दिवंगत खेमराज गुरुङको अन्तिम गीति एल्बम‘घुमफिर‘ सार्बजनिक :संगीतकर्मी कल्याणकारी कोषमा एकैदिन १ लाख ८ हजार ५ सय ४५ रुपैया हस्तान्तरण

दिवंगत लोक गायक खेमराज गुरुङको अन्तिम गीति एल्बम‘घुमफिर‘ सार्वजनिक भएको छ । राजधानीमा बुधबार आयोजित कार्यक्रममा गुरुङकी आमा तुलसीमाया गुरुङले एल्बम सार्वजनिक गर्नु भएको हो ।

६ वटा गीतमा एकल स्वर संगीत भर्नु भएका खेमराजले ५ र कुमार बिवाहितले एक गीत लेख्नु भएको हो । एल्बममा नेपालका विभिन्न ठाउँको पर्यटन प्रवद्र्धन गर्ने गीतहरु रहेका छन् ।संगीतकार संघ नेपालका अध्यक्ष तथा संगीतकार लक्ष्मण शेष विडारीले‘घुमफिर‘ खेमराजको महत्वाकांक्षी एल्बम भएको बताउनु भयो । संगीत नाटय एकेडेमीमा उपकुलपति संगीतकार शम्भुजित बाँसकोटा पत्रकार तथा खेमराजका बालसखा दीपेन्द्र बान्तवा संगीतकार प्रकाश गुरुङ, गायक राजेश पायल राई, कवि तथा प्राज्ञ श्रवण मुकारुङ लगायतले खेमराजको सांगीतिक पाटो र अन्तरंग प्रसंगबारे चर्चा गर्नु भएको थियो ।
०५६ सालमा पहिलो गीति एल्बम ‘जीवन भाग १‘ निकालेका खेमराजको ‘जीवन भाग २‘, ‘अनमोल‘, ‘धरान पोखरा‘, ‘सोल्टी‘, ‘आलुतामा‘, ‘ढाक्रे‘ पछि ‘घुमफिर‘ आठौं एल्बम हो । ‘जीवन भाग २‘ मा रहेको ‘वारि जमुना‘ गीतबाट निकै चर्चित गायक खेमराजको गत भदौ नौ गते निधन भएको थियो ।
कार्यक्रममा संगीतकार संघ नेपालले स्थापना गरेको संगीतकर्मी कल्याणकारी कोषमा बिभिन्न ब्यक्ति तथा संस्थाबाट प्राप्त १ लाख ८ हजार ५ सय ४५ रुपैया हस्तान्तरण गरिएको थियो ।
हिजो रोटरी क्लव अफ न्यूरोड सिटीका तर्फबाट ७५ हजारको चेक रोटरियन मोहनबिर तुलाधरले हस्तान्तरण गर्नु भयो । त्यसैगरी गायक बिन्दु परियार र संगीत संयोजक सुदिप सागरको जोडीले यस अघि घोषणा गरेको १० हजारमा २ हजार २ सय १२ थप गरी १२ हजार २ सय १२ ,गायक तथा संगीतकार सरोज कोइराला र दिपा वाराकोटीको जोडीले घोषणा गरेको ६ हजार ६ सय ६६ गायक तथा संगीतकार नरहरी प्रेमीको पहलमा संकलन गरीएको इसिओ ट्याङकका सिइओ अनिल बरालको जोडीको तर्फबाट १० हजार र अमेरिकामा बस्ने गीतकार टेकु क्षेत्रीको तर्फबाट ४ हजार २ सय ६७ रुपैया गरी १ लाख ८ हजार ५ सय ४५ रुपैया कोषमा हस्तान्तरण गरिएको संघका प्रेस सल्लाहकार लोकराज अधिकारीले जानकारी दिनु भएको छ ।
संगीतकार संघको कल्याणकारी कोषमा देश विदेशबाट सहयोग रकमहरु जम्मा हुने क्रम जारी रहेको छ । नेपाली संगीतकर्मी हरुका लागि मर्दा पर्दा सहयोग गर्ने महान उद्धेश्यले स्थापना गरिएको कोषमा गायक हेमन्त शर्माले १० हजार , जर्मनीमा रहेका गीतकार लब थापाले २२ हजार २ सय २२ कोरीया बस्ने संगीतकार डि आर अटु ले १२ हजार , इजरायल बस्ने इन्द्रा केसीले १० हजार बेलायत बस्ने गायीका संगीता बायुङ राईले १० हजार गीतकार तथा रोयल्टी संकलन समाजका उपाध्यक्ष रमेश बिजीले १० हजार , गायक तथा संगीतकार रमेश राज भटटराईले ५ हजार दिने घोषणा गर्नु भएको कार्यक्रममा जानकारी दिइएको थियो । संगीतकर्मी लाई मर्दा पर्दा सहयोग गर्ने उद्धेश्यले कोष स्थापना गरिएको हो । कल्ययाणकारी कोषमा सहयोग आउने क्रमसँगै पीडित संगीतकर्मीका लागि पनि खर्च भैरहेको अध्यक्ष लक्ष्मण शेषले जानकारी दिनु भएको छ । क्यान्सर पीडित संगीतकार निरज कुमारलाई २० हजार , प्रसिद्ध लोकगायक तथा अभिनेताको बुद्धिकृष्ण लामिछानेलाई उपचारका लागि नगद १५ हजार १ सय ११ र एक बर्षको औषधी खर्च झण्डै १ लाख २० हजार सहयोग जुटाउने प्रतिबद्धता ब्यक्त गरेको छ । त्यसैगरी क्यान्सर पीडित संगीतकार निरज कुमारलाई औाषधि बापतको २० हजार मिर्गौला पीडित संगीत व्यवसायी शिव पौडेललाई दश हजार एक रुपैयाँ सहयोग हस्तारण भैसकेको छ ।