प्रदेश २ को निर्बाचनमा ७६ प्रतिशत मत खस्यो
राजविराज, सप्तरी, २ असोज ः स्थानीय तहको नौ नगरपालिका र नौ गाउँपालिकाअन्तर्गत ४५९ मतदान केन्द्रमा ७६ प्रतिशत मतदान भएको छ ।
एक सय ३५ वडामा ८६५ जनप्रनिधिका लागि आज निर्वाचन भएको हो । जिल्लामा तीन लाख ३१ हजार ७९ जना मतदाता र पाँच हजार ५२७ उम्मेदवार छन् । । राजविराज–१५ मा राजपाका उम्मेदवार महन्थी यादवको मृत्युका कारण यही असोज ५ गते दुई मतदान केन्द्रमा निर्वाचन हुने मुख्य निर्वाचन अधिकृत शारदाप्रसाद कोइरालाले बताउनुभयो ।
यसैबीच फर्जी मतदान गर्न खोज्ने दुई व्यक्तिलाई प्रहरीले पक्राउ गरी कारबाही प्रक्रिया अगाडि बढाएको छ । शम्भुनाथ–४ स्थित रियालाल प्रावि मतदान केन्द्रमा फर्जी मतपत्र खसाल्ने स्थानीयवासी दुगृनन्द चौधरीलाई पक्राउ गरिएको बताइएको छ ।
त्यस्तै खडक नगरपालिका–५ अन्तर्गत पातो मावि मतदान केन्द्रमा फर्जी मतदान गर्ने अप्रोज आलमलाई प्रहरीले पक्राउ गरेको जिल्ला प्रहरी कार्यालयबाट थाहा भएको छ । छिन्नमस्ता गाउँपालिकामा भने मतदानको विषयलाई लिएर झडप भएको बुझिएको छ । मतदान केन्द्रबाट मतपेटिका आउने क्रम शुरु भइसकेको बताइएको छ ।
