम्म पुर्याउने गरिन्छ । यो रक्तदान कार्यक्रम पनि कार्टर ब्लड केयरको सहयोग मै हुन लागेको छ । तर समयको चापको कारण जम्मा ५ घण्टा उनीहरुले हामीलाई समय दिनेछन । त्यसको लागि यसपटक अपोइण्टमेन्टको व्यवस्था समेत मिलाइएको छ । सहयोगी संस्थाहरुका जो कसैलाई पनि सम्पर्क गरेर आफ्नो अनुकुल समय मिलाएर रक्तदान गर्न जान सकिन्छ जसले त्यहाँ गएर कुर्नु पर्ने झन्झट अन्त्य गर्नेछ । बिना अपोइण्टमेन्ट जानेले भने कुर्नु पर्ने हुनसक्छ ।
यो कार्यक्रम बिपी जयन्तिको अबसरमा गर्न लागिएको नेपाली जनसम्पर्क समितिले जनाएको छ ।
