डाक्टर केसीको समर्थनमा डालसमा प्रदर्शन
अगस्त १२, डालस, टेक्सास। आज यहाँ नेपालमा अनसनरत डाक्टर गोबिन्द केसीको समर्थनमा र उहाँको जीवन रक्षाको माग गर्दै एक प्रदर्शन गरिएको छ। नेपाली आध्यात्मिक तथा सांस्कृतिक केन्द्रको सभाहलमा सम्पन्न उक्त कार्यक्रममा डालस वरपरका स्थानीय समाजसेवी एबम सर्बसाधारणको ठुलो उपस्थिति थियो। गोविन्द केसी बचाउ अभियान नै संचालन गरेका पत्रकार तथा समाजसेवी सुरेश पोखरेलको अगुवाइमा उक्त कार्यक्रम सम्पन्न भएको थियो । उक्त प्रदर्शनमा नेपाली समाज टेक्सास, नेपाली सांस्कृतिक तथा आध्यात्मिक केन्द्र, नेपाली जनसम्पर्क समिति र बिबेकशील नेपाली पार्टीको समर्थन समेत रहेको थियो।
सबैलाई थाहै छ, डाक्टर केसी नेपालको स्वास्थ्य क्षेत्रको बिकृति बिरुद्ध अहिले सहित ११औं पटक अनसन बसिसक्नु भएको छ भने उहाँको अहिलेको अनसन १६ दिन कटेर स्वास्थ्य स्थिति जटिल बन्दा पनि सरकारले माग पुरा गर्न प्रयाप्त चासो दिएको छैन। सोहि अबस्थालाई मध्यनजर गर्दै डालसका नेपालीहरुले यो अभियान संचालन गरेका हुन्।
