ओक्लाहोमामा गोली हानिएकी नेपाली चेली रचना श्रेष्ठको स्वास्थ्य सुधारतर्फ: सहयोगको लागी अपिल

सोमबार दिउसो दुइ बजे ओक्लाहोमा राज्यको अटोका सिटीमा आफु र परिवारको रोजीरोटीको लागि कार्यरत रचना श्रेष्ठ माथि एक अपराधिक मानसिकता भएको व्यक्तिले अन्धाधुन्ध ८ गोलि प्रहार गर्यो। उनले भुँइ सफा गरिरहेको अबस्थामा पछाडीबाट उनलाई गोली हान्यो । गोली हानिसकेर उक्त अपराधी नजिकैको म्याक डोनाल्ड नामक “छिट्टै खान पाइने” रेस्टुरेन्टमा गएर आराम गरेर बस्यो । नेपाली चेलीको उपचार गर्न हेलिकप्टरबाट ओक्लाहोमा राज्यकै टुल्सा भन्ने ठाउँमा लगिएको छ ।

यतिबेला उनको अवस्था चिन्ताजनक तर स्थिर छ । अत्यधिक रक्तश्रावका कारण हिजै रगत दिइएको छ । शरीरका बिभिन्न भागमा धेरै प्रकारका उपकरण लगाइएकोले उनि हलचल गर्न सक्ने अबस्थामा छैनन् तर उनले टाउको हल्लाउने, हातखुट्टा चलाउने गरेको जानकारी प्राप्त भएको छ । ८ वटा मध्ये ५ गोलीहरु निकालिसकिएको छ भने ३ वटा निकाल्न बाँकी छ । बिशेष गरी संबेदनशील ठाउँहरुमा हानिएका गोलीहरु निकाल्दा भबिस्यमा आइपर्ने शारीरिक अबस्थालाई समेत ख्याल गर्नु पर्ने हुनाले सतर्कता अपनाइएको छ । कतिपय ठाउँमा गोली निकाल्दा ठिक भए पछि हिंडडुल गर्न समस्या नहोस भनेर यसो गरिएको हो ।

डाक्टरहरुका अनुसार रचना सामान्य अबस्थामा आउने सम्भावना प्रबल छ । मुटु र टाउकोमा सिधै गोली नलागेकोले सन्चो हुने सम्भावना अत्यधिक रहेको डाक्टरहरुले जनाएका छन । यो खुसीको समाचार हो । साढे दुइ बर्षे छोरा उनको प्रतिक्षा गरिरहेका छन् । टुल्सा सिटीमा दिन आज उज्यालो छ । गर्मी भए पनि हावाहुरी लागेको छैन, लाग्छ रचना केहि दिन पछि मुस्कुराउँदै हामी सामु आउनुहुनेछ ।
रचनाको परिवार अमेरिकी सपना बोकेर करिव एक बर्ष अघि अमेरिका आएको हो। श्रीमान कपिल श्रेष्ठ र अढाई बर्षीय छोरासंगै करिव ९ महिना अघि मात्र उनीहरु ओक्लाहोमा स्थित अतोका नामक यो अत्यन्त सानो सिटीमा गएका थिए । २ हजार जति मात्र जनसंख्या भएको यो सिटीमा अन्य नेपालीहरु समेत ब्यबसाय गरेर बसेका छन् ।
डालस क्षेत्रमा नेपालीहरुको ठुलो संख्या छ । व्यापार गर्नको लागि डालस महँगो हुन थाले पछि धेरै नेपालीहरु गाउँतिर जाने गरेका छन् । गाउँमा कम लगानीमा ब्यबसाय शुरु गर्न सकिने, सुरक्षित बसोबास हुने हुनाले गाउँतिर जाने नेपालीहरुको संख्या बढेको छ । २/३ बर्ष गाउँतिर बसेर दुख गरिसके पछि अलि पैसा लिएर डालस आएर ब्यबसाय गर्ने उनीहरुको योजना हुन्छ । रचनाको परिवार पनि करिव डालसतिरै फर्किने योजना बनाइसकेको थियो ।
जे होस् हाम्रो एक नेपाली परिवारले यहाँ एक अकल्पनीय बिपत्ति व्यहोरिरहेको छ । आफ्नो र बालबच्चाको सुन्दर भबिस्यको चाहना सहित अमेरिका प्रवेश गरेको त्यो सुन्दर परिवारको घरमा यतिबेला विपदले घेरेको छ । उनको उपचार र परिवारको सहयोगको लागि गोफ़ण्ड मार्फत सहयोगको लागि सबैमा अपिल समेत गरिएको छ । बिगतमा भएका घटनाहरुमा जस्तै संबेदनशील नेपाली मनहरुले सहयोग गर्नेमा चेली रचनाका पति कपिल श्रेष्ठ आशाबादी देखिन्छन । उनको अवस्था सुध्रिएको र ठिक भएको शुभकामना नोट सहित यथासक्य सहयोग गर्न टेक्सास र ओक्लाहोमाको नेपाली समाजले सबैमा अनुरोध गरेको छ ।