डालसमा नेजा एनआरएन अन्तरक्रिया सम्पन्न: पत्रकारसंग समुदायको अपेक्षा

डालस, टेक्सास । एनआरएन अमेरिकाले डालसमा अमेरिकामा रहेका पत्रकारहरुको साझा संगठन नेजासंग एक अन्तरक्रियात्मक कार्यक्रम सम्पन्न आयोजना गर्यो । बेड्फ़ोर्ड स्थित स्थानिय फिस्टेल रेस्टुरेन्टमा सम्पन्न उक्त अन्तरक्रियामा अमेरिकाका विभिन्न राज्यबाट आउनु भएका एनआरएनका पदाधिकारीहरु, नेजाका नबनिर्बाचित पदाधिकारीहरु उपस्थित हुनुहुन्थ्यो । कार्यक्रमको उद्देस्य समुदायसंग नेजाको अन्तरक्रिया गर्नुको साथै नेजाको सियाटलमा सम्पन्न अधिबेशनबाट निर्बाचित पदाधिकारीहरुसंग परिचय गर्नु पनि थियो ।
एनआरएन अमेरिकाका कार्यबाहक अध्यक्ष सुनिल शाहको सभापतित्वमा सम्पन्न भएको उक्त कार्यक्रममा नेजाका अध्यक्ष सुदिप पन्त र नेपाल सरकारका पूर्व सिंचाई मन्त्री दिपक गिरी लगायत स्थानीय संघ संस्थाका प्रतिनिधिहरु र पत्रकारहरुको उपस्थिति थियो । 

समुदायका अगुवाहरुले के भने ?
कतिपयले पत्रकारहरुका समस्या बुझे पनि धेरैले पत्रकारहरुसंग समुदायको अपेक्षा र गुनासा व्यक्त गरे । उनीहरुले सकारात्मक समाचार सम्प्रेषणको आशा गरे । त्यति मात्र होइन “हाम्रो र राम्रो” लेखिएको समाचार मात्र प्रकाशित गर्नु पर्ने धेरैको अपेक्षा देखियो । नकारात्मक समाचारले समाज नबन्ने उल्लेख गरे उनीहरुले । यसो गर्नु पर्छ र उसो गर्नु ठिक हुन्छ भनेर उनीहरुले पत्रकारहरुलाई सुझाव दिए । कतिपयले पत्रकारहरुले आफ्नो नियमित कामका बाबजुद समुदायमा भैरहेका गतिबिधिहरुका समाचार सम्प्रेषण गरेर समाजलाई गुन लगाएकोमा धन्यवाद दिए । यसरी आफ्नो विचार व्यक्त गर्नेहरुमा क्यालिफोर्नियाबाट उमा थापा देखि टेक्सासबाट यमुना भट्टराई समेत हुनुहुन्थ्यो । त्यस्तै टेक्सास कै समाजसेवी धनन्जय ढकाल देखि अर्जुन बन्जाडे, कपिल अधिकारी, बिएन पन्त र थलराज पन्त समेतले आफ्ना गुनासा र सुझाव प्रस्तुत गर्नु भएको थियो ।

पत्रकारहरुले के भने ?
पत्रकारहरुका आफ्नै उत्तरहरु थिए । हामी पूर्णकालीन पत्रकारिता गर्दैनौ, हामी पनि समाजसेवा गरेका छौं । हामी संग साधन र श्रोत को कमि छ । हामी न त सबै ठाउँमा पुग्न सक्छौं न त सबै ठाउँका समाचार प्रेषित गर्न । हामीलाई बुझ्नुस र हामीलाई समाजसेवा गर्न सहयोग गर्नुस । कमसेकम तपाईंहरुका संघ संगठन र संस्थाहरुले गरेका काम र गर्न लागेका गतिबिधिहरुबारे जानकारी दिनुस । त्यस संग सम्बन्धित सम्पूर्ण सूचना उपलब्ध गराउनुस । हामीले सकेसम्म सबैका कुरा हाम्रा संचार मध्यममा प्रसार गर्छौं । तपाईंहरुले गर्ने कार्यक्रममा उपस्थित हुनको लागि निमन्त्रणा गर्नुस । तपाईंले गरेका कार्यक्रम प्रचार गर्न तपाईंहरुलाई आबस्यक हो, पत्रकारहरुलाई होइन । औपचारिक रुपमा निमन्त्रणा गर्दा उनीहरुलाई पनि आफुलाई सम्मान गरिएको अनुभव गर्छन र त्यहाँ आएर तपाईंहरुका कुरा समाज सामु ल्याउन आफ्नो समय र उर्जा खर्च गर्न तयार हुन्छन । फेसबुकमा स्टाटस हालेको भरमा पत्रकारहरु आएनन र समाचार हालेनन भनेर गुनासो नगर्नुस ।

समाचार र बिचारमा इधर उधर गरिएको गुनासो पनि त्यहाँ गरियो । कमसेकम कुन समाचार हो र कुन विचार हो छुट्ट्याउन गाह्रो भएकोले त्यो स्पस्ट हुन जरुरी रहेको भन्ने कुरा पनि त्यहाँ आयो । यो बास्तवमा निकै कठिन कुरा हो । अहिलेको बिस्वमा प्रसारित र प्रकासित समाचारहरुमा विचार समेत घुसाइएको हुन्छ । एउटै घटनाको रिपोर्टिंग फरक समाचार माध्यममा फरक तरिकाले विश्लेषण गरिन्छ । घटनालाई कुन कोणबाट रिपोर्टिंग गर्ने भन्ने कुराले पनि त्यसको निर्धारण गरेको हुन्छ । बिशुद्ध समाचार मात्र भेट्टाउन अहिले निकै मुस्किल छ ।
त्यस्तै मेडियाको काम जस्ताको तस्तै रिपोर्टिंग मात्र गर्दैन, त्यहाँ भएका कमी कमजोरीहरु समेत औंल्याउने गर्छ । यो गर्छु र त्यो गर्छु भनेर चुनाव जितेको नेताले भनेको किन गरिनस भनेर प्रश्न गर्ने पत्रकारलाई मन पराउने कुरै भएन । आजकै कार्यक्रममा विचार व्यक्त गरेका एक व्यक्तिले आफ्नो नराम्रो समाचार मात्र प्रसारण गरेकोमा पत्रकारहरुलाई गाली गर्दै अरु कसैको बारेमा नराम्रो समाचार लेख्न अनुरोध गरे ।
जसले जे भने भए गरेका सबै कुरा समाचार बन्दैनन् । सबै समाचारहरु पत्रकारहरुले पनि लेख्दैनन । उनीहरुले त्यसमा पक्कै केहि न केहि सेन्सर गर्छन भन्नेमा भ्रममा पर्नु जरुरी छैन । त्यस्तै समाचार बनाउने व्यक्तिहरु पनि आफ्नो मात्र समाचार लेखोस र राम्रो मात्र लेखोस भन्ने चाहन्छन । आफ्नो कमजोरी लेख्यो भने कित्ता काटेर डांडो कटाउने र आफ्नो प्रशंसामा लेख्यो भने जाती मान्नेहरुको बिचमा बसेर आफ्नो व्यक्तिगत पहिचान जोगाएर अघि बढ्नु भने पत्रकारहरुको लागि ठुलो चुनौती हो ।