ट्रंप बिरुद्ध महाअभियोग पत्र तयार गर्न सभामुख पेलोसीको निर्देशन
वाशिंगटन डिसी, अमेरिका । अन्ततः रास्ट्रपति ट्रंपमाथि महाअभियोग लगाइने नै भएको छ । सभामुख नेन्सी पेलोसीले रास्ट्रपति डोनाल्ड ट्रंपले आफ्नो पदको दुरुपयोग गरेको पर्याप्त प्रमाण फेला परेको भन्दै उनीविरुद्ध महाअभियोग पत्र दर्ता गर्न सम्बन्धित संसदीय समितिलाई निर्देशन दिएकि छिन । ट्रंपलाइ डेमोक्र्याटहरुले घृणा गर्ने भएकोले सानोतिनो कुरामा निहु खोजेर महाअभियोग लगाउन खोजेको त होइन भन्ने पत्रकारहरुको प्रश्नमा आफु कसैलाई घृणा नगर्ने तर संविधानको पालन गर्ने आफ्नो कर्तब्य पुरा गरेरै छोड्ने बताएकी छन् । पेलोसीको यो घोषणा संगै अमेरिकाको करिव २४० बर्षको इतिहासमा महाअभियोग लाग्ने तेश्रो रास्ट्रपति ट्रंप हुने भएका छन् ।
करिव दुइ महिना अघि देखि प्रतिनिधिसभामा महाअभियोग सम्बन्धि अनुसन्धान अघि बढाइएको थियो । गोप्य र सार्बजनिक सुनुवाई सकिए पछि यहि डिसेम्बर २ मा मात्र हाउस इन्टेलिजेन्स समितिले ३०० पेज लामो अनुसन्धानको प्रतिबेदन न्यायिक समितिमा पठाएको थियो । न्यायिक समितिले संबिधानविद एबम बिज्ञहरुको राय लिएको थियो भने सुनुवाइमा बोलाइएका ४ जना मध्ये ३ जनाले महाअभियोग लगाउन प्रयाप्त प्रमाण रहेको भन्दै बाटो प्रशस्त गरिदिएका थिए । एक जनाले भने रास्ट्रपतिको काम सहि नभए पनि महाअभियोग नै लगाउने अपराध भने नगरेको भन्दै यसले गलत परिपाटी बस्ने तर्फ सचेत गराएका थिए ।
अबका केहि दिन तल्लो सदनका डेमोक्र्याटहरुले महाअभियोग पत्र तयार पारेर आउँदो क्रिश्मस अघि नै तल्लो सदनको पूर्ण इजलासमा अभियोग पत्र माथि मतदान हुनेछ । अहिले सम्मको परिस्थिति हेर्दा मतदान पार्टी लाइन अनुसार नै हुने देखिन्छ । सम्पूर्ण डेमोक्र्याटहरु महाअभियोगको पक्षमा देखिन्छन भने रिपब्लिकनहरु यसको बिपक्षमा । एकजना पनि रिपब्लिकनले समर्थन नगरेको यो महाअभियोग प्रस्ताव विभाजित राजनीतिलाई झनै विभाजित बनाए पनि दुवै पार्टीका समर्थकहरु पछि हट्ने मूडमा भने देखिन्नन् । प्रस्ताव पारित हुने पक्कापक्कि जस्तै भएको अबस्थामा अब ट्रंपमाथि महाअभियोग लाग्ने र त्यसको छिनोफानोको लागि रिपब्लिकनहरुको बहुमत भएको माथिल्लो सदन अर्थात् सिनेटमा जानेछ ।
सिनेटमा रिपब्लिकनहरुको बहुमत भएर नै ट्रंपले हाउसमा छिटो काम सकेर सिनेटमा पठाउन चुनौती दिएका छन् । तल्लो सदनमा पक्षपातपूर्ण तरिकाले काम भएको आरोप लगाउंदै ट्रंपले सिनेटमा आफुले न्याय पाउने र त्यहाँ डेमोक्र्याटहरुका ठुला नेताहरुलाई उभ्याउने चेतावनी दिएका छन् । संसदीय समितिहरुमा बहुमत प्राप्त पार्टीको अध्यक्ष रहने, सोहि पार्टीका धेरै सदस्य हुने र प्रक्रिया तोक्ने सम्पूर्ण अधिकार अध्यक्षलाइ नै हुने हुनाले सिनेटमा आफ्नो भने अनुसार काम हुने ट्रंपको बुझाइ देखिन्छ । अहिले सम्मको स्थितिमा सिनेटका रिपब्लिकनहरुले तल्लो सदनले अनुसन्धान गरेको ट्रंपको युक्रेन घटना भन्दा पनि जो बाइडेन र उनका छोरा हन्टर बाइडेन बारे बढी अनुसन्धान गर्ने रुचि देखाउंदै आएका छन् । यी घटना हेर्दा ट्रंप सिनेटबाट मुक्ति पाउने देखिन्छन । महाअभियोग प्रक्रियामा तल्लो सदन अभियोगकर्ता र सिनेटले निर्णायकको काम गर्ने अमेरिकी संबैधानिक व्यवस्था छ ।
