एनआरएनको भविस्यको लागि जुनसुकै बलिदान गर्न तयार छु: गौरी राज जोशी

एनआरएन अमेरिकाको निर्बाचन स्थगित भएको छ तर यसको स्थगनमा देखिएका दृश्यहरु र त्यसका अवशेषहरु स्थगित भएका छैनन्। बिशेष गरी निर्बाचनमा अध्यक्ष पदमा उठ्न नपाउने निर्णय निर्बाचन समितिले गरेपछि गौरी जोशीको समूह अदालत पुगेको थियो। फलस्वरूप अदालतले निर्बाचन स्थगित गरी कानुनसम्मत रुपमा निर्बाचन गर्न निर्बाचन समिति र कार्यसमितिलाई निर्देशन दिएको थियो। अदालत धाउने गौरी जोशीको निर्णय र त्यसले एनआरएनमा पार्न सक्ने प्रभाव बारे चर्चा चलिरहँदा अदालत जान पर्नुको कारण बारे उनले आफ्नो फेसबुक मार्फत एक बिज्ञप्ति प्रकाशित गरेका छन्। एनआरएन र अमेरिकाको नेपाली समाजको हितको लागि सहमति र सहकार्य आबस्यक रहेको उल्लेख गर्दै आफु फेरी पनि आबस्यक बलिदान गर्न तयार रहेको कुरा उक्त बिज्ञप्तिमा स्पस्ट गरेका छन्। उम्मेद्वारी फिर्ता लिने शर्त बाहेक कस्तो र कुन कुरामा बलिदानी गर्न चाहेको हो उल्लेख नगरे पनि छलफलको लागि आफु तयार रहेको उनले जनाउ दिएका छन्।

बिज्ञप्ति यसप्रकार छ :

आदरणीय अमेरिकावासी आमाबुवा , दाजुभाइ , दिदीबहिनी एवं साथीहरु,

यही अगष्ट ११ र १२ मा हुने भनिएको गैर आवासीय नेपाली संघ राष्ट्रिय समन्वय परिषद अमेरिकाको निर्वाचनले फेरि अर्को एउटा मोड लिएको छ । यहाँहरु सबैलाई विदितै छ कि मैले पनि यो निर्वाचनमा अध्यक्षमा उम्मेदवारी दिएको छु । मेरो उम्मेदवारीको बैधानिकतालाई लिएर अनेक प्रश्नहरु उठाइए र अनावश्यक विवाद सृजना गरियो । एनआरएन अमेरिकाको टेनेसी राज्यमा दर्ता भएको बिधान र एनआरएन अन्तर्राष्ट्रिय समन्वय समितिको बिधान अन्तर्गत रहेरै रीतपूर्वक तोकिएकै समयमा मैले अध्यक्ष पदकालागि उम्मेदवारी दिएको हुँ । बिधानसम्मत र रीतपूर्वक उम्मेदवारी दिंदादिदै पनि निर्वाचन समितिले अध्यक्षका उम्मेदवारहरुको नामावली सूचीमा मेरो नाम राख्न अस्विकार गरेपछि उम्मेदवार बन्न पाउने बिधानसम्मत हकको सुरक्षा गर्न र एनआरएन अमेरिकाको निर्वाचनलाई सहजतापूर्वक अगाडी बढाउने वातावरण बनाउन मैले पटकपटक सम्बद्ध पक्षसँग आग्रह गरेकै हुँ । तर कतैवाट पनि न्याय नपाएपछि अन्तरआत्मा र मलाई माया गर्ने हजारौं साथीहरुको आग्रहलाई ध्यानमा राख्दै न्यायको खोजीमा म अदालत पुग्न बाध्य भएँ । अदालतले तत्काल निर्वाचनका सम्पुर्ण प्रक्रिया रोक्न अन्तरिम आदेश जारी गरेपछि निर्वाचन समितिले अर्को सुचना प्रकाशित नभएसम्मकालागि निर्वाचनका कार्यक्रम स्थगित गरेको छ ।
म एनआरएन अमेरिकामा सन् २००६ देखि नै आवद्ध रहेको आइसीसीको प्रमाण,एनसीसीको विधान अनुसारको प्रमाण र न्यायिक समितिको निर्णयलाई समेत निर्वाचन आयोगले बदनियतपूर्वक बेवास्ता ग-यो । बिधि– बिधान र नीतिलाई मान्ने काम निर्वाचन आयोगबाट भएन ,बरु उल्टै अमुक व्यक्ति र पात्रहरुबाट प्रभावित हुने काम भयो । सदस्यता छानबीन समितिका नाममा कतिपय सदस्यहरुलाई आ आफ्नो अधिकारबाट बन्चित गरियो । आजीवन सदस्यहरुलाई समेत उम्मेदवारीमा नाम समावेश गरिएन । प्रारम्भिक दुई सूचीमा नाम रहेका एनआरएन क्यालिफोर्निया च्याप्टरका अध्यक्ष एवं मेरो नेतृत्वका महासचिवका उम्मेदवार पूर्णचन्द्र बानियाँलाई अन्तिम सूचीमा उम्मेदवारी कायम गरिएन । दुई पटक सूचीमा नरहेका कतिपयको नाम अन्तिम सूचीमा एकाएक सार्वजनिक गरियो । स्वतन्त्र मानिएको भनिएको निर्वाचन आयोग म र मेरा समूहका उम्मेदवार र सदस्यहरुप्रति पूर्वाग्रही देखियो । नैसर्गिक हक र आफ्नो नेतृत्व छान्न र चुनिन पाउने वैधानिक अधिकारबाट मसहित कैयौं साथीहरुलाई बन्चित गरियो ।अन्तत: म यही अन्यायको विरुद्ध सबै सदस्यहरुको अधिकार स्थापित गर्न न्यायका लागि अदालत जान बाध्य भएँ ।
अदालतले आज न्यायिक समितिको निर्णयलाई समेत सम्बोधन हुने गरी निर्णय दिएको छ र म लगायत उम्मेदवार सूचीमा नाम समावेश नगरिएका सबैलाई समावेश गरी निर्वाचन कार्यक्रम तय गर्न आदेश दिएको छ । अदालतले अर्को निर्णय नभएसम्मका लागि आजकै निर्णयलाई अन्तिम निर्णय भन्दै गरेको यो फैसलाको म उच्च सम्मान गर्दछु । एनआरएन अमेरिकाको निर्वाचनलाई बिथोल्ने मेरो कुनै मनशाय छैन र हुनेपनि छैन । सत्य र न्याय स्थापित गर्न कहिलेकाँही तत्काल अप्रिय जस्ता लाग्ने निर्णयहरु पनि गर्नु पर्दोरहेछ । मेरो कारणले कतैबाट पनि एनआरएन अमेरिकालाई कमजोर हुन नदिने विश्वास यहाँहरु सबैलाई दिलाउन चाहन्छु । अदालतबाट भएको आदेशलाई सम्मान गर्दै निर्वाचन प्रक्रिया अघि बढाउन म निर्वाचन आयोगको ध्यानाकर्षण गराउन चाहन्छु । म कुनै पनि बहानामा निर्वाचनलाई अन्यौलमा पार्ने प्रयास नगरियोस् भन्ने माग गर्दछु । मेरो आग्रह छ,अदालतको आदेशको सम्मान गर्दै सोही अनुसार यथाशीघ्र निर्वाचन कार्यक्रम घोषणा गरिनुपर्छ । अब निर्वाचन लम्ब्याउने काम नगरौं । यसका लागि मैले गर्नुपर्ने जुनसुकै सहयोग र त्यागका लागि पनि म तयार छु । म एनआरएन अमेरिकाको बृहत्तर हित,एकता र सुदृढीकरणका लागि सबै पक्षसँग संवाद र सहकार्यका लागि सधैं तयार रहेको प्रष्ट पार्दछु ।

व्यवसायमा आजसम्म प्राप्त गरेको सफलताको अनुभवलाई समाजसेवामा लागु गर्न र एनआरएन अमेरिकालाई एउटा सफल र प्रभावकारी संस्थाका रुपमा स्थापित गर्न मैले उम्मेदवारी दिएको हुँ । मेरो उम्मेदवारी प्रथमत: यहीं रहेका प्रवासी नेपालीहरुको हक,हित र अधिकार स्थापनाका लागि हो । यहाँको नेपाली समुदाय बलियो बनाउनका लागि हो । निश्चित समय र योजनासहित ठोस काम गर्नका लागि हो । मेरो उम्मेदवारी न्यायका लागि हो । म अमेरिकामा रहनु भएका हर–नेपालीसँग जोडिन, यिनै नेपालीलाई सक्षम बनाउन र सक्षम बनेका नेपालीलाई मातृभुमिप्रतिको कर्तव्य र दायित्व सम्झाउन उम्मेदवार बनेको हुँ । यो अभियानमा म निरन्तर लागिनै रहनेछु । हालका लागि स्थगित भएको निर्वाचन प्रक्रिया फेरि छिट्टै शुरु हुने र त्यति बेला पनि तपाँइहरुको साथ–सहयोग पाइरहने अपेक्षा गर्दछु । मेरो नेतृत्वमा अमेरिकी आप्रवासमा रहेका नेपालीहरुको सशक्त एनआरएन अभियानको संगठित स्वरुप निर्माणका लागि म सबैसंग हातेमालो गरेर अघि बढ्ने प्रतिवद्धता व्यक्त गर्दछु ।

धन्यवाद

गौरीराज जोशी
एनआरएन अमेरिकाको अध्यक्षको उम्मेदवार