डालसका पत्रकारहरुले पुर्ब प्रम भट्टराईसंग अन्तरक्रिया गरे

डालस, टेक्सास । नेपाल अमेरिका पत्रकार संघ (नेजा) को आयोजनामा आज दिउसो पूर्व प्रधानमन्त्री तथा नयाँ शक्ति पार्टीका संयोजक बाबुराम भट्टराईसंग अन्तरक्रिया गरियो । छोटो समयको जानकारी र तयारीमा गरिएको उक्त भेटघाटमा डालस वरपर बस्ने करिव एक दर्जन पत्रकारहरुको उपस्थिति थियो ।

१२ बजे शुरु गर्ने भनिएको कार्यक्रमको तयारी समयमै गरिएको थियो । अतिथिद्वय बाबुराम भट्टराई र हिसिला यमी आए पछि केहि अनौपचारिक कुरा भए । केहि बेरमै कार्यक्रम शुरु भयो । आफु अमेरिकामा भन्न आएको नभएर सुन्न आएको हो भने पनि शुरुमा उनकै भनाइबाट कार्यक्रमको औपचारिक शुरुवात गरियो ।

खासै नयाँ कुरा बाबुरामले भनेनन् । बिगत केहि समय देखि नयाँ शक्ति पार्टी खोलेर बसे पछि उनले व्यक्त गरेका कुराहरु नै त्यहाँ आए । आफु फेरिएको कुरा उनले गर्न छुटाएनन । नेपालमा राजनीतिक परिबर्तनको चरण समाप्त भएको र आर्थिक उन्नतिको बेला शुरु भएको भन्ने नै उनको आधारभूत भनाइ थियो । भारत र चीन बिचमा रहेको नेपालले ती दुइ ठुला रास्ट्रहरुको पुलको रुपमा काम गरेर आर्थिक उन्नति गर्नु पर्ने धारणा राखे ।

आर्थिक पत्रकार संजय घिमिरेले सोधेको “नेपाल बन्छ कि बन्दैन?” भन्ने प्रश्नमा बन्नु पर्छ भने पनि कसरी बन्छ भन्ने कुनै उपाय सुझाउन सकेनन । बन्छ भनेर झिनो आशा देखाए पनि वर्तमान सरकारले नै देश बनाउछ भनेर आफु धेरै आशाबादी नभएको असन्तुस्टी पोखे । ६ महिना धेरै त होइन तर बिहानीले दिनको संकेत गर्छ भन्ने उखानलाई विश्वास गर्ने हो भने यो सरकारबाट धेरै आशा गर्ने ठाउँ नरहेको उल्लेख गरे । प्रधानमन्त्री ओलीले अरिंगालले झैँ जाइलाग्न आफ्ना कार्यकर्ताहरुलाई आव्ह्वान गरेको प्रसंगमा पनि उनले त्यसो भन्नु गल्ति भएको भनेर ओलीको आलोचना गरे ।
पत्रकारहरुका कुराहरु धैर्यतापुर्बक सुनेका भट्टराइले उत्तर मिठो तर बनिबनाउ दिए । हज्जारौं नेपालीहरुको ज्यानको बलि चढाएको जनयुद्ध र त्यसपछि नेपालले प्राप्त गरेका उपलब्धिहरुबाट खासै गर्ब गर्न नसके पनि १० बर्षे जनयुद्ध जायज थियो भन्ने तर्क भने गर्न पछि परेनन् । आफुले गरेका गल्ति ढाकछोप गर्ने, अरुले गरेका गल्तीहरुलाई उचाल्ने नेपाली राजनीतिको रोगबाट मुक्त हुन खोजे जस्तो देखिन खोजे पनि आफुले जनयुद्धको क्रममा गरेका गल्तिहरु स्वीकार गर्न चाहेनन् । बोल्ने क्रममा हिसिला यमीले युद्धको बेला भएका मृत्युहरुमा माफी माग्न नपर्ने र माफी नमाग्ने कुरा व्यक्त गरिन । बाबुराम भट्टराईले पनि सत्य निरुपण तथा मेलमिलाप आयोग मार्फत युद्धकालिन घाउहरु पुर्नु पर्ने धारण राखे ।
कम्युनिस्ट र बिशेष गरी माओबादीहरुले घोक्दै र घोकाउँदै आएको साम्राज्यबादी र बिस्तारबादी शव्द र तिनीहरु संगको सम्बन्धको बारेमा पत्रकार बाल जोशीले सोधेको प्रश्नको उत्तरमा यो शव्द आफुले आविस्कार गरेको नभई पहिल्यै देखि चलिआएको जानकारी गराए । यतिबेला नेपाललाई सबैको सहयोगको खाँचो रहेकोले बिरोध भन्दा फकाएर काम लिनु उपयुक्त हुने धारणा भट्टराईले राख्नु भयो । युरोपियन देशहरु भन्दा अमेरिका बढी उदार समाज भएको देश भएकोले आफु अमेरिका प्रति संधै सकारात्मक रहेको कुरा बताए।

प्रमुख प्रतिपक्षि पार्टीका कुरा त नसुन्ने सरकारले एक जना मात्र सांसद भएको तपाईंका कुरा के सुन्लान र भन्ने पत्रकार रामचन्द्र भत्ताको उत्तरमा संसदमा आफ्नो कुरा राख्ने समय प्रयाप्त रहेको तर कुरा सुने पनि नसुने पनि आफुले नेपालको सम्वृद्धिको पक्षमा बोलिरहने स्पस्ट गरे । १० बर्षे युद्धपीडित हरुले के सोंचेर तपाईंहरुलाई माफ गर्ने भनेर सोधिएको प्रश्नमा युद्धको घाउ बिर्सिन समय लाग्ने तर त्यसको लागि सरकारबाट भएका कामहरु अत्यन्त ढिलो भएको स्वीकार गरे । यो काम छिटो भन्दा छिटो गरेर युद्ध पिडित दुवै पक्षलाइ सहमतिमा लायन ढिला गर्न नहुने उनले जिकिर गरे ।
नेजाका उपाध्यक्ष विकास राज न्यौपानेको उपस्थितिमा भएको उक्त कार्यक्रम नेजाका सचिब सुरज भण्डारीले संचालन गरेका थिए । सो अबसरमा “बलायर प्रत्यासी”, विजय भट्टराई, होम लम्साल, शिव शर्मा, गोविन्द ढकाल, सुर्य थापा लगाएतले जिज्ञाशा राखेका थिए ।