संगीतकर्मी कल्याणकारी कोषमा एकैदिन ६८ हजार ५ सय रुपैया सहयोग -संगीतकार काली र गोबिन्द ,गीतकार राजुवाबु र जेबि कोषमा जोडिए

संगीतकर्मी कल्याणकारी कोषमा सनिबार एकै दिन ६८ हजार ५ सय रुपैया सहयोग प्राप्त भएको छ ।
गीतकार जेबि घले संयोगी ले २५ हजार रुपैया कोषलाई हस्तान्तरण गरेका हुन । हिजो संगीत रोयल्टी संकलन समाजको साधारण सभाका अबसरमा रोयल्टी बुझदै गीतकार संयोगीले सहयोग रकम हस्तान्तरण गरेका हुन । त्यसैगरी संगीतकार कालि प्रसाद बाँसकोटाले यस अघि घोषणा गरेको २२ हजार ५ सय रुपैया सहयोग रकम पनि हिजै हस्तान्तरण गरिएको हो । कालिका तर्फ बाट प्रस्तोता समाज नेपालका अध्यक्ष तुलसी पराजुलीले सहयोग रकम कोषलाई हस्तान्तरण गरेका हुन । अब छिट्टै गायक प्रमोद खरेल र गायिका अन्जु पन्तले पनि कोषलाई सहयोग हस्तान्तरण गर्ने पराजुलीले जानकारी दिए । त्यसैगरी गीतकार राजु बाबु श्रेष्ठले सिर्जनाको रोयल्टी ग्रहण गर्दै आफ्नो तर्फबाट ११ हजार रुपैया कल्याणकारी कोषलाई सहयोगको घोषणा गरे । हिजै चौथो नम्वरमा रोयल्टी बुझेका संगीतकार गोबिन्द मधुर आचार्यले पनि कल्याणकारी कोषलाई १० हजार रुपैया सहयोगको घोषणा गरे ।
यसैबीच चर्चित संगीतकार राजनराज सिवाकोटिले छिट्टै एक औपचारीक कार्यक्रम गरी आफ्नो तर्फ बाट कल्याणकारी कोषमा सहयोग रकम हस्तान्तरण गर्ने जानकारी दिएका छन । त्यसैगरी मंसीर २७ गते प्रदर्शनमा आउने चलचित्र सुपर गोर्खेका निर्माता एबं निर्देशक राज थापाले पनि चलचित्रको टिमको तर्फबाट कल्याणकारी कोषलाई सहयोग गर्नेबचन दिएका छन ।
संगीतकर्मी हरुलाई आपत विपत पर्दा सहयोग गर्ने उद्धेश्यले स्थापना गरिएकोे कल्याणकारी कोषबृद्धिका लागि संगीतकार संघले बिभिन्न कार्यक्रमहरु गर्दै आएकोछ । कोष मा देश विदेशबाट सहयोग रकमहरु जम्मा हुने क्रम निरन्तर रहेको संघका प्रेस सल्लाहकार लोकराज अधिकारीले जानकारी दिएका छन ।
अधिकारीका अनुसार कोषमा सहयोग गर्न चाहनेहरुले बिभिन्न स्थानबाट सोधि खोजी गर्दै सहयोग रकमको प्रतिबद्धता ब्यक्त गरेका छन । दाताहरुले प्रतिबद्धता गरेको सहयोग रकम आफू अनुकुलको समयमा हस्तान्तरण गर्ने बचन दिएका छन । दाताको सहजताका लागि म्यूजिक संसार नेपालले डोनेट बक्स समेत संचालनमा ल्याएको छ ।
नेपाली संगीत क्षेत्रका सबै बिधाका सर्जकहरुलाई मर्दा पर्दा सहयोग गर्ने उद्धेश्यले स्थापना गरिएको कल्याणकारी कोषमा सहयोग आउने क्रमसँगै पीडित संगीतकर्मीका लागि पनि खर्च भैरहेको छ ।
अहिले सम्म ७ जना सर्जक संगीतकर्मी एकजना रंग पत्रकारको औषधी उपचारमा र ४ जना सर्जकको निधनका बेला कोषबाट २ लाख ४४ हजार २ सय ४१रुपैया सहयोग गरिएको संघका कोषाध्यक्ष हरि लम्सालले जानकारी दिएका छन । कोषको कार्तिक १३ गते सम्मको सार्बजनिक विवरण अनुसार कोषमा बचत ८ लाख ९२ हजार ९० रुपैया ८ पैसा रहेको छ ।

कल्याणकारी कोषमा सहयोग गर्ने दाताहरुलाई संघले केहि समय अघि बिशेष सम्मान गरेको थियो । त्यस्तो सम्मानलाई निरन्तरता दिइने संघका अध्यक्ष लक्ष्मण शेषले जानकारी दिएका छन । कल्याणकारी कोष बृद्धिका लागि तिहारमा देउसी भैलो खेलिएको थियो । केहि समय पछि मेचीकाली यात्रा गरिने पनि संघले जनाएको छ ।