डालसमा एनआरएनका अध्यक्ष पदका प्रत्याशी बीच बहस सम्पन्न

डालस, अगस्त ५ । एनआरएन अमेरिकाको आगामी कार्यकालको लागि निर्बाचन आउन एक हप्ता भन्दा कम छ । उम्मेदवारहरु मतदाताहरुसंग अन्तरक्रियामा व्यस्त छन् । कोहि न्यु योर्क त कोहि क्यालिफोर्नियामा समुदाय संग भेटघाट गरिरहेका छन् । यसै बीच अध्यक्ष पदका तीन जना उम्मेदवारहरु डालसमा जम्मा भएर आफ्ना कुराहरु व्यक्त गरे । वर्तमान अध्यक्ष डाक्टर केशब पौडेल, राम सी पोख्रेल र कृष्ण पोख्रेल सहभागी भएको बहस कार्यक्रममा डालस वरपरका थुप्रै नेपालीहरुको उपस्थिति थियो ।

भिजन फर नेपाल फाउन्डेसन, हिमालयखबर र नेपाली समाज टेक्सासको आयोजनामा सम्पन्न उक्त बहस सम्पन्न भएको थियो । बहसमा सहभागी प्रत्याशीहरुले आफुलाई अध्यक्ष पदको योग्य उम्मेदवार रहेको दावी गर्दै आफुले मात्र एनआरएन अमेरिका हाँक्न सक्ने जिकिर गरेका थिए । कार्यक्रममा वर्तमान अध्यक्ष डाक्टर केशव पौडेल प्रतिरक्षात्मक अबस्थामा पुगेका थिए भने राम सी पोख्रेल अरु भन्दा आक्रामक रुपमा प्रस्तुत भएका थिए । निर्बाचन आयोगको बिबादित निर्णय, सदस्यता वितरणमा देखिएको समस्या लगायत कुराहरुमा केशव पौडेललाइ प्रश्न गरिएको थियो ।

३ बजे शुरु गर्ने भनिए पनि प्राबिधिक तथा अन्य कारणले ४ बजे मात्र शुरु भएको थियो भने बहसमा सहभागीहरुले खासै मतदाताहरुमा उत्साह ल्याउने खालको योजना र कार्यक्रम ल्याउन नसकेको सहभागीहरुले महसुश गरेका थिए । त्यसो त धेरै उम्मेदवारहरुमा एनआरएनको खास उद्देस्य के हो भने कुरा नै स्पस्ट नभएको आभाष हुन्थ्यो । शब्दजालद्वारा आफ्ना कमजोरी लुकाउन प्रयास गरिए पनि उम्मेद्वारहरु उत्तरमा अल्मलिएका थिए । बहसका संयोजक कृष्ण शर्मा र सह-संयोजक तारा बराल हुनुन्थ्यो । यति हुँदा हुँदै पनि यो बहसले यी उम्मेदवारहरुको क्षमता कति छ र के गर्न सक्छन भन्ने छुट्टाउन अरु सहज भने पक्कै भएको छ ।
उक्त कार्यक्रमको समापन हुनु अघि एनआरएन अमेरिकाको आगामी चुनावका अन्य पदका प्रत्याशीहरुलाई समेत २/२ मिनेट समय दिएर आफ्नो विचार प्रस्तुत गर्न समय दिइएको थियो । कार्यक्रममा पत्रकार विजय घिमिरे, रामचन्द्र भट्ट र विजयराज न्यौपानेले सबैलाई स्वागत मन्तब्य, उम्मेदवार परिचय एबम धन्यवाद दिनु भएको थियो ।