डालस एभरेस्ट लायन्स क्लबको “एन इभिनिंग इन नेपाल” सम्पन्न
डालस, टेक्सास । डालस एभरेस्ट लायन्स क्लबले हालै “एन इभिनिंग इन नेपाल” कार्यक्रम सम्पन्न गरेको छ । लायन सुरेश बस्यालको संयोजकत्वमा जुन १६ मा उक्त कार्यक्रम सम्पन्न भएको हो । एन इभिनिंग इन नेपाल बिगत धेरै बर्ष देखि हरेक बर्ष संचालन हुँदै आएको छ । लायन्सले गर्ने कार्यक्रमहरु छोटा, मिठा र उपलब्धिपूर्ण हुन्छन । यो साँझ पनि त्यस्तै रुपमा सम्पन्न भयो ।
कार्यक्रम निर्धारित समयमै शुरु भयो, साँझ ७ बजे र निर्धारित समयमै करिब १० बजे समाप्त भयो । बोल्ने बक्ताहरुले आफुलाई दिएको समय भित्रै आफ्ना कुरा राखे । पाहुनाहरुलाई स्वागत लायन थलराज पन्तले गरे भने प्रेरणादायक मन्तब्य लियो सफल लामिछानेले दिए । क्लबले गरेका कामहरु बारे कार्यक्रम संयोजक तथा दोश्रो उपाध्यक्ष सुरेश बस्यालले रिपोर्ट प्रस्तुत गरे । त्यसपछि लायन्स क्लबका बिभिन्न ओहोदाका व्यक्तिहरुले आफ्ना सारगर्भित मन्तब्य व्यक्त गरे ।
एन इभिनिंग इन नेपालको प्रमुख उद्देश्य नेपालको परिचय, नेपालीहरुको प्रबाशमा परिचय, नेपाली संस्कृतिको प्रबर्धन र नेपालमा केहि सहयोग जुटाउन प्रयत्न गर्नु हो । सोहि अनुसार नेपाली सांस्कृतिक कार्यक्रम बक्ताहरुको मन्तब्य पछि शुरु भयो । बिशुद्ध हाम्रो र राम्रो संस्कृति झल्काउने नृत्यहरु प्रस्तुत गरिए । नेपालको संस्कृति झल्काउने चित्रहरु प्रदर्शन गरियो । पूर्व क्लब अध्यक्ष राधाकृष्ण काफ्लेले संचालन गरेको यो छोटो सांस्कृतिक कार्यक्रममा अनु काफ्लेले नृत्य प्रस्तुत गरिन । क्लबका अध्यक्ष बिएन पन्त र उहाँकी धर्मपत्नी बिमला पन्तले चट्ट रुमाल क्या मालुम कोटैको खल्तीमा भन्ने गीतमा नृत्य गरेर सबैलाई चकित र रोमान्चित बनाए ।
डालसमा नाच्नेहरुको कमि छैन । तर केहि मात्र व्यक्तिहरु छन् जसले साँच्चिकै भने जस्तो नृत्य गर्छन । त्यसमध्ये सुलोचना खनाल पनि एक हुन् । पातलो र आकर्षक शरीर भएकी सुलोचनाको नाच हरेक कार्यक्रमको मुख्य आकर्षण हुनेगर्छ । लायन्सको यो कार्यक्रममा पनि उनले चोरेर लग्यो मन भन्ने गीतमा आफ्नो जादुगरी नृत्य प्रस्तुत गरिन । दर्शकहरु प्रफुल्ल बने । त्यसपछि बिमला सिग्देलले कम्मर माथि पटुकी भन्ने गीतमा आफ्नो उत्कृस्ट नृत्य प्रस्तुत गरिन । त्यसपछि डिजे शुरु भयो जसमा डालसका एक चर्चित डिजे प्रशान्तले नेतृत्व गरेर सबैलाई रमाइलो गराए । कार्यक्रम निर्धारित समयमा शुरु भयो र अन्त्य पनि ।
डालस लायन्स क्लबमा ठुलो भिडभाड छैन । जति सदस्यहरु छन् सबै सक्रिय छन् र केहि दिनु पर्छ समाजलाई भन्ने भावना बोकेका व्यक्तिहरु छन् । उनीहरुलाई पदको लोभ छैन । अध्यक्ष र महासचिव बीच अधिकारको सीमाबारे कुनै लफडा छैन । सबै जना दिन मात्र जाने भएकोले यो बिशुद्ध सामाजिक संस्थाको रुपमा डालस क्षेत्रमा चिरपरिचित छ । यस्ता संस्थाहरु जति खुल्यो त्यति समाज सुन्दर हुँदै जान्छ भने भ्रस्ट आचरण भएका व्यक्तिहरु सम्मिलित संस्थाहरु एउटा पनि समाजको लागि घाँडो हुन सक्छ ।